អន្តរជាតិ
បុគ្គលមានឥទ្ធិពលជាងគេ៖ ពូទីន លេខ១, ត្រាំ លេខ២ ឯ Duterte លេខ៧០
× ប្រធានាធិបតីហ្វីលីពីន Rodrigo Duterte ដែលទើបកាន់តំណែងមិនទាន់បានមួយឆ្នាំផង បានបង្ហាញមុខជាលើកដំបូងក្នុងបញ្ជីបុគ្គលមានឥទ្ធិពលខ្លាំងជាងគេលើពិភពលោករបស់ទស្សនាវដ្ដី Forbes ។ «Idol» របស់លោក គឺប្រធានាធិបតីរុស្សី វ្ល៉ាឌីមៀ ពូទីន បានបន្តឈរលេខរៀងទី១ ក្នុងបញ្ជីប្រចាំឆ្នាំ២០១៦ នេះហើយលោក ពូទីន កាន់តំណែងបុគ្គលមានឥទ្ធិពលជាងគេបានបួនឆ្នាំជាប់គ្នា។
ទស្សនាវដ្ដី Forbes បានបញ្ចេញបញ្ជីឈ្មោះបុគ្គលមានឥទ្ធិពលជាងគេលើពិភពលោក។ អ្វីដែលគួរឲ្យចាប់អារម្មណ៍នោះ ក្នុងបញ្ជីដែលមានឈ្មោះបុគ្គល៧៤រូប គេសង្កេតឃើញមានបុគ្គលទើបជាប់ឈ្មោះថ្មីចំនួន១១រូប ក្នុងនោះក៏បុរសខ្លាំងរបស់ហ្វីលីពីន Rodrigo Duterte ដែលចូលកាន់តំណែងប្រធានាធិបតីបានប្រហែល៦ខែ។ លោក Duterte ជាប់ចំណាត់ទី៧០ នៃបញ្ជីដែលចេញផ្សាយនៅថ្ងៃទី១៤ ខែធ្នូ។
ទស្សនាវដ្ដី Forbes បានពណ៌នាលោក Duterte ជាមនុស្សដែលនិយាយអ្វីដែលគាត់បានគិត បើទោះជាពាក្យទ្រគោះបោះបោកក្ដី តែអាកប្បកិរិយាបែបនេះហើយ ទើបធ្វើឲ្យលោកក្លាយជាបុគ្គលល្បី។ ទស្សនាវដ្ដីដដែលនេះ ក៏បានរៀបរាប់ពីយុទ្ធនាការបោសសម្អាតគ្រឿងញៀនរបស់លោក Duterte ដែលសម្លាប់ជីវិតអស់ជាច្រើនពាន់នាក់ និងការងាកទៅរកចិន និងរុស្សីផងដែរ។
បុគ្គលដែលទើបឈ្មោះដូចលោក Duterte ដែរមាន នាយករដ្ឋមន្ត្រីអង់គ្លេស Theresa May មានចំណាត់ថ្នាក់ទី១៣, នាយកប្រតិបត្តិ Uber Travis Kalanick នៅលេខរៀងទី៦៤, នាយកប្រតិបត្តិ Walt Disney Bob Iger នៅលេខរៀងទី៦៧ ហើយអនុប្រធានាធិបតីជាប់ឆ្នោតអាមេរិក Mike Pence មានលេខរៀងទី៦៩ ។ នេះបើយោងតាមបញ្ជីដដែលខាងលើ។
កាន់តែពិសេសនោះ ប្រធានាធិបតីរុស្សី វ្ល៉ាឌីមៀ ពូទីន បានបន្តឈរលើទីកំពូលក្នុងឆ្នាំទីបួនជាប់ៗគ្នាសម្រាប់ឆ្នាំ២០១៦។ ទស្សនាវដ្ដី Forbes សរសេរថា ប្រធានាធិបតីរុស្សីរូបនេះ បានពង្រីកឥទ្ធិពលរបស់រុស្សីទៅកាន់គ្រប់កន្លែងលើពិភពលោក។ ពីទឹកដីកំណើត ទៅដល់ស៊ីរី ធ្លាយដល់ការបោះឆ្នោតប្រធានាធិបតីអាមេរិក គេសង្កេតឃើញមានឥទ្ធិពលរបស់លោក ពូទីន ជានិច្ច។
ចំណាត់ថ្នាក់បន្ទាប់ពីប្រធានាធិបតី ពូទីន គឺប្រធានាធិបតីជាប់ឆ្នោតអាមេរិក ដូណាល់ ត្រាំ ស្ថិតនៅលេខ២។ លោកបានកើនចំណាត់ថ្នាក់យ៉ាងខ្ពស់ដោយលោកមានចំណាត់ថ្នាក់លេខ៧៤ ក្នុងឆ្នាំ២០១៥។ អធិការបតីអាល្លឺម៉ង់ Angela Merkel នៅលំដាប់ទី៣, ប្រធានាធិបតីចិន ស៊ី ជិនពីង នៅលំដាប់ទី៤ និងសម្ដេចប៉ាប ហ្វ្រង់ស៊ីស ស្ថិតនៅលំដាប់ទី៥ ៕
Tag:
Rodrigo Duterte
Forbes
© រក្សាសិទ្ធិដោយ thmeythmey.com