អន្តរជាតិ
ទូតអាមេរិកនិងរុស្សី ទាស់សម្ដីគ្នាលើបញ្ហាស៊ីរីនៅកិច្ចប្រជុំក្រុមប្រឹក្សាសន្តិសុខ
× អគ្គរដ្ឋទូតអាមេរិក និងរុស្សី ប្រចាំអង្គការសហប្រជាជាតិ បានទាស់សំដីគ្នានៅឯកិច្ចប្រជុំក្រុមប្រឹក្សាសន្តិសុខស្ដីពីជម្លោះនៅស៊ីរី ដែលកំពុងតែអាក្រក់ឡើងៗជាពិសេសស្ថានការណ៍នៅក្រុង Aleppo តែម្ដង។ តំណាងមហាអំណាចទាំងពីរទម្លាក់ឲ្យគ្នាទៅវិញទៅមកលើស្ថានការណ៍ដែលកាន់តែយ៉ាប់យ៉ឺននៅស៊ីរី ខណៈដែលបទឈប់បាញ់ដែលព្រមព្រៀងគ្នាដើម្បីជម្លៀសប្រជាជននោះ ក៏មិនមានប្រសិទ្ធភាពដែរ។
តំណាងអាមេរិក និងរុស្សី បានបោះការទទួលខុសត្រូវលើជម្លោះនៅស៊ីរីឲ្យគ្នាទៅវិញទៅមកក្នុងកិច្ចប្រជុំក្រុមប្រឹក្សាសន្តិសុខនៅថ្ងៃទី១២ ខែធ្នូ។ អគ្គរដ្ឋទូតអាមេរិក Samantha Power បានចោទប្រកាន់រុស្សី រដ្ឋាភិបាលប្រធានាធិបតី អាសាដ និងអ៊ីរ៉ង់ ថាបានប្រើកម្លាំងយោធាដើម្បីគ្រប់គ្រង និងសម្លាប់ប្រជាជនក្នុងក្រុង Aleppo ដែលត្រួតត្រាដោយក្រុមឧទ្ទាមប្រឆាំង។
ក្នុងកិច្ចប្រជុំដែលសំដៅរកដំណោះស្រាយបញ្ឈប់ការប្រយុទ្ធនៅ Aleppo លោកស្រី Power និយាយថា ទាំងរុស្សី របបលោកអាសាដ និងអ៊ីរ៉ង់ ត្រូវទទួលខុសត្រូវលើបញ្ហាទាំងអស់ដែលកើតឡើង ព្រោះប្រទេសទាំងបីនេះ ទាត់ចោលកិច្ចខិតខំប្រឹងប្រែងរបស់អន្តរជាតិដើម្បីជម្លៀសប្រជាជន។ ហើយការបដិសេធនេះ ជាសញ្ញាប្រាប់ទៅសកម្មជនក្រុមឧទ្ទាម ឲ្យសម្លាប់ប្រជាជនស្លូតត្រង់បន្តទៀត។
អគ្គរដ្ឋទូតអាមេរិកដដែលបន្តចោទប្រកាន់សម្ព័ន្ធមិត្តបីប្រទេសនេះទៀតថា កងកម្លាំងនិងកូនចៅរបស់ពួកគេ បានប្រព្រឹត្តឧក្រិដ្ឋកម្មលើប្រជាជន។ មិនតែប៉ុណ្ណោះ គ្រាប់បែក គ្រាប់កាំភ្លើងធំ និងប្រតិបត្តិការដែនអាកាសរបស់ពួកគេ បានជួយឲ្យក្រុមអ្នកប្រយុទ្ធហ៊ុមព័ទ្ធប្រជាជនស៊ីរីរាប់ពាន់នាក់ មិនឲ្យចេញទៅណារួចឡើយ។
ជាការឆ្លើយតប អគ្គរដ្ឋទូតរុស្សី Vitaly Churkin ក៏បានរិះគន់អាមេរិកវិញភ្លាមៗដែរ និងបានទាត់ចោលការចោទប្រកាន់ទាំងឡាយរបស់អគ្គរដ្ឋទូតអាមេរិក។ លោក Churkin បានហៅការអធិប្បាយរបស់លោកស្រី Power ជារឿងចម្លែក និងនិយាយដួចជាខ្លួនជាមនុស្សល្អអ៊ីចឹង។ លោកក៏បានប្រាប់ឲ្យលោកស្រី Power ចងចាំពីកំណត់ត្រារបស់អាមេរិកដែលចូលចិត្តឈ្លានពានអ្នកដទៃ។
តំណាងរុស្សីរូបនេះក៏មិនភ្លេចវាយប្រហារអាមេរិកវិញដែរ ដោយលោកបានរម្លឹកពីតួនាទីរបស់អាមេរិក និងសម្ព័ន្ធមិត្តខ្លួន ដែលជួយឲ្យក្រុមរដ្ឋឥស្លាមលេចជារូបរាងតាមរយៈការឈ្លានពានអ៊ីរ៉ាក់ពីសំណាក់អាមេរិកផ្ទាល់ និងអង់គ្លេស។ មិនតែប៉ុណ្ណោះ រុស្សី មិនពេញចិត្តអាមេរិកដែលបានត្រឹមត្អូញត្អែរចង់ឲ្យការប្រយុទ្ធគ្នានៅ Aleppo ឆាប់បញ្ចប់ តែខ្លួនមិនបានជួយអ្វីឡើយ។
ការជម្លៀសប្រជាជននៅ Aleppo ត្រូវចាត់ទុកជាជ័យជម្នះមួយដ៏ធំរបស់រដ្ឋាភិបាល បាសា អាល់អាសាដ ព្រោះក្រុមឧទ្ទាមបាក់ទ័ពនិងគ្មានចលនា ប្រឆាំងនៅក្នុងទីក្រុងនេះទៀតឡើយ។ គេមិនដឹងថា ជនស៊ីវិលប៉ុន្មាននាក់ដែលបន្តស្ថិតនៅទីក្រុងនេះទេ ប៉ុន្តែគេវាយតម្លៃថា មនុស្សប្រហែល ១៣ ម៉ឺននាក់បានរត់ចូលទៅជ្រកកោននៅទីក្រុងនេះក្នុងពេលដែលមានការវាយលុករបស់កងទ័ពរដ្ឋាភិបាល៕
Tag:
អាមេរិក
រុស្សី
ស៊ីរី
Aleppo
© រក្សាសិទ្ធិដោយ thmeythmey.com