អឺរ៉ុបដើរផ្ទុយពីលោក ដូណាល់ ត្រាំ ដោយសម្រេចបន្តដាក់ទណ្ឌកម្មប្រឆាំងរុស្ស៊ី៦ខែទៀត

អន្តរជាតិ

អឺរ៉ុបដើរផ្ទុយពីលោក ដូណាល់ ត្រាំ ដោយសម្រេចបន្តដាក់ទណ្ឌកម្មប្រឆាំងរុស្ស៊ី៦ខែទៀត

16, Dec 2016 , 9:30 pm

រូបភាព

ដោយ: តន ចាន់រិទ្ធារ៉ា

មេដឹកនាំអឺរ៉ុប បានឯកភាពគ្នាបន្តដាក់ទណ្ឌកម្មសេដ្ឋកិច្ចលើរុស្ស៊ីរយៈពេល៦ទៀត ដើម្បីបង្ខំប្រទេសនេះឲ្យគោរពកិច្ចព្រមព្រៀងសន្តិភាព Minsk ដែលជាប់គាំងជាច្រើនខែមកហើយ។ ការដាក់ទណ្ឌកម្មនេះ គឺដើម្បីធានាថា ក្រុងមូស្គូនឹងអនុវត្តកិច្ចព្រមព្រៀងសន្តិភាពក្រុង Minsk ឲ្យពេញលេញ តែគេមិនដឹងថា ទណ្ឌកម្មនេះ នឹងមានឥទ្ធិពលខ្លាំងប៉ុណ្ណាលើរុស្ស៊ីដែរ។ មួយវិញទៀត ការបន្តទណ្ឌកម្មនេះ ជាសញ្ញានៃការដើរលើផ្លូវខុសគ្នារវាងអឺរ៉ុប និងអាមេរិកក្រោមអាណត្តិប្រធានាធិបតីថ្មី ដូណាល់ ត្រាំ ផងដែរ។

សូស្ដាប់ព័ត៌មានលម្អិត៖

បណ្ដាមេដឹកនាំអឺរ៉ុប បានព្រមព្រៀងគ្នាបន្តទណ្ឌកម្ម៦ខែទៀតលើរុស្ស៊ីក្នុងសំណុំរឿងអ៊ុយក្រែន ដែលរុស្ស៊ីលេបយកតំបន់គ្រីមៀកាលពីឆ្នាំ២០១៤។ មេដឹកនាំរដ្ឋសមាជិកអឺរ៉ុប បានព្រមព្រៀងគ្នាដូចនេះ នៅឯកិច្ចប្រជុំកំពូលក្នុងក្រុងព្រុចសែលនៅថ្ងៃទី១៥ ខែធ្នូ ខណៈទណ្ឌកម្មបច្ចុប្បន្នអស់សុពលភាពនៅដំណាច់ខែមករាឆ្នាំ២០១៧ ។ ចំណែកទណ្ឌកម្មថ្មីដែលត្រូវបន្តនឹងចាប់ផ្ដើមពីខែកុម្ភៈ ដល់ខែកក្កដា ឆ្នាំ២០១៧។

នៅមុននេះ បារាំង និងអាល្លឺម៉ង់ ដែលកំពុងដើរតួជាអ្នកដឹកនាំអឺរ៉ុប និងជាស្ថាបនិកនៃកិច្ចព្រមព្រៀងសន្តិភាពនេះ បានតវ៉ាថា កិច្ចព្រមព្រៀង Minsk នៅមិនទាន់អនុវត្តឲ្យបានត្រឹមត្រូវឡើយ ដ្បិតរុស្ស៊ីនៅតែបន្តសកម្មភាពរបស់ខ្លួនដដែល។ បស្ចិមប្រទេស នៅតែបន្តចោទប្រកាន់ក្រុងមូស្គូ ថាបានជួយគាំទ្រក្រុមឧទ្ទាមនៅភាគខាងកើតអ៊ុយក្រែន ដើម្បីប្រឆាំងនឹងរដ្ឋាភិបាលក្រុងគៀវ តែក្រុងមូស្គូបានទាត់ចោលការចោទប្រកាន់នេះផងដែរ។

មេដឹកនាំសមាជិកភាគច្រើន យល់ឃើញថា ការដាក់ទណ្ឌកម្មលើរុស្ស៊ីមិនមានប្រសិទ្ធភាពឡើយ។ ប៉ុន្តែ ពួកគេសម្រេចចិត្តធ្វើបែបនេះ ដើម្បីបង្ហាញពីឥទ្ធិពលរបស់ខ្លួន ចំពេលដែល រុស្ស៊ីបន្តអន្តរាគមន៍ជួយរបបលោក អាសាដ ហើយវាបានបង្ហាញពីអានុភាពរបស់រុស្ស៊ី។ ប្រធានាធិបតីលីទុយអានី Dalia Grybauskaite និយាយថា សមាជិកអឺរ៉ុបទាំងអស់ យល់ដូចគ្នាថា ការបន្តទណ្ឌកម្មនេះជារឿងមិនអាចគេចបាន។

ទណ្ឌកម្មសេដ្ឋកិច្ចជាបន្តបន្ទាប់របស់អឺរ៉ុប ពិតជាបានប៉ះពាល់ដល់សេដ្ឋកិច្ចរបស់រុស្ស៊ីមែន តែអឺរ៉ុបខ្លួនឯង ក៏រងផលអវិជ្ជមានមិនតិចដែរ។ រុស្ស៊ី បានឆ្លើយតបនឹងទណ្ឌកម្មរបស់អឺរ៉ុបដោយបានផ្អាកទំនាក់ទំនងលើវិស័យជាច្រើនជាមួយរដ្ឋសមាជិកអឺរ៉ុបដូចជាពាណិជ្ជកម្ម និងការនាំចេញថាមពលជាដើម។ ក្រៅពីនោះ រុស្ស៊ី ក៏ងាកទៅរកទីផ្សារដទៃទៀតដូចជាអាស៊ី អាមេរិកឡាទីន ដើម្បីពង្រឹងកំណើនសេដ្ឋកិច្ចរបស់ខ្លួនវិញដែរ។

១. រុស្ស៊ីថា ទណ្ឌកម្មអឺរ៉ុបដាក់ដើម្បីរក្សាការរួបរួមរបស់ខ្លួនប៉ុណ្ណោះ
តាមពិតទៅ មិនមែនរដ្ឋសមាជិកអឺរ៉ុបទាំងអស់សុទ្ធតែគាំទ្រការបន្តទណ្ឌកម្មលើរុស្ស៊ីឡើយ។ រដ្ឋសមាជិកខ្លះដូចជា អ៊ីតាលី និងស្លួវ៉ាគី ជាដើម ចង់ឲ្យបញ្ឈប់ការដាក់ទណ្ឌកម្មដែលដាក់រុស្ស៊ីអស់ពេលជាយូរ តែដូចជាមិនសូវឃើញមានប្រសិទ្ធភាពអ្វីសោះ។ ផ្ទុយទៅវិញ សេដ្ឋកិច្ចប្រទេសទាំងអស់រងការប៉ះពាល់យ៉ាងខ្លាំង ជាពិសេសការធ្លាក់ចុះការនាំចេញទៅកាន់រុស្ស៊ី ដែលជាទីផ្សារដ៏ធំរបស់ពួកគេ។

អគ្គរដ្ឋទូតរុស្ស៊ីប្រចាំសហភាពអឺរ៉ុប Vladimir Chizhov ចាត់ទុកការបន្តទណ្ឌកម្មពីសំណាក់អឺរ៉ុប គ្រាន់តែដើម្បីការពារការរួបរួមគ្នាក្នុងចំណោមសមាជិកអឺរ៉ុប ដែលកំពុងខ្វែងគំនិតគ្នាខ្លាំង។ លោកប្រាប់ទីភ្នាក់ងារព័ត៌មានរុស្ស៊ី TASS ថា រដ្ឋសមាជិកធំៗរបស់អឺរ៉ុប ចង់ឲ្យមានការលុបចោល ឬបន្ធូរបន្ថយទណ្ឌកម្មខ្លះ ប៉ុន្តែរដ្ឋតូចៗវិញ ចង់ឲ្យបន្តទណ្ឌកម្មទៀត។ ចុងក្រោយ ពួកគេក៏សម្រេចចិត្តបន្តទណ្ឌកម្ម ដើម្បីតែការរួបរួមរបស់ពួកគេ។

អគ្គរដ្ឋទូតរុស្ស៊ីរូបនេះបញ្ជាក់ថា រឿងនេះតែកើតឡើងជាដដែលរៀងរាល់៦ខែ ហើយក្រុមប្រឹក្សាអឺរ៉ុប ក៏តែងតែសម្រេចចិត្តផ្លូវការលើរឿងដូចគ្នាដែរ។ ចំណែកលក្ខខណ្ឌលម្អិតនៃទណ្ឌកម្ម គឺសម្រេចដោយគណៈកម្មាធិការតំណាងអចិន្ត្រៃយ៍អឺរ៉ុប។ លោកបន្តទៀតថា ពេលខ្លះទៅ អឺរ៉ុបមិនបើកកិច្ចប្រជុំពិភាក្សាអ្វីឡើយ ព្រោះរឿងបែបនេះ នឹងកើតឡើងដដែល ហើយសឹងក្លាយជាគោលដៅរបស់អឺរ៉ុបទៅហើយ។

២. អឺរ៉ុប និងអាមេរិក ដើរលើផ្លូវខុសគ្នាលើទំនាក់ទំនងជាមួយរុស្ស៊ី
ទាក់ទិននឹងការបន្តទណ្ឌកម្មនេះដែរ ប៉ូឡូញ ដែលជារដ្ឋសមាជិកអឺរ៉ុបប្រឈមមុខរុស្ស៊ីខ្លាំងជាងគេ ទាមទារឲ្យបន្តទណ្ឌកម្មរយៈពេលវែងលើរុស្ស៊ី ប៉ុន្តែអ៊ីតាលីឯណោះវិញ បែរជាស្នើឲ្យមានការស្ដារទំនាក់ទំនងពាណិជ្ជកម្មជាមួយរុស្ស៊ីទៅវិញ។ អ្វីដែលកាន់តែស្មុគស្មាញនោះ ការបន្តដាក់ទណ្ឌកម្មនេះ ក៏ជាសញ្ញាប្រាប់ប្រធានាធិបតីអាមេរិក ដូណាល់ ត្រាំ ដែលចង់ងាកទៅរកទំនាក់ទំនងជិតស្និទ្ធជាមួយរុស្ស៊ីនោះ។

តាំងពីអំឡុងពេលយុទ្ធនាការស្វែងរកសំឡេងឆ្នោតមក លោក ដូណាល់ ត្រាំ បានសន្យាស្ដារទំនាក់ទំនងជាមួយរុស្ស៊ី ដោយមិនសូវខ្វល់ពីការព្រួយបារម្ភរបស់អឺរ៉ុបឡើយ។ លោកទំនងជាចង់ដោះដៃពីអឺរ៉ុប ដែលលោកអះអាងថា ពឹងផ្អែកតែលើអាមេរិក និងចាប់ដៃរុស្ស៊ីវិញ។ នាពេលកន្លងមក ទាំងលោក ត្រាំ និងលោក ពូទីន សុទ្ធតែធ្លាប់លើកសរសើរគ្នាទៅវិញទៅមក និងសន្យាកសាងទំនាក់ទំនងថ្មីទៀតផង។

ចំណែកទំនាក់ទំនងជាអឺរ៉ុបវិញ គេមិនឃើញមានសញ្ញាល្អអ្វីឡើយ ហើយទំនាក់ទំនងផ្ទៃក្នុងសម្ព័ន្ធយោធាណាតូ ក៏មិនសូវស្រួលដែរ។ គេចាំបានថា លោកដូណាល់ ត្រាំ ធ្លាប់បានប្រកាសហើយថា លោកនឹងឲ្យប្រទេសដែលមានមូលដ្ឋានកងទ័ពអាមេរិក ត្រូវជួយចេញថ្លៃចំណាយតាមការសន្យារបស់ខ្លួន បើមិនចង់ឲ្យលោកដកទ័ពទេនោះ។ ការប្រកាសដូចនេះ ធ្វើឲ្យប្រទេសអឺរ៉ុបដែលកំពុងភ័យខ្លាចនឹងឥទ្ធិពលរុស្ស៊ី បារម្ភយ៉ាងខ្លាំង។

នៅឯកិច្ចប្រជុំកំពូលនៅថ្ងៃទី១៥ ខែធ្នូ បណ្ដាមេដឹកនាំអឺរ៉ុប ហាក់ប្រុងប្រយ័ត្នខ្លាំងលើការបន្តទណ្ឌកម្ម ដែលដូចជាផ្ទុយនយោបាយរបស់អាមេរិក។ អធិការតីអាល្លឺម៉ង់ Angela Merkel បញ្ជាក់ថា ការសម្រេចចិត្តរបស់អឺរ៉ុបនៅពេលនេះ គឺពឹងផ្អែកលើស្ថានការណ៍ជាក់ស្ដែង មិនមែនចង់ប្រឆាំងនយោបាយរបស់រដ្ឋបាលថ្មីប្រធានាធិបតីអាមេរិក ដូណាល់ ត្រាំ នោះឡើយ។ ឯប្រធានក្រុមប្រឹក្សាអឺរ៉ុបវិញក៏និយាយដែរថា វាដូចជាលឿនពេកហើយក្នុងវាយតម្លៃគោលនយោបាយអាមេរិកចំពោះរុស្ស៊ី៕