ជាតិ
អ្នកនាំពាក្យគណបក្សកាន់អំណាច ថាមន្ត្រីអាដហុកនិងមន្ត្រីគ.ជ.ប មិនអាចត្រូវបានដោះលែងទេ
× ភ្នំពេញ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា មន្ត្រីអាដហុក និងមន្ត្រីគ.ជ.ប ទំនងជាមិនអាចរួចខ្លួនពីការឃុំឃាំងនោះទេ ខណៈដែលសំណុំរឿងរបស់អ្នកទាំងនោះ កំពុងតែស្ថិតនៅក្រោមចំណាត់ការរបស់តុលាការ។ ប៉ុន្តែ មេធាវី អះអាងថា កូនក្តីរបស់ខ្លួន នៅតែអាចមានឱកាសក្នុងការដោះលែង ប្រសិនបើអ្នកនយោបាយមានឆន្ទៈពិតប្រាកដមែន។
ភាពតានតឹងនយោបាយនៅកម្ពុជាមានសភាពធូរស្រាលបន្តិច ក្រោយពីឯកឧត្តម កឹម សុខា អនុប្រធានគណបក្សសង្គ្រោះជាតិ និងលោកមេឃុំ ស៊ាង ចែត ត្រូវបានព្រះមហាក្សត្រ លើកលែងទោស តាមសំណើរបស់ប្រមុខរដ្ឋាភិបាល។ ការលើកលែងទោសដល់អ្នកទាំងពីរបាននាំឲ្យមានការសង្ឃឹមថា មន្ត្រីអាដហុកទាំង៤រូប និងមន្ត្រីគ.ជ.ប១រូប រួមទាំងសកម្មជនបក្សប្រឆាំងមួយចំនួនទៀត អាចនឹងមានឱកាសបានរួចខ្លួនពីការឃុំឃាំងដែរ ។
តែផ្ទុយទៅមកវិញ មកទល់ពេលនេះ មិនទាន់មានសញ្ញា/តម្រុយណាមួយដែលចង្អុលទៅរកលទ្ធភាពដោះលែងអ្នកតាំងប្រាំនាក់នេះនៅឡើយទេ នៅពេលដែលការប៉ុនប៉ងឲ្យមានការចរចារវាងគណបក្សកាន់អំណាចនិងគណបក្សប្រឆាំងលើបញ្ហានេះ នៅទ្រឹងស្ងៀមដដែល។
លោក សុខ ឥសាន អ្នកនាំពាក្យរបស់គណបក្សកាន់អំណាច បានបញ្ជាក់ថា ចាប់តាំងពីឯកឧត្តម កឹម សុខា និងលោកមេឃុំ ស៊ាង ចែត ទទួលបានការលើកលែងទោស រហូតមកដល់ពេលនេះ បក្សមានអាសនៈក្នុងរដ្ឋសភាទាំងពីរ មិនទាន់មានគម្រោងក្នុងការពិភាក្សាគ្នាពីបញ្ហាអ្វីមួយ នោះទេ។ ទាក់ទងនឹងសំណុំរឿងរបស់មន្ត្រីអាដហុក និងមន្ត្រីគ.ជ.ប លោកសុខ ឥសាន និយាយថា នាយករដ្ឋមន្ត្រី មិនអាចស្នើឲ្យព្រះមហាក្សត្រ លើកលែងទោសបានឡើយ ខណៈតុលាការ កំពុងតែចាត់ការលើសំណុំរឿងរបស់អ្នកទាំងនោះ។
អ្នកនាំពាក្យបក្សកាន់អំណាចរូបនេះ និយាយថាកុំឲ្យព្យាយាម យកសំណុំរឿងរបស់មន្ត្រីអាដហុក និងមន្ត្រីគ.ជ.ប ទៅប្រៀបធៀបនឹងសំណុំរឿងរបស់ឯកឧត្តម កឹម សុខា និងលោកមេឃុំ ស៊ាង ចែត ដែលការលើកលែងទោសរបស់ពួកគេ មានហេតុផលសមស្រប និងអាចទទួលយកបាន។ លោក និយាយថា មូលហេតុចម្បងដែលធ្វើឲ្យឯកឧត្តម កឹម សុខា និងលោក មេឃុំ ស៊ាង ចែត អាចទទួលបានការលើកលែងទោស គឺដោយសារតែអ្នកទាំងពីរ ត្រូវបានតុលាការជំនុំជម្រះរួចរាល់ហើយ ជាពិសេស មានការយោគយល់ខ្ពស់ពីសំណាក់ប្រមុខរដ្ឋាភិបាល ដែលបានស្នើទៅព្រះមហាក្សត្រ។
ចំណែកឯ សំណុំរឿងអ្នកផ្សេងទៀត កំពុងតែស្ថិតក្នុងសំណាត់ការរបស់តុលាការ ដូច្នេះ ប្រមុខរដ្ឋាភិបាល មិនអាចលូកដៃចូលបាននោះទេ។ លោក សុខ ឥសាន និយាយថា ថា៖ «សូមផ្តាំទៅអ្នកវិភាគ និងអ្នកមួយចំនួនទៀតថា មិនមែនឲ្យតែឯឧត្តម កឹម សុខា និងលោកស៊ាង ចែត រួចខ្លួន អ្នកដទៃទៀត ត្រូវតែរួចខ្លួនដែរនោះទេ។ សំណុំរឿងរបស់បុគ្គលម្នាក់ៗគឺខុសគ្នា ជាពិសេស អ្នកផ្សេងទៀត មិនទាន់កាត់ទោសទេ។ តែបើទោះបីជាតុលាការកាត់ទោសរួចក៏ដោយ ក៏មិនប្រាកដ ថា នាយករដ្ឋមន្ត្រីត្រូវតែស្នើឲ្យព្រះមហាក្សត្រ លើកលែងទោសដែរ គឺវាអាស្រ័យលើ ឆន្ទានុសិទ្ធិរបស់នាយករដ្ឋមន្ត្រី»។
សារព័ត៌មានថ្មីៗ មិនអាចទាក់ទងអ្នកនាំពាក្យរបស់គណបក្សប្រឆាំង ដើម្បីសុំការបកស្រាយជុំវិញការលើកឡើងរបស់លោក សុខ ឥសាន នោះទេ។
លោក សំ សុគង់ មេធាវី១រូប ក្នុងចំណោមមេធាវីទាំង៥រូប ដែលរួមគ្នាការពារក្តីឲ្យមន្ត្រីអាដហុក និងមន្ត្រីគ.ជ.ប យល់ស្របនឹងលោក សុខ ឥសាន ដែលអះអាងថា នាយករដ្ឋមន្ត្រី មិនអាចស្នើឲ្យព្រះមហាក្សត្រ លើកលែងទោស ខណៈសំណុំរឿងរបស់ពួកគេ កំពុងស្ថិតនៅក្រោមចំណាត់ការរបស់តុលាការ។ តែយ៉ាងណា លោក សំ សុគង់ នៅតែមើលឃើញផ្លូវវិជ្ជមាន ដែលអាចឲ្យកូនក្តីរបស់ខ្លួន រួចផុតពីការឃុំឃាំង ប្រសិនបើអ្នកនយោបាយ មានឆន្ទៈរួមគ្នា ក្នុងការគិតគូរពីរឿងនេះ។
លោកមេធាវីរូបនេះ និយាយថា កាលពីដើមខែធ្នូ ឆ្នាំ២០១៦ ចៅក្រមស៊ើបសួរ បានបិទការស៊ើបសួរលើមន្ត្រីអាដហុក និងមន្ត្រីគ.ជ.ប រួចហើយ រង់ចាំតែនីតិវិធីបន្ទាប់ ដែលគឺការចេញដីកាដំណោះស្រាយ។
បើតាមលោក សំ សុគង់ ដីកាដំណោះស្រាយ មាន២ គឺទី១ លើកលែងការចោទប្រកាន់ និងទី២ បញ្ជូនទៅជំនុំជម្រះ។ លោកពន្យល់បែបនេះថា៖ «ឥឡូវហ្នឹងសំណុំរឿង កំពុងតែស្ថិតក្នុងដៃរបស់ចៅក្រមស៊ើបសួរ ដូច្នេះ បើចៅក្រមស៊ើបសួរ រកភស្តុតាង ឬមូលហេតុ មិនឃើញ ដែលបញ្ជាក់ថា កូនក្តីខ្ញុំមានទោសនោះទេ នោះចៅក្រមស៊ើបសួរ អាចនឹងដោះលែង។ អ៊ីចឹង យើងនៅតែសង្ឃឹមថា ពួកគាត់ (មន្ត្រីអាដហុក និងមន្ត្រីគជប) អាចនឹងរួចខ្លួន ក្នុងដំណាក់កាលនៃស៊ើសសួរ បើអ្នកនយោបាយមានឆន្ទៈមែន»។
សូមបញ្ជាក់ថា អ្នកទាំង៥ បានជាប់ឃុំក្នុងពន្ធនាគារ ចាប់តាំងពីដើមខែឧសភា ឆ្នាំ២០១៦មកម្ល៉េះ។ បើតាមការចោទប្រកាន់របស់តុលាការ ពួកគេ សុទ្ធតែជាប់ពាក់ព័ន្ធនឹងសំណុំរឿងរបស់កញ្ញា ខុម ចាន់តារ៉ាទី ហៅស្រីមុំ ដែលត្រូវបានគេសង្ស័យថា មានទំនាក់ទំនងស្នេហាលួចលាក់ជាមួយនឹងឯកឧត្តម កឹម សុខា។ ចំពោះ មន្ត្រីអាដហុកទាំង៤រូប តុលាការ បានចោទពីបទ «សូកប៉ាន់សាក្សី»។ ចំណែកឯ លោក នី ចរិយា ដែលជាអគ្គលេខាធិការរងរបស់គ.ជ.ប ត្រូវបានចោទពីបទ «សមគំនិតក្នុងអំពើសូកបាន់សាក្សី»៕
Tag:
អាដហុក
គជប
មេធាវី
សុខ ឥសាន
© រក្សាសិទ្ធិដោយ thmeythmey.com