អ្នកនាំពាក្យ៖ សមត្ថកិច្ចបន្តតាមដានក្រុមអ្នកកាត់តរូបប្រមាថព្រះមហាក្សត្រ

ជាតិ

អ្នកនាំពាក្យ៖ សមត្ថកិច្ចបន្តតាមដានក្រុមអ្នកកាត់តរូបប្រមាថព្រះមហាក្សត្រ

09, Jan 2017 , 3:35 pm

រូបភាព

លោក ខៀវ សុភ័គ អ្នកនាំពាក្យក្រសួងមហាផ្ទៃ

ដោយ:

ភ្នំពេញ៖ ក្រសួងមហាផ្ទៃបានកំណត់មុខសញ្ញាជនកាត់រូបប្រមាថព្រះមហាក្សត្រហើយ ប៉ុន្តែសមត្ថកិច្ចពុំមានវិធានការចាប់ភ្លាមៗនោះទេ។ អ្នកនាំពាក្យក្រសួងមហាផ្ទៃលោក ខៀវ សុភ័គ បានឲ្យដឹងថា សមត្ថកិច្ចនៅតែតាមបន្តចាប់ខ្លួនអ្នកប្រព្រឹត្តបទល្មើសទាំងនោះ។

សមត្ថកិច្ចក្រសួងមហាផ្ទៃបានកំណត់មុខសញ្ញាជនដែលកាត់តរូបប្រមាថព្រះមហាក្សត្រដែលអ្នកប្រើប្រាស់បណ្តាញសង្គមហ្វេសប៊ុកមានគណនីជាភាសាថៃបានបង្ហោះរូបនោះហើយ។ នេះបើតាមការបញ្ជាក់របស់អ្នកនាំពាក្យក្រសួងមហាផ្ទៃ លោក ខៀវ សុភ័គ។

លោកនាយឧត្តមសេនីយ៍ បានបង្ហើបឲ្យដឹងថា ជនល្មើស ៣នាក់ដែលកាត់តរូបថតប្រមាថ ព្រះមហាក្សត្រខ្មែរនាំឲ្យប៉ះពាល់ដល់មុខមាត់ប្រទេសកម្ពុជាទាំងនោះ កំពុងរស់នៅរាជធានីភ្នំពេញ និងប្រទេសថៃ។

អ្នកនាំពាក្យក្រសួងមហាផ្ទៃរូបនេះ បានសង្កត់ធ្ងន់ថា៖«សមត្ថកិច្ចកំពុងតាមដានពួកគេ (ជនល្មើស) ហើយយើងឃើញថា ពួកគេបានលុបរូបនោះចោលវិញ។ ដូច្នេះ យើងពុំទាន់ធ្វើការឲ្យមានការភ្ញាក់ផ្អើលទេ យើងរង់ចាំពួកគេបង្ហោះរូបថតភ្លេចខ្លួន យើងចាប់ខ្លួនតែម្តង។ យើងជាជង់ដែលរង់ចាំគេជាកុកជានិច្ច »។

សមត្ថកិច្ចបានបើកការស៊ើបអង្កេតក្រោយពីអ្នកប្រើប្រាស់ហ្វេសប៊ុកម្នាក់គណនីសរសេរឈ្មោះជាអក្សរថៃបានបង្ហោះរូបកាត់តមួយសន្លឹកដែលប្រមាថព្រះមហាក្សត្រ ហើយដែលធ្វើឱ្យប្រជាពលរដ្ឋខ្មែរមួយចំនួនខឹងសម្បារ និងស្នើឱ្យសមត្ថកិច្ចចាប់ជននោះមកផ្តន្ទាទោសតាមច្បាប់។

មាត្រា ៧ នៃរដ្ឋធម្មនុញ្ញកម្ពុជា បានចែងថា ព្រះមហាក្សត្រទ្រង់ជាព្រះប្រមុខរដ្ឋមួយជីវិត។ អង្គព្រះមហាក្សត្រ មិនអាចនរណារំលោភបំពានបានឡើយ។ ប៉ុន្តែ ច្បាប់កំពូលមួយនេះមិនបានចែងពីការដាក់ទោសទណ្ឌលើជនណាដែលរំលោភបំពានអង្គព្រះមហាក្សត្រនោះទេ។

ខណៈសមត្ថកិច្ចកំពុងតាមដានជនល្មើសលោក ខៀវ សុភ័គ ពុំអាចអត្ថាធិប្បាយពីទោសពៃរិ៍ដែលជនល្មើសត្រូវប្រឈមដែរ លោកគ្រាន់និយាយថា វាជានីតិវិធីតុលាការ៕