ជាតិ
មេប៉ូលិសព្រមានចាប់មន្ត្រីនគរបាល ដែលប្រព្រឹត្តអំពើពុករលួយ ទៅACU
× ភ្នំពេញ ៖ អគ្គស្នងការនគរបាលជាតិលោក នេត សាវឿន ព្រមានចាប់បញ្ជូនមន្ត្រីនគរបាល ដែលប្រព្រឹត្តអំពើពុករលួយ ទៅអង្គភាពប្រឆាំងអំពើពុករលួយ (ACU) ដើម្បីចាត់វិធានការតាមផ្លូវច្បាប់។ នេះបើតាមអគ្គស្នងការនគរបាលជាតិ។
លោក នេត សាវឿន ទទួលបានសេចក្ដីរាយការណ៍ថា ប្រធាននាយកដ្ឋានមួយចំនួនបានកាត់របបថវិកាពីមន្ត្រីក្រោមឱវាទរបស់ខ្លួន ដូចជាកាត់របបប្រេងសាំង របបប្រាក់បេសកកម្ម និងការប្រាក់របបលើកងកម្លាំងនគរបាលចរាចរណ៍។ ជាពិសេសមានការដាក់កុងត្រូលចាំពួនស្ទាក់ផាកពិន័យយកប្រាក់ខុសច្បាប់ជាដើម។
ត្រង់ចំណុចនេះលោក នេត សាវឿន អះអាងថា លោកនឹងបើកការស៊ើបអង្កេតលើករណីទាំងនេះ ។ ហើយប្រសិនបើអគ្គស្នងការដ្ឋាននគរបាលជាតិ រកឃើញភស្តុតាងថា មន្ត្រីនគរបាលទាំងនោះបានប្រព្រឹត្តអំពើពុករលួយ យកប្រាក់ខុសច្បាប់ពីមន្ត្រីក្រោមឱវាទ និងការយកប្រាក់ខុសច្បាប់ពីប្រជាពលរដ្ឋពិតមែននោះ ពួកគេនឹងត្រូវចាប់បញ្ជូនទៅអង្គភាពប្រឆាំងអំពើពុករលួយ មុននឹងបន្តនីតិវិធីទៅតុលាការ ដើម្បីចាត់វិធានការតាមផ្លូវច្បាប់។
បន្ថែមពីលើនេះអគ្គស្នងការនគរបាលជាតិរូបនេះ ក៏បានណែនាំមន្ត្រីនគរបាលចរាចរណ៍ដែលប្រចាំការនៅដងផ្លូវ ត្រូវប្រើប្រាស់ឥរិយាបថ និងសម្ដីសមរម្យចំពោះប្រជាពលរដ្ឋ។ ជាពិសេសបញ្ឈប់សកម្មភាពទារប្រាក់ ឬទទួលប្រាក់សូកពីប្រជាពលរដ្ឋផងដែរ។ លោក នេត សាវឿន បញ្ជាក់ដូច្នេះថា៖«សម្រាប់បញ្ហានេះ បើនគរបាលធ្វើមិនបាន ហើយយើងរកឃើញភស្តុតាងនោះ(ទារប្រាក់តាមផ្លូវ) គឺត្រូវបញ្ជូនទៅតុលាការតែម្តង»។
កន្លងមកនគរបាលចរាចរណ៍ តែងតែទទួលបានប្រាក់ឧបត្ថម្ភខាងក្រៅច្រើនជាងគេ ដូចជា ប្រាក់ឧបត្ថម្ភប្រចាំខែពីសម្តេច ស ខេង , ប្រាក់ឧបត្ថម្ភពីការពិន័យ និងប្រាក់ឧបត្ថម្ភនានាបន្ថែមលើថវិកាប្រាក់បៀវត្សផងដែរ។ ប៉ុន្តែទង្វើមិនល្អរបស់មន្ត្រីនគរបាលទាំងនេះ នៅមិនទាន់មានការថមថយឡើយ។ នេះជាការបញ្ជាក់របស់លោក នេត សាវឿន៕
Tag:
នេត សាវឿន
មន្ត្រីនគរបាល
ACU
© រក្សាសិទ្ធិដោយ thmeythmey.com