ជាតិ
គណបក្សសង្គ្រោះជាតិឈានមួយជំហានទៅមុខទៀត ក្នុងការប៉ុនប៉ងបង្កើតទូរទស្សន៍
× ភ្នំពេញ៖ គណបក្សសង្គ្រោះជាតិ បានឈានទៅមុខមួយជំហានទៀតក្នុងការប៉ុនប៉ង បង្កើតទូរទស្សន៍សម្រាប់គណៈបក្សរបស់ខ្លួនឈ្មោះថាទូរទស្សន៍ព្រះអាទិត្យ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បាននិយាយថាគណៈបក្សបានទិញ និងទទួលបណ្ណកម្មសិទ្ធិដីជាផ្លូវការរួចហើយ ហើយពេលនេះកំពង់តែរង់ចាំការឆ្លើយតបរបស់អាជ្ញាធរទៅនឹងពាក្យស្នើសុំការអនុញ្ញាតដើម្បីបើកការដ្ឋានសាងសង់និងដំឡើងអង់តែន។
លោក យ៉ែម បុញ្ញឫទ្ធិ និយាយាថា៖«អ្វីដែលសំខាន់ គឺនៅពេលដែលមានអនុញ្ញាតឲ្យដំឡើងអង់ទែន និងបើកការដ្ឋាន។ យើង ត្រូវការពេលវេលាខ្លះ»។
លោក យ៉ែម បុញ្ញឫទ្ធិ បន្តទៀតថា ទីតាំង សម្រាប់ដំឡើងស្ថានីយ៍ទូរទស្សន៍ លែងជាបញ្ហាហើយ ដោយគណបក្សសង្គ្រោះជាតិ ទើបតែនឹងបានទិញដី មួយកន្លែង ប៉ុន្តែលោកមិនបានបញ្ជាក់ទីតាំងនិងតម្លៃរបស់វាទេ។
លោក ក៏មិនអាចបញ្ជាក់ឲ្យច្បាស់ផងដែរទេថាពេលណាទើបបង្កើតបានស្ថានីយ៍និងការផ្សាយទូរទស្សន៍នោះរួចរាល់។
កាលពីប៉ុន្មានខែមុន គណបក្សសង្គ្រោះជាតិ បានស្វែងទីតាំងសម្រាប់ការដំឡើងស្ថានីយ៍ទូរទស្សន៍ ឃើញហើយ ដែលស្ថិតនៅក្នុងក្រុងតាខ្មៅ។ ប៉ុន្តែ អាជ្ញាធរ មិនអនុញ្ញាតិ ឲ្យគណបក្សសង្គ្រោះជាតិ ដំឡើងស្ថានីយទូរទស្សន៍ឡើយ ដោយលើកហេតុផលថា ប្រជាពលរដ្ឋមួយចំនួន មិនពេញចិត្ត ហើយតវ៉ាចំពោះការបង្កើតស្ថានីយ៍ទូរទស្សន៍ក្នុងតំបន់នោះ។ ក្រោយមក គណបក្សសង្គ្រោះជាតិ ក៏បន្តស្វែងរកទីតាំងថ្មី។
គណបក្សសង្គ្រោះជាតិ អះអាងថា ការបង្កើតទូរទស្សន៍នេះ ត្រូវចំណាយទឹកប្រាក់ប្រមាណជា៣លានដុល្លារឯណោះ៕
Tag:
Suntv
CNRP
យ៉ែម បុញ្ញឫទ្ធិ
© រក្សាសិទ្ធិដោយ thmeythmey.com