អន្តរជាតិ
នយោបាយអន្តរជាតិ
បន្ទាប់ពីស្ងៀមស្ងាត់១០ថ្ងៃ អូបាម៉ា ចេញមុខរិះគន់វិធានការហាមប្រជាជនប្រទេសម៉ូស្លីមរបស់ ត្រាំ
×![]()
អតីតប្រធានាធិបតីអាមេរិកលោកបារ៉ាក់ អូបាម៉ា បញ្ជាក់ថាលោកជំទាស់រាល់ការរើសអើងដែលពឹងផ្អែកលើសាសនា។ ហើយមេដឹកនាំអាមេរិករូបនេះមានទំនុកចិត្តចំពោះសកម្មភាពប្រជាជនអាមេរិកដែលនាំគ្នាប្រឆាំងវិធានការរបស់ប្រធានាធិបតី ដូណាល់ ត្រាំ ប្រឆាំងជនភៀសខ្លួននិងជនអន្តោប្រវេសន៍នោះ។
ក្រោយរក្សាភាពស្ងៀមស្ងាត់បន្ទាប់ចាកចេញពីតំណែងប្រហែល ១០ថ្ងៃ លោក បារ៉ាក់ អូបាម៉ា ចាប់ផ្តើមចេញមុខរិះគន់ប្រធានាធិបតី ដូណាល់ ត្រាំ ពាក់ព័ន្ធការដាក់បទបញ្ជាហាមឃាត់ប្រជាជនមកពីប្រទេសម៉ូស្លីម ៧ និងឈប់ទទួលជនភៀសខ្លួន។
យោងតាមសេចក្តីថ្លែងការណ៍មួយរបស់អ្នកនាំពាក្យលោក បារ៉ាក់ អូបាម៉ា លោក Kevin Lewis ដែលត្រូវបានបង្ហោះតាមប្រព័ន្ធទំនាក់ទំនងសង្គម Twitter លោក បារ៉ាក់ អូបាម៉ា មានទំនុកចិត្តចិត្តចំពោះសកម្មភាពរួបរួមគ្នារបស់ប្រជាជនអាមេរិកក្នុងការតវ៉ានិងជំទាស់ចំណាត់ការរបស់ប្រធានាធិបតី ដូណាល់ ត្រាំ។
Frm Pres @BarackObama is heartened by the level of engagement taking place in communities around the country. pic.twitter.com/X5Fk3xRDEX — Kevin Lewis (@KLewis44) January 30, 2017
សេចក្តីថ្លែងការណ៍នេះបានបញ្ជាក់ដូច្នេះ៖«ប្រជាជនអាមេរិកអនុវត្តសិទ្ធិដែលការពារដោយរដ្ឋធម្មនុញ្ញក្នុងការជួបជុំ, រៀបចំ និងធ្វើយ៉ាងណាបង្ហាញទុក្ខកង្វល់របស់ខ្លួនឲ្យអ្នកដែលពួកគេបោះឆ្នោតឲ្យបានដឹង សុទ្ធសឹងជាអ្វីដែលយើងចង់ឃើញនៅពេលដែលតម្លៃអាមេរិកស្ថិតនៅក្នុងគ្រោះថ្នាក់»។
អ្នកនាំពាក្យខាងលើក៏បានបន្តទៀតថា ទោះជាក្នុងកាលៈទេសៈណាក៏ដោយ លោក បារ៉ាក់ អូបាម៉ា ពិតជាមិនឯកភាពឡើយចំពោះរាល់ការរើសអើងទាំងឡាយណាដែលពឹងផ្អែកសាសនានិងជំនឿ។
នៅក្នុងសន្និសីទសារព័ត៌មានចុងក្រោយរបស់ខ្លួន លោកបារ៉ាក់ អូបាម៉ា បានបង្ហើបថា លោកនឹងផ្តល់ការគោរពដល់ប្រធានាធិបតីថ្មី ប៉ុន្តលោកសង្កត់ធ្ងន់ថា លោកមិនស្ទាក់ស្ទើក្នុងការនិយយប្រឆាំងទេបើសិនជាលោកគិតថា តម្លៃស្នូលរបស់អាមេរិកស្ថិតនៅក្នុងស្ថានភាពគ្រោះថ្នាក់ ជាពិសេសមានការរើសអើងមានលក្ខណៈជាប្រព័ន្ធ។
សូមបញ្ជាក់ថា លោក ដូណាល់ ត្រាំ បានសម្រេចចុះហត្ថលេខាលើបទបញ្ជាប្រតិបត្តិរបស់ខ្លួនកាលពីសប្តាហ៍មុន ដើម្បីហាមប្រាមប្រជាជនមកពីប្រទេសម៉ូស្លីម ៧លើពិភពលោកចូលទឹកដីអាមេរិក និងឈប់ទទួលយកជនភៀសខ្លួនបណ្តោះអាសន្ន។ការសម្រេចនេះបានបង្កឲ្យមានប្រតិកម្មនិងការខឹងសម្បារខ្លាំងពីសំណាក់ប្រជាជន សកម្មជនសិទ្ធិមនុស្ស និងបណ្តាប្រទេសជាច្រើនលើពិភពលោក។ ទោះជាបែបណាក៏ដោយ គេសង្កេតឃើញមានការប្រៀបធៀបចំណាត់ការហាមឃាត់ប្រជាជនមកពីប្រទេសម៉ូស្លីមចូលអាមេរិក ទៅនឹងចំណាត់ការបស់លោក បារ៉ាក់ អូបាម៉ា ដែលហាមប្រជាជនអ៊ីរ៉ាក់ចូលទឹកដីអាមេរិក ៦ខែ កាលពីឆ្នាំ ២០១១ ដែរ។ គេថា ចំណាត់ការនេះគ្មានអ្វីខុសគ្នាឡើយ៕
Tag:
បារ៉ាក់ អូបាម៉ា
ដូណាល់ ត្រាំ
© រក្សាសិទ្ធិដោយ thmeythmey.com
