អន្តរជាតិ
នយោបាយអន្តរជាតិ
អ្នកការទូតជើងចាស់អាមេរិកប្រាប់ ដូណាល់ ត្រាំ ថា«ដំបៅមិនឈឺ កុំយកឈើរុក»
×
អតីតមន្ត្រីការទូតអាមេរិក លោក Christopher Hill បានផ្ដល់យោបល់ឲ្យប្រធានាធិបតី ដូណាល់ ត្រាំ ដែលកំពុងរងការរិះគន់រឿងហាមឃាត់លំហូរជនអន្តោប្រវេសន៍មកពីប្រទេសឥស្លាមចំនួន៧ ក៏ដូចជាធ្វើឲ្យទំនាក់ទំនងជាមួយចិនរង្គោះរង្គើដោយសារតែជំហរមិនគោរពនយោបាយចិនតែមួយលើបញ្ហាកោះតៃវ៉ាន់។ អតីតមន្ត្រីការទូតរូបនេះ ក៏បានណែនាំលោក ត្រាំ ឲ្យបើកចំហចិត្តជុំវិញបញ្ហាអន្តរជាតិ និងមិនត្រូវធ្វើអ្វីហួសហេតុលើសពីការសន្យាពេលយុទ្ធនាការស្វែងរកសំឡេងឆ្នោតដែរ។
អ្នកការទូតជើងចាស់ Christopher Hill បានប្រាប់ឲ្យរដ្ឋបាលថ្មីនៃប្រធានាធិបតី ដូណាល់ ត្រាំ បើកចិត្តឲ្យទូលាយពេលដោះស្រាយបញ្ហាការបរទេសសំខាន់ៗ និងមិនត្រូវមានជំហរដាច់ខាតខ្លាំងលើគោលនយោបាយដែលលើកឡើងកាលពីមុនបោះឆ្នោតដែរ។ អតីតមន្ត្រីការទូតរូបនេះ លើកឡើងដូចនេះ ស្របពេលដែលគោលនយោបាយការបរទេសនៃប្រធានាធិបតី ត្រាំ ធ្វើឲ្យរដ្ឋដទៃឃ្នើសចិត្តយ៉ាងខ្លាំង ព្រោះលោកផ្លាស់ប្ដូរជំហរដែលអាមេរិកធ្លាប់អនុវត្តកន្លងមក។
ក្នុងកិច្ចសម្ភាសផ្តាច់មុខជាមួយទូរទស្សន៍ Channel News Asia អ្នកការទូតចាស់វស្សាធ្លាប់បម្រើការអស់ពេលបីទសវត្សរ៍រូបនេះ ក៏បានព្រមានរដ្ឋបាលថ្មីដែរថា អាមេរិក មិនមែនចេះតែអាចចង់ដោះស្រាយបញ្ហាពិភពលោកតាមចិត្តរបស់ខ្លួន។ លោកនិយាយថា៖ «ជាប្រធានាធិបតីអាមេរិក អ្នកមិនអាចជ្រើសរើសតាមចិត្តចង់ ដូចរើសម្ហូបលើមីនុយឡើយ។ អ្នកមិនអាចដោះស្រាយនៅមជ្ឈិមបូព៌ា ហើយទុកចោល រួចទៅដោះស្រាយបញ្ហាមួយទៀតដែរ»។
ចាប់តាំងពីកាន់តំណែងកាលពីខែមករាមកនោះ លោកប្រធានាធិបតី ត្រាំ បានផ្លាស់គោលនយោបាយការបរទេសរបស់អាមេរិក និងចេញបទបញ្ជាជាច្រើនដើម្បីផលប្រយោជន៍អាមេរិក។ លោកបានចេញបញ្ជាឲ្យចាប់ផ្ដើមគម្រោងសាងសង់ជញ្ជាំងតាមបណ្ដោយព្រំដែនជាមួយម៉ិកស៊ិក, ហាមឃាត់លំហូរជនអន្តោប្រវេសន៍មូស្លីមចូលទឹកដីអាមេរិក។ ជាពិសេសនោះ លោកថែមទាំងហ៊ាននិយាយទូរសព្ទជាមួយប្រធានាធិបតីតៃវ៉ាន់ ក៏ដូចជាគំរាមឈប់អនុវត្តនយោបាយចិនតែមួយទៀតផង។
លោក Hill ដែលធ្លាប់ជាមន្ត្រីការទូតក្រោមរដ្ឋបាលលោក ប៊ីល គ្លីនតុន, ចច ដាប់ប៊ែលយូ ប៊ូស និងលោក បារ៉ាក់ អូបាម៉ា ក៏បានប្រាប់ឲ្យលោក ត្រាំ ប្រយ័ត្នប្រយែងឲ្យបានច្រើន ខណៈដែលលោកព្យាយាមផ្លាស់ប្ដូរស្ថានការណ៍បច្ចុប្បន្ននៃទំនាក់ទំនងអាមេរិក-ចិន-តៃវ៉ាន់នោះ។ លោកបន្ថែមថា លោក ត្រាំ នឹងរកឃើញថា មានបញ្ហាជាច្រើន ដែលត្រូវដោះស្រាយឲ្យបានឆាប់ តែលោកក៏មិនត្រូវប៉ះពាល់រឿងមួយ (កោះតៃវ៉ាន់) ដែលមិនមានបញ្ហាអ្វីសោះនៅពេលនេះ។
គោលនយោបាយចិនតែមួយ ដែលអាមេរិកអនុវត្តចាប់តាំងពីទទួលស្គាល់ក្រុងប៉េកាំងជាតំណាងតែមួយរបស់ចិន ស្ថិតលើមាត់ជ្រោះ ក្រោយលោក ត្រាំ ទាមទារឲ្យចិនធ្វើសម្បទានខ្លះទៅឲ្យអាមេរិក ជាថ្នូរនឹងការគោរពនយោបាយនេះបន្តទៀត។ ប៉ុន្តែលោក Hill បាននិយាយការពារនយោបាយនេះ ព្រោះអាមេរិកនៅតែអាចបន្តទំនាក់ទំនងជាមួយតៃវ៉ាន់ ទន្ទឹមគ្នានឹងទំនាក់ទំនងជាមួយចិន។ លោកចាត់ទុករឿងនេះ ជាស្ថានភាពដែលមិនគួរធ្វើឲ្យខូចខាតឡើយ ឬបើដំបៅមិនឈឺ កុំយកឈើរុក៕
Tag:
អាមេរិក
Christopher Hill
ដូណាល់ ត្រាំ
© រក្សាសិទ្ធិដោយ thmeythmey.com