ជាតិ
ពិធីបង្កក់កូន ៖ សុំដូនតាទទួលស្គាល់សមាជិកថ្មី និងខមាទោសយាយម៉ប
×
ពិធីកាត់សក់បង្កក់ឆ្មប ដែលអ្នកស្រុកអង្គរទម្លាប់ហៅយ៉ាងខ្លីថា បង្កក់កូន តាមពិតទៅជាពិធីដែលគេធ្វើឡើងដើម្បីសុំខមាទោស និងថ្លែងអំណរគុណចំពោះយាយម៉ប (ឆ្មប) ដែលបានជួយខ្នះខ្នែងទាំងយប់ព្រលប់ ក្នុងពេលឆ្លងទន្លេ។ មិនតែប៉ុណ្ណោះ ពិធីនេះក៏ធ្វើឡើងដើម្បីសែនដូនតាសុំឲ្យទទួលស្គាល់កូនចៅដែលទើបកើតមក បានរួមរស់សុខសប្បាយជាមួយសហគមន៍របស់ខ្លួនផង។
អ្នកនៅតំបន់អង្គរសព្វថ្ងៃ ទោះបីជាបានវិវត្តពីការឆ្លងទន្លេនៅតាមផ្ទះសម្បែង ទៅឆ្លងទន្លេនៅមន្ទីរពេទ្យដូចតំបន់ទូទៅក្តី ក៏នៅរក្សាទំនៀមកាត់សក់បង្កក់ឆ្មបដដែល។ អ្នកអង្គរបានអញ្ជើញស្ត្រីចំណាស់មួយរូប ដែលធ្លាប់មានមុខរបរជាយាយម៉បមកបំពេញកិច្ចនេះ។ ពុំមានកិច្ចពិធីអ្វីច្រើនទេ គេធ្វើត្រឹមតែមួយព្រឹកប៉ុណ្ណោះ ហើយបើពិនិត្យឲ្យដិតដល់ទៅ ចំណុចសំខាន់នៃពិធីគឺប្រហែល១ម៉ោងប៉ុណ្ណោះ។ ក្រៅពីនោះ មានតែការរៀបចំគ្រឿងរណ្តាប់ និងលៀងភ្ញៀវដែលមកចូលរួមតាមការអញ្ជើញរបស់សាមីពិធី។
គ្រឿងរណ្តាប់សំខាន់ដែលគេរៀបចំសម្រាប់ពិធីនេះមាន គ្រឿងស្លាធម៌បាយសីពីរថាស មួយថាសសម្រាប់អាចារ្យ និងមួយថាសទៀតសម្រាប់យាយម៉ប។ គ្រឿងរណ្តាប់ទាំងពីរថាសមិនមានអ្វីប្លែកគ្នាទេ ឃើញលើសតែថាសយ៉ាយម៉បបន្តិចត្រង់មាន កូនពានមួយដាក់អំបោះក្រហម កន្ត្រៃកាត់សក់ ស្និត ឡាមកោរសក់... សម្រាប់យាយម៉បធ្វើពិធីដូចជាកាត់សក់ កោរសក់ និងសង្កត់ព្រលឹងទារក។
ក្រោយជួបជុំគ្នា អាចារ្យមួយរូបសូត្រប្រកូកប្រកាសហៅអស់ព្រលឹងដូនតាក្នុងភូមិស្រុក មកជួបជុំសោយសំណែនសែនព្រែនដែលគេរៀបចំថ្វាយមួយលើកជាពីរលើករហូតដល់បីលើក។ ពាក្យប្រកាសនេះ ក៏សុំឲ្យដូនតាជួយទទួលស្គាល់ទារកដែលជាសមាជិកថ្មីនៃគ្រួសារ ហើយសុំឲ្យជួយជូនពរសព្ទសាធុការថែរក្សាការពារដល់ទារក និងក្រុមគ្រួសារ។ ក្រោយពីនេះ ស្ត្រីចំណាស់ដែលត្រូវបានអញ្ជើញជាយាយម៉ប ក៏ធ្វើពិធីកាត់សក់ ឈូសមាត់ ដាប់ធ្មេញ និងនិយាយជូនពរផ្សេងៗដល់ទារក។
ពិធីរបៀបនេះ ប្រហែលនៅមានតិចតួចនៅតំបន់ផ្សេង ប៉ុន្តែអ្នកអង្គរនៅតែបន្តថែរក្សារហូតដល់សព្វថ្ងៃ។ អាចថាអង្គរជាតំបន់វប្បធម៌ដ៏សម្បូរបែបក៏បាន ដោយសារអ្នកស្រុកនេះ នៅរក្សាទំនៀមរបៀបនេះច្រើនណាស់ ដូចជា ពិធីហៅព្រលឹង ពិធីឡើងអ្នកតា ពិធីលៀងមេមត់ ពិធីហៅទឹកភ្លៀង។ល។ ហើយក៏ដោយសារភាពរស់រវើកនៃប្រពៃណីដូនតានេះហើយ ទើបអ្នកស្រាវជ្រាវជាច្រើនតែងហៅរមណីយដ្ឋានអង្គរថា ជាមរតករស់ ឬជាបេតិកភណ្ឌមានជីវិត៕
អត្ថបទ៖ លោក សេន សែត
Tag:
ពិធីបង្កក់កូន
អ្នកស្រុកអង្គរ
© រក្សាសិទ្ធិដោយ thmeythmey.com