ប្រធានាធិបតីអាមេរិក ដូណាល់ ត្រាំ សង្ឃឹមក្រសួងយុត្តិធម៌អាមេរិកនឹងឈ្នះបណ្តឹងនៅឧទ្ធរណ៍ដែលតទល់នឹងការសម្រេចរបស់ចៅក្រោមតុលាការសហព័ន្ធដែលបានព្យួរការអនុវត្តបទបញ្ជាហាមប្រជាជនម៉ូស្លីម ៧ប្រទេសនោះបណ្តោះអាសន្នសិន។ ក្រៅពីនេះប្រធានាធិបតីដែលកាន់អំណាចនីតិប្រតិបត្តិផ្តាច់មុខនោះ បន្តវាយប្រហារលើចៅក្រមដែលមានតួនាទីអនុវត្តអំណាចយុត្តាធិការដែលជាអំណាចដាច់ដោយឡែកនោះ។ យ៉ាងណាមិញ ដល់ថ្ងៃអាទិត្យនេះតុលាការឧទ្ធរណ៍បានសម្រេចទាត់ចោលបណ្តឹងតវ៉ារបស់ក្រសួងយុត្តិធម៌ ដោយមិនអនុញ្ញាតឲ្យអនុវត្តបទបញ្ជា ប្រធានាធិបតីឡើងវិញឡើយ។
ក្រសួងយុត្តិធម៌អាមេរិកប្តឹងទៅឧទ្ធរណ៍ ហើយឈានទៅឈ្នះបណ្តឹងប្រឆាំងការសម្រេចរបស់ចៅក្រម James Robart ដែលព្យួរការអនុវត្តបទបញ្ជាហាមប្រជាជមកពីប្រទេសម៉ូស្លីមចំនួន ៧ កាលពីថ្ងៃសៅរ៍នោះ។ នេះជាការបញ្ជាក់របស់ប្រធានាធិបតី ដូណាល់ ត្រាំ។
«យើងនឹងឈ្នះ។ ដើម្បីសុវត្ថិភាពប្រទេសយើង យើងនឹងឈ្នះ»។ នេះជាការបញ្ជាក់របស់លោក ដូណាល់ ត្រាំ ត្រូវបានស្រង់ដោយទីភ្នាក់ងារព័ត៌មាន Reuters ក្នុងពេលដែលលោកជួបជាមួយអ្នកសារព័ត៌មាននៅរមណីយដ្ឋាន Palm Beach នារដ្ឋ Florida។
ប៉ុន្តែគួរឲ្យសោកស្តាយ អ្វីដែលលោក ដូណាល់ ត្រាំ បានប្រកាសនោះមិនអាចកើតឡើងឡើយ។ មកដល់ថ្ងៃអាទិត្យទី ៥កុម្ភៈនេះ សាលាឧទ្ធរណ៍អាមេរិកបានសម្រេចបដិសេធចោលបណ្តឹងទាស់របស់ក្រសួងយុត្តិធម៌អាមេរិកចំពោះសេចក្តីសម្រេចរបស់ចៅក្រម James Robart។ នេះមានន័យថា ការព្យូួរការអនុវត្តបទបញ្ជារបស់លោក ដូណាល់ ត្រាំ នៅតែបន្តទៅមុខទៀតទូទាំងសហរដ្ឋអាមេរិក។
១. ដូណាល់ ត្រាំ រិះគន់ចៅក្រម James Robart ឥតឈប់ឈរ
ចៅក្រមតុលាការសហព័ន្ធលោក James Robart ប្រចាំក្រុង Seattle នារដ្ឋវ៉ាស៊ីនតោន បានសម្រេចដាក់ព្យូរបទបញ្ជាហាមប្រជាជនមកពីប្រទេស ៧ របស់ប្រធានាធិបតី បណ្តោះអាសន្នសិន ហើយលោកបានលើកឡើងពីធម្មនុញ្ញភាពនៃបទបញ្ជានេះ។ គេស្គាល់ថា លោក Robart ចៅក្រមដែលតែងតាំងឡើយដោយប្រធានាធិបតី George W. Bush ដោយលោកជាមនុស្សកណ្តាល ស្រឡាញ់ភាពត្រឹមត្រូ និងយុត្តិធម៌ និងមិនមាននិន្នាការទៅរកក្រុមសាធារណរដ្ឋឬទៅខាងប្រជាធិបតេយ្យដែរ។
ចាប់ពីថ្ងៃសៅរ៍ទី ៤ កុម្ភៈមិ្សលមិញ លោក ដូណាល់ ត្រាំនៅមិនសុខបក់មិនល្ហើយ ប្រើប្រាស់គណនី Twitter របស់ខ្លួនវាយប្រហារចៅក្រមសហព័ន្ធរូបនេះឥតឈប់។
ក្រោយចៅក្រមសម្រេច លោក ត្រាំ បានសរសេរបង្ហោះថា៖« ការសម្រេចរបស់ចៅក្រុម ដែលមានគោលដៅទាញការអនុវត្តច្បាប់ចេញឲ្យឆ្ងាយពីប្រទេសយើង គឺជារឿងមួយដែលមិនសមហេតុផល ហើយវានឹងបរាជ័យ»។ ត្រាំ បានបន្ថែមថា វិធានការដ៏តឹងរ៉ឹងរបស់ខ្លូននេះជារឿងដែលមិនអាចខ្វះបានដើម្បីការពារសន្តិសុខនិងសុវត្ថិភាពប្រជាជនអាមេរិក។
មិនទាន់អស់ចិត្ត ដូណាល់ ត្រាំ ត្រឡប់មកជាថ្មីទៀតដោយសរសេរថា ការសម្រេចរបស់ចៅក្រមជាការបើកផ្លូវឲ្យក្រុមភេរវជន ដែលជាក្រមមិនគិតប្រយោជន៍អាមេរិក។ លោកបន្តថាក្រុមមនុស្សអាក្រក់ៗកំពុងរីករាយដោយឃើញការសម្រេចនេះ។
២. លោក ត្រាំ ធ្វើឲ្យប្រព័ន្ធ«Check and Balance» រង្គោះរង្គើរ
យ៉ាងណាក៏ដោយចុះ អ្នកជំនាញមួយចំនួនចាប់ផ្តើមក្រឡេកមើលសម្តីនិងសកម្មភាពរបស់លោក ដូណាល់ ត្រាំ ដែលប្រឆាំងនឹងចៅក្រមដែលអនុវត្តអំណាចយុត្តាធិការអាមេរិកនោះ។គេថា វាប៉ះពាល់ដល់ស្ថាប័នដែលគេបង្កើតឡើងមកដើម្បីធានាការត្រួតពិនិត្យការប្រើប្រាស់អំណាចនៅសេតវិមាន និងសភាអាមេរិកឲ្យបានត្រឹមត្រូវ។ ហើយវាជាមូលដ្ឋានគ្រឹះនៃប្រជាធិបតេយ្យដូចគ្នា។
សូមបញ្ជាក់បន្តិចថា រដ្ឋធម្មនុញ្ញអាមេរិកចែងច្បាស់ពីការបែងចែកអំណាចរវាងស្ថាប័នបីមានស្ថាប័នយុត្តាធិការ,ស្ថាប័ននីតិប្រតិបត្តិ និងបញ្ញត្តិនោះ ហើយគ្មានស្ថាប័នមួយណាមានអំណាចច្រើនជាង និងអាចជ្រៀតជ្រែកទៅវិញទៅមកបានឡើយ។ ស្ថាប័នយុត្តាធិការ,ស្ថាប័នប្រតិបត្តិនិងនីតិបញ្ញត្តិមានសិទ្ធិ, អំណាច និងឯករាជ្យរៀងៗខ្លួនដើម្បីបំពេញការងារនិងទទួលខុសត្រូវចំពោះតួនាទីខ្លួន។
ពាក់ព័ន្ធបញ្ហានេះដែរ គេក៏មើលឃើញថា សំដីសំដៅអសុរោះនិងការបន្តវាយប្រហាររបស់លោក ដូណាល់ ត្រាំ ដាក់ចៅក្រមអាមេរិក កំពុងបង្កើតបញ្ហាសម្រេចការតែងតាំងរដ្ឋអាជ្ញាប្រចាំក្រសួងយុត្តធម៌ និងការឈានទៅតែងតាំងចៅក្រុមតុលាការកំពូលថ្មីនោះ។ វាប្រាកដណាស់ថា វានឹងមានការលំបាកសម្រាប់ប្រធានាធិបតីក្នុងការទាមទារឲ្យតុលាការគោរពអំណាចលោក នៅពេលដែលលោកមិនគោរពអំណាចតុលាការនោះ៕