អន្តរជាតិ
នយោបាយអន្តរជាតិ
របបយោធាថៃយក «ថ្ងៃនៃក្ដីស្រឡាញ់ ១៤ កុម្ភៈ»ដើម្បីចរចាផ្សះផ្សាជាតិ
× រដ្ឋាភិបាលយោធាថៃ នឹងចាប់ផ្ដើមការពិភាក្សាស្ដីពីការផ្សះផ្សាជាតិជាមួយអ្នកនយោបាយនៅថ្ងៃទី១៤ ខែកុម្ភៈ ដែលជាថ្ងៃតំណាងឲ្យក្ដីស្រឡាញ់។ អ្នកនាំពាក្យក្រសួងការពារជាតិថៃ និយាយថា រដ្ឋាភិបាលកំណត់យកថ្ងៃទី១៤ នេះ ដើម្បីឆ្លៀតប្រើឱកាសនេះបង្ហាញការរួបរួមគ្នាក្នុងចំណោមអ្នកនយោបាយដឹកនាំប្រទេស និងដោះស្រាយវិបត្តិនយោបាយក្នុងស្រុកដែលអូសបន្លាយអស់ពេលជាច្រើនឆ្នាំមកហើយនោះ។
អ្នកនាំពាក្យក្រសួងការពារជាតិថៃ លោកឧត្តមសេនីយ៍ Kongcheep Tantrawanit បានប្រកាសពីកាលបរិច្ឆេទនៃការពិភាក្សាផ្សះផ្សាជាតិជាមួយអ្នកនយោបាយ ដែលនឹងត្រូវធ្វើនៅថ្ងៃទី១៤ ខែកុម្ភៈ ចំថ្ងៃនៃថ្ងៃស្រឡាញ់តែម្ដង។ រដ្ឋាភិបាលយោធា ក៏ត្រៀមប្រធានបទចំនួន១០ ដើម្បីយកទៅពិភាក្សាជាមួយអ្នកនយោបាយចម្រុះបក្ស សំដៅរកវិធីសាស្ត្រយ៉ាងណាសម្រេចឲ្យការរួបរួមជាតិ ដែលនៅបែកបាក់នៅឡើយ។
លោកឧត្តមសេនីយ៍ Kongcheep បានប្រកាសដូចនេះ បន្ទាប់ពីកិច្ចប្រជុំលើកទី១ នៃគណៈកម្មាធិការផ្សះផ្សាជាតិ នៅថ្ងៃទី៩ ខែកុម្ភៈ ដែលដឹកនាំដោយឧបនាយករដ្ឋមន្ត្រីលោកឧត្តមសេនីយ៍ Prawit Wongsuwon ។ ឧត្តមសេនីយ៍ Prawit បាននិយាយក្នុងកិច្ចប្រជុំនេះថា កិច្ចព្រមព្រៀងដែលសម្រេចបាន នឹងមិនចាំបាច់ចុះហត្ថលេខាឡើយ តែអ្នកនយោបាយទាំងអស់ ត្រូវតែមានជំហរច្បាស់លាស់លើការផ្សះផ្សាជាតិ និងសុខដុមរមនីយកម្មសង្គម។
កាសែតបាងកកប៉ុស្តិ៍ផ្សាយថា កិច្ចពិភាក្សាថ្ងៃទី១៤ នឹងមិនមានវត្តមានយោធាក្នុងការព្រមព្រៀងណាមួយឡើយ បើទោះជាខាងបក្សនយោបាយទាមទារឲ្យមានការចូលរួមពីសំណាក់កងទ័ពក៏ដោយ។ នេះក៏ព្រោះតែរដ្ឋប្រហារខែឧសភា ឆ្នាំ២០១៤ បានរួមចំណែកតិច ឬច្រើន ក្នុងការធ្វើឲ្យស្ថានការណ៍នយោបាយក្នុងប្រទេស មកដល់ចំណុចនេះ។ លោកឧបនាយករដ្ឋមន្ត្រី Prawit បញ្ជាក់ថា ដោយសារនឹងមិនមានរដ្ឋប្រហារម្ដងទៀត យោធាក៏មិនចាំបាច់ចូលរួមអ្វីដែរ។
គណបក្សនយោបាយប្រហែល៧០ ដែលចុះឈ្មោះនៅគណៈកម្មការបោះឆ្នោត នឹងត្រូវហៅមកជួបគណៈកម្មាធិការផ្សះផ្សាជាតិ ដើម្បីសាកសួរយោបល់លើការបង្រួបបង្រួមជាតិ។ មិនតែប៉ុណ្ណោះ ក្រសួងការពារជាតិ នឹងរៀបចំកិច្ចពិភាក្សាតុមួយ ដោយមានមន្ត្រីយោធា១០នាក់ ជួបជាមួយតំណាង១០នាក់របស់បក្សនយោបាយ។ អ្នកនាំពាក្យខាងលើនិយាយថា គណៈកម្មាធិការផ្សះផ្សាជាតិ នឹងជួបគណបក្សនយោបាយទីមួយនៅថ្ងៃទី១៤ ខែកុម្ភៈ។
អ្នកនយោបាយទាំងនោះ ក៏ត្រូវបានស្នើឲ្យផ្ដល់យោបល់លើវិធីសាស្ត្រដោះស្រាយជម្លោះដោយសន្តិវិធី, ការដោះស្រាយការបែងចែកក្នុងសង្គម អយុត្តិធម៌ ព្រមទាំងជួយជំរុញការបង្រួបបង្រួមជាតិ និងប្រយុទ្ធប្រឆាំងអំពើពុករលួយទៀត។ រដ្ឋាភិបាលថៃ នឹងសុំយោបល់ពីអ្នកនយោបាយដើម្បីការកែទម្រង់ជាតិ និងយុទ្ធសាស្ត្រជាតិ២០ឆ្នាំ ផងដែរ។ មិនតែប៉ុណ្ណោះ របបយោធាក៏បានបង្កើតអនុគណៈកម្មាធិការផ្សេងទៀតដើម្បីប្រមូលយោបល់ទាំងអស់ ក្នុងការឈានទៅបង្កើតពង្រាងកិច្ចព្រមព្រៀងផ្សះផ្សាជាតិ៕
Tag:
ថៃ
Prawit Wongsuwon
© រក្សាសិទ្ធិដោយ thmeythmey.com