ជាតិ
លោកស្រី ថាក់ ឡានី ដែលរងការប្ដឹងពីសម្ដេច ហ៊ុន សែន កំពុងលាក់ខ្លួននៅស៊ុយអែត
× ភ្នំពេញៈ សម្ដេចនាយករដ្ឋមន្ត្រី ហ៊ុន សែន បានឲ្យដឹងថា សមាជិកព្រឹទ្ធសភាលោកស្រី ថាក់ ឡានី ដែលរងបណ្តឹងរបស់សម្ដេច ពាក់ព័ន្ធនឹងការចោទគណបក្សប្រជាជនកម្ពុជា នៅពីក្រោយនៃការស្លាប់លោក កែម ឡី នោះ បានរត់គេចខ្លួនទៅប្រទេសស៊ុយអែត។ សម្ដេច ហ៊ុន សែន ក៏បានចំអកទៅលោកស្រី ថាក់ ឡានី ដែលសម្ងំលាក់ខ្លួននៅស៊ុយអែត ក្រោយពីតុលាការផ្តន្ទាទោសឲ្យជាប់ពន្ធនាគារចំនួន១ឆ្នាំកន្លះ និងបង់ប្រាក់ត្រឹម១០០រៀល សងជំងឺចិត្តដល់សម្តេច ហ៊ុន សែន ផងដែរ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន កោះធំ នៅព្រឹកថ្ងៃទី១៣ ខែកុម្ភៈ នាយរដ្ឋមន្ត្រី ហ៊ុន សែន បានបញ្ជាក់ដូច្នេះថា៖
លោកស្រី ថាក់ ឡានី សមាជិកាព្រឹទ្ធសភា ពីគណបក្ស សម រង្ស៊ី ត្រូវបានសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារចំនួន១ឆ្នាំកន្លះ ពីបទ «បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។
នៅព្រឹកនេះ មេធាវីការពារក្តីនាយរដ្ឋមន្ត្រី ហ៊ុន សែន ក៏បានប្ដឹងលោក គឹម សុខ ដែរ ទាក់ទងនឹងការបកស្រាយនៅក្នុងវិទ្យុអាស៊ីសេរី ដោយចោទគណបក្សប្រជាជនកម្ពុជា ជាអ្នកសម្លាប់លោក កែម ឡី។ សម្ដេច ទាមទារសំណងជំងឺចិត្ត ៥០ម៉ឺនដុល្លារ។ ជាមួយគ្នានេះប្រធានគណបក្សប្រជាជនរូបនេះ បានផ្ដាំលោក គឹម សុខ ថា កុំឲ្យរត់ចោលស្រុកផងដែរ ព្រោះពេលនេះសម្ដេច បានបញ្ជាឲ្យកងកម្លាំងតាមឃ្លាំមើលហើយ៕
Tag:
ហ៊ុន សែន
ថាក់ ឡានី
© រក្សាសិទ្ធិដោយ thmeythmey.com