កីឡាជាតិ
ជាតិ
លោក នេត សាវឿន ដាក់គោលការណ៍៣ចំណុចដើម្បីអភិវឌ្ឍន៍បាល់ទះសម្រាប់ត្រៀមស៊ីហ្គេម ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ ក្នុងកិច្ចប្រជុំពិភាក្សាជាមួយមន្ត្រីសហព័ន្ធបាល់ទះកម្ពុជានៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC)។ រូបភាពពីហ្វេសប៊ុកសហព័ន្ធកីឡាបាល់ទះកម្ពុជា
× ដើម្បីជួយអភិវឌ្ឍន៍កីឡាបាល់ទះកម្ពុជាឲ្យមានការរីកចម្រើនទាំងបរិមាណ និងគុណភាព សម្រាប់ត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជាបានដាក់ចេញគោលការណ៍៣ចំណុច ដើម្បីឲ្យមន្ត្រីសហព័ន្ធធ្វើការអនុវត្ត។
ដើម្បីពង្រឹង និងអភិវឌ្ឍន៍សមត្ថភាពកីឡាករ គ្រូបង្វឹក ចៅក្រម អាជ្ញាកណ្តាលឲ្យកាន់តែរីកចម្រើនទាំងបិរមាណ និងគុណភាព ដើម្បីត្រៀមធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ឆ្នាំ២០២៣។ ប្រធានសហព័ន្ធកីឡាបាល់ទះកម្ពុជា លោក នេត សាវឿន បានជំរុញឲ្យមន្ត្រីសហព័ន្ធត្រូវខិតខំប្រឹងប្រែងរៀបចំវគ្គបណ្តុះបណ្តាលគ្រូបង្វឹក ចៅក្រុម និងអាជ្ញាកណ្តា ជាពិសេសជ្រើសរើសយុវថ្នាលដែលមានសមត្ថភាព ដើម្បីប្រមូលផ្តុំហ្វឹកហាត់។
អាស្រ័យហេតុនេះ ដើម្បីរួមចំណែកអភិវឌ្ឍន៍វិស័យកីឡាបាល់ទះឲ្យកាន់តែរីកចម្រើន លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិបានដាក់ចេញគោលការណ៍៣ចំណុចក្នុងការអនុវត្ត។ គោលការណ៍ទាំងនោះរួមមានទី១ ត្រូវបណ្តុះបណ្តាលសមត្ថភាពចៅក្រម អាជ្ញាកណ្តាលកីឡាបាល់ទះតាមរយៈការបញ្ជូនទៅសិក្សានៅក្រៅប្រទេស ឬជួលគ្រូបរទេសមកបណ្តុះបណ្តាលនៅក្នុងស្រុក។
ទី២ ត្រូវរៀបចំការប្រកួតជ្រើសរើសជើងឯកដើម្បីចម្រាញ់រកកីឡាករដែលមានសមត្ថភាព ដើម្បីប្រមូលផ្តុំជាក្រុមជម្រើសជាតិឈុតធំ និងជម្រើសជាតិយុវជនថ្នាល និងទី៣ ត្រូវប្រមូលផ្តុំគ្រូបង្វឹកចាស់ ដើម្បីឲ្យពួកគាត់ផ្តល់ប្រឹក្សាធ្វើយ៉ាងណាជម្រុញ និងអភិវឌ្ឍន៍វិស័យកីឡាបាល់ទះនៅកម្ពុជាឲ្យរីកចម្រើនទាំងបរិមាណ និងគុណភាព។
ការជំរុញ និងការដាក់គោលការណ៍នេះធ្វើឡើងក្នុងកិច្ចប្រជុំគណៈកម្មការប្រតិបត្តិសហព័ន្ធកីឡាបាល់ទះកម្ពុជា ដើម្បីពិភាក្សាត្រៀមរៀបចំមហាសន្និបាតបូកសរុបការងារអាណត្តិទី៤ និងបោះឆ្នោតជ្រើសរើសគណៈកម្មាធិការប្រតិបត្តិអាណត្តិទី៥(ឆ្នាំ២០១៧-២០២១) នៅទីស្នាក់ការ NOCC កាលពីថ្ងៃទី១៥ ខែកុម្ភៈ៕
© រក្សាសិទ្ធិដោយ thmeythmey.com