អន្តរជាតិ
ប្រធានាធិបតីអាស៊ែបៃហ្សង់ តែងតាំងប្រពន្ធខ្លួនឯងជាអនុប្រធានាធិបតីទី១ ប្រធានាធិបតីអាស៊ែបៃហ្សង់ Ilham Aliyev និងភរិយារបស់លោក (រូបថត៖ វ៉េបសាយការិយាល័យប្រធានាធិបតីអាស៊ែបៃហ្សង់)
× ប្រធានាធិបតីអាស៊ែបៃហ្សង់ Ilham Aliyev នៅថ្ងៃទី២១ ខែកុម្ភៈ បានប្រកាសតែងតាំងភរិយារបស់ខ្លួន Mehriban Aliyeva ឲ្យធ្វើជាអនុប្រធានាធិបតី ដែលជាតំណែងខ្ពស់បំផុតទី២បន្ទាប់ពីលោក។ ច្បាស់ណាស់ថា ការតែងតាំងភរិយាខ្លួនឯងឲ្យកាន់តំណែងខ្ពស់បែបនេះ គឺជាការប៉ុនប៉ងពង្រឹងអំណាចគ្រួសាររបស់លោក Ilham Aliyev នៅក្នុងប្រទេសដែលសម្បូរប្រេងក្នុងតំបន់សមុទ្រ Caspian មួយនេះ។
ស្ត្រីទី១ របស់អាស៊ែបៃហ្សង់ Mehriban Aliyeva ត្រូវបានតែងតាំងជាអនុប្រធានាធិបតីទី១ របស់ប្រទេស ដោយស្វាមី Ilham Aliyev ដែលជាប្រធានាធិបតី។ ការតែងតាំងដែលប្រកាសនៅថ្ងៃទី២១ ខែកុម្ភៈ ធ្វើឡើងបន្ទាប់ពីការធ្វើប្រជាមតិមួយកាលពីឆ្នាំមុន ដែលសម្រេចបង្កើតតំណែងអនុប្រធានាធិបតីទី១ ដ៏មានឥទ្ធិពល។ ក្រុមប្រឆាំង បានរិះគន់ការតែងតាំងនេះយ៉ាងខ្លាំង ដែលអាចឈានដល់ការបង្កើតសន្តតិវង្សគ្រួសារ Aliyev នៅអាស៊ែបៃហ្សង់។
មុនពេលទទួលការតែងតាំងនេះ លោកស្រី Mehriban Aliyeva គឺជាសមាជិកសភាបក្សកាន់អំណាច Yeni Azerbaijan ចាប់តាំងពីឆ្នាំ២០០៥ មក ហើយលោកស្រី ក៏ជាប្រធានមូលនិធិ Heydar Aliyev ដ៏មានឥទ្ធិពលដែរ។ មិនតែប៉ុណ្ណោះ លោកស្រី ក៏ត្រូវគេមើលឃើញថា ជាអ្នកស្នងតំណែងបន្តពី Ilham Aliyev ដែលកាន់អំណាចតាំងពីឆ្នាំ២០០៣ ក្រោយមរណភាពអតីតប្រធានាធិបតី Heydar Aliyev ជាឪពុករបស់លោកផ្ទាល់។
គណបក្សប្រឆាំងដ៏ធំរបស់អាស៊ែបៃហ្សង់ ខឹងសម្បារយ៉ាងខ្លាំងនឹងការតែងតាំងលោកស្រី Mehriban Aliyeva សម្រាប់តំណែងអនុប្រធានាធិបតី និងចាត់ទុកការតែងតាំងនេះ ផ្ទុយពីគោលការណ៍ប្រជាធិបតេយ្យ ព្រមទាំងជាការពង្រឹងអំណាចគ្រួសាររបស់លោក Aliyev ។ លោក Isa Gambar ប្រធានបក្សប្រឆាំង Musavat ប្រាប់ទីភ្នាក់ងារព័ត៌មាន AFP ថា ការតែងតាំងនេះ បាននាំយកអាស៊ែបៃហ្សង់ត្រឡប់ទៅកាន់សម័យបុរាណវិញ ហើយការគ្រប់គ្រងបែបគ្រួសារមិនគួរមានទេ។
ដោយឡែកលោក Ilham Aliyev ផ្ទាល់ ក៏៏កំពុងស្ថិតក្នុងអាណត្តិទី៣ បន្ទាប់ពីឈ្នះការបោះឆ្នោតក្នុងឆ្នាំ២០១៣ ។ ក្រុមអ្នកគាំទ្រ បានសរសើរការដឹកនាំរបស់លោក ដែលប្រែក្លាយសាធារណរដ្ឋមួយនេះ ទៅជាអ្នកផ្គត់ផ្គង់ថាមពលដ៏ធំសម្រាប់អឺរ៉ុប។ ប៉ុន្តែក្រុមប្រឆាំង បានចោទលោកថាបានបំបិទសំឡេងប្រឆាំង ព្រមទាំងប្រើអំណាចដើម្បីផលប្រយោជន៍ផ្ទាល់ខ្លួន និងគ្រួសាររបស់លោក។
ជាមួយគ្នានេះ សិទ្ធិសេរីភាពនៅក្នុងរដ្ឋអតីតសហភាពសូវៀតនេះ ក៏មានស្ថានភាពអាក្រក់ខ្លាំងដែរ។ សកម្មជនសិទ្ធិមនុស្ស ព្រួយបារម្ភខ្លាំងជុំវិញរបាយការណ៍សិទ្ធិមនុស្សប្រទេសនេះ និងរិះគន់ការដឹកនាំរបស់លោក Aliyev ដែលបានបង្ក្រាបសកម្មជននយោបាយ និងចាប់អ្នកសារព័ត៌មានរិះគន់លោកដាក់ពន្ធនាគារជាដើមនោះ៕
Tag:
អាស៊ែបៃហ្សង់
Ilham Aliyev
Mehriban Aliyeva
© រក្សាសិទ្ធិដោយ thmeythmey.com