ជាតិ
នយោបាយជាតិ
×![]()
ភ្នំពេញ៖ បន្ទាប់ពីរដ្ឋាភិបាលអាមេរិក និងអង្គការសមាជិកអាស៊ានដើម្បីសិទ្ធិមនុស្ស (APHR) បានចេញសេចក្ដីថ្លែងការណ៍បង្ហាញពីការព្រួយបារម្ភ និងថ្កោលទោសលើការធ្វើវិសោធនកម្មច្បាប់ស្តីពីគណបក្សនយោបាយនោះ នៅពេលនេះសហភាពអឺរ៉ុប ក៏មិនបាននៅស្ងៀមដែរ។
ប្រតិភូសហភាពអឺរ៉ុបប្រចាំកម្ពុជា បានបង្ហាញក្តីព្រួយបារម្ភជុំវិញបញ្ហានយោបាយនៅកម្ពុជា ដែលកំពុងមានភាពអាប់អួឡើងវិញ នៅរយៈពេលចុងក្រោយនេះ ដែលអាចបង្កឲ្យមានការប៉ះពាល់ដល់ការបោះឆ្នោតនាពេលខាងមុខ។ អ្វីដែលសហភាពអឺរ៉ុប ព្រួយបារម្ភនោះ គឺការធ្វើវិសោធនកម្មច្បាប់ស្តីពីគណបក្សនយោបាយ ដែលអាចជាការរិតត្បិតសិទ្ធិសេរីភាពមួយនៃផ្នែកនយោបាយ ទៅលើគណបក្សក្រៅរដ្ឋាភិបាល។
សេចក្ដីថ្លែងការណ៍របស់ប្រតិភូសហភាពអឺរ៉ុបប្រចាំកម្ពុជា បានបញ្ជាក់ដូច្នេះថា៖«នៅក្នុងបរិបទនេះ យើងចង់ឃើញអាជ្ញាធរធានាបរិយាកាសមួយដែលគណបក្សប្រឆាំង និងសង្គមស៊ីវិលអាចដំណើរការដោយសេរី។ ផ្ទុយទៅវិញ បរិយាការបោះឆ្នោតត្រូវទទួលរងប៉ះពាល់ដោយការអនុម័តខ្លឹមសារថ្មីនៃច្បាប់ស្តីគណបក្សនយោបាយ ដែលអនុញ្ញាតឲ្យមានការរឹតបន្តឹងសកម្មភាពគណបក្សនយោបាយ ឬឈានដល់ការរំលាយគណបក្ស។ សកម្មភាពដែលប្រឆាំងទៅនឹងគណបក្សក្រៅរដ្ឋាភិបាលនេះ នឹងបង្កើតឲ្យមានជាសំណួរស្តីពីភាពស្របច្បាប់នៃការបោះឆ្នោតខាងមុខ»។
ប្រតិភូសហភាពអឺរ៉ុបប្រចាំកម្ពុជាជឿជាក់ថា ដើម្បីប្រយោជន៍របស់កម្ពុជា និងដើម្បីប្រយោជន៍នៃស្ថិរភាពយូរអង្វែងរបស់ប្រទេសនេះ វាត្រូវមានការបោះឆ្នោតដែលទទួលបានការទុកចិត្តពីអ្នកបោះឆ្នោត ហើយដែលអនុញ្ញាតឲ្យពលរដ្ឋកម្ពុជាជ្រើសរើសអ្នកណាម្នាក់ដែលតំណាងពួកគេនៅថ្នាក់មូលដ្ឋាន និងនៅថ្នាក់ជាតិ។ ហេតុដូច្នេះហើយបានជាសហភាពអឺរ៉ុបបានគាំទ្រគណៈកម្មាធិការជាតិរៀបចំការបោះឆ្នោតក្នុងការងាររៀបចំបញ្ជីឈ្មោះអ្នកបោះឆ្នោត។
ក្រៅពីសហភាពអឺរ៉ុបដែលព្រួយបារម្ភពី ខ្លឹមសារនៃការធ្វើវិសោធនកម្មច្បាប់ស្តីពីគណបក្សនយោបាយអាចប៉ះពាល់ដល់ការបោះឆ្នោតនេះ រដ្ឋាភិបាលអាមេរិក បានចេញសេចក្តីថ្លែងការណ៍ បង្ហាញពីក្តីព្រួយបារម្ភខ្លួន កាលពីថ្ងៃទី ២០ ខែកុម្ភៈថា៖ « វិសោធនកម្មនេះ បានផ្តល់អំណាចយ៉ាងធំដល់រាជរដ្ឋាភិបាលកម្ពុជា ក្នុងការដាក់កំហិតដល់សេរីភាពក្នុងការបញ្ចេញមតិ និងសកម្មភាពច្បាប់នានារបស់គណបក្សនយោបាយ ហើយស្ថិតនៅក្រោមកាលៈទេសៈមិនច្បាស់លាស់ណាមួយ គឺរំលាយគណបក្សនយោបាយតែម្តង»។
ចំណែកអង្គការសមាជិកសភាអាស៊ានដើម្បីសិទ្ធិមនុស្ស (APHR) ក៏បានចេញសេចក្តីថ្លែងការណ៍ថ្កោលទោសដោយចាត់ទុកថា ការធ្វើវិសោធនកម្មថ្មីនេះ ជាការស្លាប់នៃលទ្ធិប្រជាធិបតេយ្យនៅកម្ពុជា។
តែយ៉ាងណាក្តីព្រួយបារម្ភទាំងនេះត្រូវរដ្ឋាភិបាលចេញមកច្រានចោលជាបន្តបន្ទាប់ថា សេចក្ដីថ្លែងការណ៍របស់រដ្ឋាភិបាលបរទេសនេះ គឺផ្អែកលើការសង្ស័យដោយគ្មានមូលដ្ឋានច្បាស់លាស់ ក្នុងគោលបំណងប៉ុនប៉ងជ្រៀតជ្រែក ឬរំលោភចូលកិច្ចការផ្ទៃក្នុងរបស់ប្រទេសកម្ពុជាប៉ុណ្ណោះ។ ថ្លែងនៅក្នុងពិធីចែកសញ្ញាបត្រដល់និស្សិតសាកលវិទ្យាអន្តរជាតិ នៅព្រឹកនេះ សម្ដេច ហ៊ុន សែន បានអះអាងថា ច្បាប់ដែលរដ្ឋសភាបានអនុម័តនេះ មិនមែនបង្កើតមកដើម្បីសម្លាប់ប្រជាជន និងបង្កឲ្យបែកបាក់ឯកភាពជាតិ ដូចមតិរិះគន់កន្លងមកនោះទេ៕
Tag:
EU
ច្បាប់នយោបាយ
បោះឆ្នោត
© រក្សាសិទ្ធិដោយ thmeythmey.com
