លោក អ៊ុំ សំអាន និងលោក មាជ សុវណ្ណារ៉ា ប្រកាសលាលែងពីតំណែងក្នុងបក្ស

ជាតិ

លោក អ៊ុំ សំអាន និងលោក មាជ សុវណ្ណារ៉ា ប្រកាសលាលែងពីតំណែងក្នុងបក្ស

23, Feb 2017 , 10:41 pm

រូបភាព

ដោយ: សារព័ត៌មានថ្មីៗ

ភ្នំពេញ៖ លោក អ៊ុំ សំអាន និងលោក មាជ សុវណ្ណារ៉ា ដែលកំពុងជាប់ពន្ធនាគារ បានសរសេរលិខិតរៀងៗខ្លួន ទៅកាន់លោក ប៉ុល ហំម ដើម្បីសុំលាលែងពីសមាជិកគណៈកម្មាធិការនាយកនៃគណបក្សសង្គ្រោះជាតិ។ លោក ប៉ុល ហំម គឺជាប្រធានគណៈកម្មាធិការនាយកនៃគណបក្សសង្គ្រោះជាតិ។ ជាមួយគ្នានេះ លោក ហុង សុខហួរ សមាជិកព្រឹទ្ធសភា គណបក្សសម រង្ស៊ី វិញ ក៏បានសរសេរលិខិតទៅលោក ទាវ វណ្ណុល ប្រធានគណបក្សនេះ ដើម្បីសុំលាលែងពីតំណែងជាសមាជិកគណៈកម្មាធិការនាយកនៃបក្សសម រង្ស៊ី ផងដែរ ។

តាមរយៈលិខិតខាងលើ លោក អ៊ុំ សំអាន និងលោក មាជ សុណ្ណារ៉ា បានប្រាប់មូលហេតុដូចគ្នាថា ការចាកចេញពីសមាជិកគណៈកម្មាធិការនាយកនៃគណបក្សង្គ្រោះជាតិ គឺដោយសារតែមូលហេតុផ្ទាល់ខ្លួន។ យ៉ាងណា លិខិតនោះ មិនបានសរសេរថា ពួកលោកបានលាលែងពីសមាជិកភាពនៃគណបក្សសង្គ្រោះជាតិឡើយ ពោលគឺ ពួកគេ គ្រាន់តែលាលែងពីសមាជិកគណៈកម្មាធិការនាយកនៃគណបក្សសង្គ្រោះជាតិប៉ុណ្ណោះ។

ជុំវិញបញ្ហានេះ លោក ប៉ុល ហំម ដែលជាប្រធានគណៈកម្មាធិការនាយកនៃគណបក្សសង្គ្រោះជាតិ បានប្រាប់សារព័ត៌មានថ្មីៗ នៅយប់ម៉ោងជាង៩ នាថ្ងៃព្រហស្បតិ៍នេះថា លោក ពិតជាឮដំណឹងខាងលើមែន តែមិនទាន់ទទួលបានលិខិតរបស់លោក អ៊ុំ សំអាន និងលោក មាជ សុវណ្ណារ៉ា ជាផ្លូវការនោះទេ។ ដោយសារតែមិនទាន់ទទួលបានលិខិតទាំងនោះ លោក ប៉ុល ហំម សូមមិនបកស្រាយអ្វីច្រើននោះទេ។

ម្យ៉ាងទៀត ពេលនេះ លោក ប៉ុល ហំម កំពុងតែបំពេញបេសកកម្មនៅក្នុងខេត្តកែបឯណោះ។ ដូច្នេះលោក បញ្ជាក់ថា លុះត្រាតែត្រឡប់មករាជធានីភ្នំពេញវិញ និងបានឃើញលិខិតទាំងនោះដោយផ្ទាល់ភ្នែកសិន ទើបអាចបញ្ចេញមតិបាន។ លោក សង្កត់ធ្ងន់ដូច្នេះថា៖«ខ្ញុំមិននិយាយអ្វី ដែលខ្ញុំមិនទាន់ដឹងច្បាស់លាស់នោះទេ។ ចាំមើលខ្ញុំត្រឡប់ទៅវិញសិន ហើយដឹងរឿងហ្នឹងថាយ៉ាងម៉េច ទើបខ្ញុំនិយាយ»។

ទោះបីជាលោក ប៉ុល ហំម មិនទាន់ហ៊ានបញ្ជាក់ក៏ដោយ តែលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានអះអាងថា លោក អ៊ុំ សំអាន និងលោក មាជ សុវណ្ណារ៉ា ពិតជាបានសុំលាលែងពីសមាជិកគណៈកម្មាធិការនាយកនៃគណបក្សសង្គ្រោះជាតិ មែន។ អ្នកនាំពាក្យបក្សប្រឆាំងរូបនេះ បញ្ជាក់យ៉ាងខ្លីថា៖«ជាការពិត។ ពួកគាត់ ពិតជាសុំលាលែងមែន»។

បើតាមលោក យឹម សុវណ្ណ ការលាលែងពីតំណែងនេះ គឺដោយសារតែលោក អ៊ុំ សំអាន និងលោក មាជ សុវណ្ណារ៉ា គិតគូរដល់វាសនាគណបក្សសង្គ្រោះជាតិ។ លោក យឹម សុវណ្ណ បន្តថា ប្រសិនបើលោកទាំងពីរ មិនលាលែងនោះទេ គណបក្សសង្គ្រោះជាតិ អាចនឹងមានបញ្ហា។

ខ្លឹមសារថ្មីនៃច្បាប់ស្តីពីគណបក្សនយោបាយ បានកំណត់ថា ទណ្ឌិត មិនត្រូវបានអនុញ្ញាតឲ្យធ្វើជាប្រធាននិងអនុប្រធានគណបក្ស នោះទេ។ ម្យ៉ាងទៀត ទណ្ឌិត ក៏មិនអាច ធ្វើជាសមាជិកគណៈកម្មាធិការនាយក ឬសមាជិកគណៈកម្មាធិការអចិន្ត្រៃយ៍នៃគណបក្សណាមួយឡើយ។ ជាងនេះទៀត គណបក្សណាមួយ ដែលប្រព្រឹត្តខុសច្បាប់ធ្ងន់ធ្ងរ នឹងត្រូវរំលាយចោលតែម្តង។

មាត្រា១៨ បានសរសេរថា៖«ប្រធាននិងអនុប្រធាន នៃគណបក្សនយោបាយ និងសមាជិកនៃគណៈកម្មាធិការនាយក ឬគណៈកម្មាធិការអចិន្ត្រៃយ៍ ត្រូវបាត់បង់តួនាទី ក្នុងករណី ដែលសាមីខ្លួន ត្រូវបានផ្តន្ទាទោសដាក់ពន្ធនាគារ ពីបទឧក្រិដ្ឋ ឬបទមជ្ឈិម»។

ចំណែកមាត្រា៣៨ បានកំណត់ថា៖«ក្រសួងមហាផ្ទៃ អាចចាត់វិធនាការ ដោយប្តឹងទៅតុលាការ ដើម្បីរំលាយគណបក្សនយោបាយណាមួយ ក្នុងករណីកំហុសមានលក្ខណធ្ងន់ធ្ងរ»។
រីឯមាត្រា៤៥ បានចែងថា៖«ក្នុងករណី ដែលគណបក្សនយោបាយ ត្រូវបានរំលាយ តុលាការអាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។

ប្រហែលជាព្រួយបារម្ភពីបញ្ហានេះហើយ ទើបអ្នកទាំងពីរ ប្រកាសលាលែងពីសមាជិកគណៈកម្មាធិការនាយកនៃគណបក្សសង្គ្រោះជាតិ។ នេះជាការសន្និដ្ឋាន របស់លោក យឹម សុវណ្ណ។

យ៉ាងណា លិខិតរបស់លោក អ៊ុំ សំអាន និងលិខិតរបស់លោក មាជ សុវណ្ណារ៉ា មិនបានបញ្ជាក់ថាពួកលោក បានលាលែងពីសមាជិកភាពនៃគណបក្សសង្គ្រោះជាតិ នោះទេ។ ហើយលោក យឹម សុវណ្ណ ក៏មិនបានបញ្ជាក់ដែរថា ពួកលោកទាំងពីរ លាលែងពីសមាជិកភាពនៃគណបក្សង្គ្រោះជាតិ។ ដូច្នេះ ពួកលោក ទំនងជានៅតែជាសមាជិកនៃគណបក្សសង្គ្រោះជាតិ។

ដោយឡែក លោក ហុង សុខហួរ សមាជិកព្រឹទ្ធសភា ដែលកំពុងជាប់ពន្ធនាគារ ក៏បានប្រកាសលាលែងពីសមាជិកគណៈកម្មាធិការនាយកនៃគណបក្ស សម រង្ស៊ី ដែរ។ មូលហេតុរបស់ លោក ហុង សុខហួរ ក៏ប្រហែលជាមិនខុសពីលោក អ៊ុំ សំអាន និងលោក មាជ សុវណ្ណារ៉ា ឡើយ។

លោក យឹម សុវណ្ណ មិនហ៊ានបកស្រាយបញ្ហាទាំងឡាយណា ដែលទាក់ទងនឹងលោក ហុង សុខហួរ នោះទេ ព្រោះលោក ហុង សុខហួរ មិនមែនជាសមាជិកនៃគណបក្សសង្គ្រោះជាតិឡើយ៕