ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ស្ថាបត្យករវ័យក្មេងជប៉ុនស្ងើចស្នាដៃបិតាស្ថាបត្យករខ្មែរលោក វណ្ណ ម៉ូលីវណ្ណ
06, Mar 2017 ,
1:59 pm
រូបភាព
លោក Masaaki Iwamoto បង្ហាញស្នាដៃស្ថាបត្យកម្មលោក វណ្ណ ម៉ូលីវណ្ណ នៅសារមន្ទីរជាតិកម្ពុជា។ រូបថត រឿន ភារុន
×
ដោយ:
ភ្នំពេញ៖ ស្ថាបត្យករជប៉ុនលោក Masaaki Iwamoto បានស្ងើចស្នាដៃស្ថាបត្យកម្មរបស់
បិតាស្ថាបត្យករខ្មែរលោក វណ្ណ ម៉ូលីវណ្ណ ដែលបានបង្ហាញរចនាប័ទ្មស្ថាបត្យកម្មអត្តសញ្ញាណខ្មែរលើសំណង់អគារធំៗ
ក្នុងទស្សវត្សរ៍ទី ៥០ និងទី៦០។ បន្ថែមលើសពីនេះ សាស្ត្រាចារ្យរង និងជាអ្នកស្រាវជ្រាវនៅសាកលវិទ្យាល័យ KYUSHU ជប៉ុនវ័យជាង ៣០ឆ្នាំរូបនេះ បានស្រាវជ្រាវឃើញថា ស្ថាបត្យករ និងវិស្វករជប៉ុនជាង ២០នាក់ ក៏បានចូលរួមសង់អគារជាមួយលោក វណ្ណ ម៉ូលីវណ្ណ អំឡុងសម័យសង្គមរាស្ត្រនិយម នៅកម្ពុជាផងដែរ។
លោក Masaaki Iwamoto បានវាយតម្លៃស្នាដៃស្ថាបត្យកម្មបិតាស្ថាបត្យករខ្មែរដោយផ្អែកតាមការស្រាវជ្រាវថា លោកជាស្ថាបត្យករខ្មែរដែលមានគំនិតរចនាប័ទ្មល្អឯក នៅក្នុងតំបន់អាស៊ីអាគ្នេយ៍ កាលពីសម័យសង្គមរាស្ត្រនិយមក្រោម ការដឹកនាំរបស់សម្តេចព្រះបរមរតនកោដ្ឋ នរោត្តម សីហនុ។
ការសន្និដ្ឋានរបស់ស្ថាបត្យករវ័យកេ្មងជប៉ុនរូបនេះ គឺផ្អែកលើការស្រាវជ្រាវរបស់លោកដោយផ្ទាល់នៅតាមបណ្តាក្រុមហ៊ុនអចលនទ្រព្យធំៗនៅជប៉ុនដែលបានសហការជាមួយខ្មែរកាលជំនាន់មុន និងសម្ភាសន៍ផ្ទាល់ជាមួយ លោក វណ្ណ ម៉ូលីវណ្ណ នៅខេត្តសៀមរាប កាលចុងឆ្នាំ២០១៥ កន្លងមក។ បុរសដែលបានបញ្ចប់ការសិក្សាផ្នែកស្ថាបត្យកម្មនៅសាកលវិទ្យាល័យតូក្យូ និងសាកលវិទ្យាល័យទីក្រុង Stuttgart ប្រទេសអាល្លឺម៉ង់ កាលពីឆ្នាំ២០១១រូបនេះ បានចាត់ទុកលោក ម៉ូលីវណ្ណ ជាស្ថាបត្យករគំរូរបស់លោកផង។ លោកបាននិយាយយ៉ាងម៉ឺងមាត់ចាត់ទុក លោក ម៉ូលីវណ្ណ ជាស្ថាបត្យករដ៏ឆ្នើមដែលចេះគ្រប់គ្រង និងសហការការងារជាក្រុមជាមួយអ្នកជំនាញបរទេសមកពីប្រទេសក្នុងតំបន់អាស៊ី អឺរ៉ុប និងអាមេរិក ដើម្បីអនុវត្តគម្រោងសាងសង់អគារនានា ដូចជា ពហុកីឡដ្ឋានជាតិ និងសាលសន្និសទី ជាដើម កាលពីជំនាន់មុន។
«ខ្ញុំបានមកដល់ភ្នំពេញដំបូងក្នុងឆ្នាំ២០១៥ ខ្ញុំបានស្វែងយល់ពីរចនាប័ទ្មក្នុងពហុកីឡដ្ឋានជាតិអូឡាំពិក។ ពេលនោះខ្ញុំពុំស្គាល់ឈ្មោះលោក វណ្ណ ម៉ូលីវណ្ណនោះទេ។ ដោយសារខ្ញុំចាប់អារម្មណ៍នឹងស្នាដៃគាត់កាលពីសម័យនោះ ខ្ញុំចាប់ផ្តើមដំបូងស្រាវជ្រាវសរសេរសៀវភៅពីគាត់។ ពីដំបូង ខ្ញុំបានស្រាវជ្រាវតាមប្រព័ន្ធអ៊ីនធឺណេតរកមើលថា តើលោក វណ្ណ ម៉ូលីវណ្ណ ជានរណា»? លោកសាស្ត្រាចារ្យស្ថាបត្យករវ័យកេ្មងជប៉ុន រម្លឹករឿងប្រាប់សារព័ត៌មានថ្មីៗ ពេលលោករៀបចំពិព័រណ៍ស្ថាបត្យកម្មខ្មែរសម័យថ្មី និងប្រទេសជប៉ុន ក្រោមកិច្ចសហការជាមួយ
Japan Foundation Asia Center
។
បន្ថែមលើបទបង្ហាញអំពីស្នាដៃលោក ម៉ូលីវណ្ណ ដល់និស្សិតសាកលវិទ្យាល័យភូមិន្ទវិចិត្រសិល្បៈ លោក Iwamoto ដែលមានបទពិសោធន៍ការងារផ្នែកស្ថាបត្យកម្មនៅប្រទេសវៀតណាមប្រមាណ ៤ឆ្នាំ រូបនេះ បានបន្តសរសើរពីស្នាដៃស្ថាបត្យកម្មទំនើបភាវូបនីយកម្មខ្មែររបស់លោក ម៉ូលីវណ្ណ ទៀត។ លោកស្ងើចថា បិតាស្ថាបត្យកម្មខ្មែរពិតជាមានគំនិតច្នៃប្រឌិតរចនាប័ទ្មខ្មែរថ្មីក្នុងសម័យកាលនោះមែន ទោះបីជាលោកបានទៅសិក្សាផ្នែកស្ថាបត្យកម្មនៅទីក្រុងបារីស ប្រទេសបារាំង ក្នុងតំបន់អឺរ៉ុបក្តី។
«នៅជំនាន់នោះ កម្ពុជាគ្មានស្ថាបត្យករច្រើនទេ ហើយប្រជាជនទូទៅក៏មិនសូវស្គាល់អាជីពនេះដែរ។ ខ្ញុំគិតថា គាត់ជាបិតាសាងសង់កម្ពុជា ពីព្រោះសំណង់របស់គាត់មានរចនាប័ទ្មថ្មី ខុសប្លែក ពីរចនាប័ទ្មនៅអឺរ៉ុប។ គាត់ហាក់យកគំរូតាមរចនាប័ទ្មប្រាសាទអង្គវត្តខ្មែរសុទ្ធសាធ»។ លោក Iwamoto កំពុងវិភាគពីស្នាដៃរចនាប័ទ្មរបស់បិតាស្ថាបត្យករខ្មែរ ក្នុងពិព័រណ៍ស្ថាបត្យកម្មខ្មែរ និងជប៉ុនជាសាធារណៈ រយៈពេល ១៣ថ្ងៃ ចាប់ពីថ្ងៃទី៤ ដល់ទី១៦ ខែមីនានេះ ក្នុងសារមន្ទីរជាតិកម្ពុជា។
បុរសជប៉ុនសម្បុរសស្តើងដែលកំពុងស្រាវជ្រាវបញ្ចប់ថ្នាក់បណ្ឌិតនៅចុងឆ្នាំ២០១៧នេះ មានមោទកភាពនៅពេលលោកបានចុះសិក្សាស្រាវជ្រាវ និងជួបសម្ភាសន៍លោក វណ្ណ ម៉ូលីវណ្ណ ដែលជាម្ចាស់រចនាប័ទ្មនិងអ្នកដឹកនាំសហការជាមួយអ្នកជំនាញការរបស់ជប៉ុន ក្នុងសម័យកាលមុនដោយផ្ទាល់។ លោកបានរកឃើញដូច្នេះថា៖«បិតាស្ថាបត្យករខ្មែរ និងជប៉ុនក្រោមកិច្ចសហការជាមួយអង្គការសហប្រជាជាតិ (UN) ចំនួន ៣នាក់ បានចូលរួមគម្រោងសំណង់ទាំងនេះដែរ ក្នុងទីក្រុងភ្នំពេញ និងអ្នកជំនាញការប្រមាណ ៦នាក់ទៀត បានចូលរួមគម្រោងសង់អគារកសិកម្មមួយក្នុងខេត្តកំពង់ចាម ហើយស្ថាបត្យករជប៉ុនជាង ២០ គ្រប់គ្រងគម្រោងសហប្រតិបត្តិការក្នុងទីក្រុងតូក្យូ ប្រទេសជប៉ុន»។
លោក Iwamoto បានស្រាវជ្រាវស្នាដៃស្ថាបត្យកម្មលោក ម៉ូលីវណ្ណ ជាច្រើន រួមមាន អគារមហោស្រព សាលសីទ្នចតុមុខ សាលសន្និសីទព្រះសុរាម្រិត ពហុកីឡដ្ឋានជាតិអូឡាំពិក អគាលំនៅដ្ឋាន គម្រោងរដ្ឋសភាកម្ពុជា និងជប៉ុន ផែនការមេទីក្រុងព្រះសីហនុនិងសាលារៀននានាដែលមានរចនាប័ទ្មខ្មែរថ្មីជាដើម។ លោកសង្ឃឹមថា ស្នាដៃរបស់បិតាស្ថាបត្យករខ្មែរ នឹងនៅឋិតថេរជាប្រវត្តិសាស្ត្រ ដើម្បីឲ្យកូន ខ្មែរដែលស្ថាបត្យករជំនាន់ក្រោយបានសិក្សារៀនសូត្របន្ត។ បន្ថែមលើសពីនេះ លោកបានចាត់ទុកថា ស្នាដៃទាំងនេះ ជាចំណងប្រវត្តិសាស្ត្ររវាងកម្ពុជា និងជប៉ុនផងដែរ សម្រាប់ឲ្យអ្នកសិក្សាស្រាវជ្រាវវ័យក្មេងប្រទេស ជប៉ុន និងអន្តរជាតិបានសិក្សារៀនសូត្រពីរចនាប័ទ្មសំណង់ខ្មែរឲ្យកាន់តែច្បាស់។
«បើយើងរក្សាស្នាដៃទាំងនេះ ដូចជា ពហុកីឡាដ្ឋានជាតិអូឡាំពិក បច្ចុប្បន្នជាដើម វានឹងអាចក្លាយជាសម្បតិ្តបេតិកភណ្ឌពិភពលោក មានតម្លៃជាសាកល ក្នុងរយៈពេលពី ១០ ទៅ២០ឆ្នាំ ខាងមុខទៀត។ ខ្ញុំជឿជាក់ថា វាអាចក្លាយចំណងមិត្តភាពជាសាកលសម្រាប់មនុស្សជាតិ»។ លោក Masaaki Iwamoto ចង់អភិរក្ស ស្នាដៃរបស់លោក វណ្ណ ម៉ូលីវណ្ណរួច លោកសង្ឃឹមបន្ថែមថា លោកនឹងមានឱកាសបង្ហាញស្នាដៃរបស់លោកនៅកម្ពុជា ដូចលោក វណ្ណ ម៉ូលីវណ្ណ ផងដែរ នាពេលខាងមុខ។
គួរបញ្ជាក់ថា បិតាស្ថាបត្យករខ្មែរ លោក វណ្ណ ម៉ូលីវណ្ណ កើតនៅឆ្នាំ១៩២៦ នៅក្នុងខេត្តកំពត បើគិតត្រឹមឆ្នាំ២០១៧នេះ លោកមានអាយុ ៩១ឆ្នាំ។ លោក វណ្ណ ម៉ូលីវណ្ណ គឺជាសិស្សទី១ ដែលបានប្រឡងជាប់បាក់ឌុបនៅវិទ្យាល័យស៊ីសុវត្ថិនៅឆ្នាំ១៩៤៤ ។ នៅឆ្នាំ១៩៤៧-១៩៥៦ លោកបានទៅសិក្សាផ្នែកស្ថាបត្យកម្មនៅទីក្រុងបារីស ប្រទេសបារាំង។ នៅចុងឆ្នាំ២០១៤ លោក វណ្ណ ម៉ូលីវណ្ណ បានសម្រេចចាកចេញពីរាជធានីភ្នំពេញ ទៅរស់នៅក្រុងសៀមរាប ក្នុងជីវិតចុងក្រោយរបស់លោក៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
Masaaki Iwamoto
វណ្ណ ម៉ូលីវណ្ណ
ជប៉ុន
ស្ថាបត្យកម្ម
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
7 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
5 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
1 សប្តាហ៍
«ប្រេសិត»មានន័យដូចម្តេច?
6 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
2 ថ្ងៃ
អត្ថបទពេញនិយមបន្ថែម