អន្តរជាតិ
តួកគី និងហូឡង់ផ្ទុះជម្លោះការទូតព្រោះប្រជាមតិបង្កើនអំណាចប្រធានាធិបតី Erdogan
× យុទ្ធនាការក្រៅប្រទេសរបស់រដ្ឋាភិបាលតួកគី ដើម្បីស្វែងរកការគាំទ្រប្រជាមតិនៅខែមេសា ដែលមានគោលដៅពង្រឹងអំណាចប្រធានាធិបតី Tayyip Erdogan កំពុងក្លាយជាបញ្ហាចម្រូងចម្រាស។ មន្ត្រីជាន់ខ្ពស់តួកគី មិនត្រូវបានអនុញ្ញាតឲ្យចូលរួមថ្លែងសុន្ទរកថាក្នុងការជួបជុំប្រជាជនតួកគីនៅប្រទេសអឺរ៉ុបដូចជានៅអាល្លឺម៉ង់ជាដើម។ ចុងក្រោយនេះហូឡង់ក៏ហាមមន្ត្រីតួកគីទៀត។ រដ្ឋាភិបាលតួកគី ខឹងក្រេវក្រោធចំពោះទង្វើរបស់ហូឡង់ និងបានវាយប្រហារពាក្យសម្ដីធ្ងន់ៗទៀតផង។
បណ្ដាថ្នាក់់ដឹកនាំជាន់ខ្ពស់តួកគី បានបន្តវាយប្រហាររដ្ឋសមាជិកអឺរ៉ុប ហូឡង់ ដែលហាមរដ្ឋមន្ត្រីតួកគី២រូប ពីការថ្លែងសុន្ទរកថាទៅកាន់ប្រជាជនតួកគីជុំវិញប្រជាមតិខែក្រោយនេះ។ ទាំងប្រធានាធិបតីលោក Tayyip Erdogan ទាំងរដ្ឋមន្ត្រីការបរទេសលោក Mevlut Cavusoglu ដែលជាអ្នកត្រូវហូឡង់ហាមឃាត់ដែរនោះ បានចោទប្រកាន់ហូឡង់ថាជាទីក្រុងនៃពួកហ្វាស៊ីសនិយម និងបានគំរាមដាក់ទណ្ឌកម្មទៀតផង។
កាលពីថ្ងៃទី១១ ខែមីនា យន្តហោះដឹកលោក Cavusoglu មិនត្រូវបានអនុញ្ញាតឲ្យចុះចតនៅទីក្រុង Rotterdam ឡើយ។ រដ្ឋមន្ត្រីការបរទេសតួកគីរូបនេះ មានគម្រោងចូលរួមក្នុងការជួបជុំរបស់ប្រជាជនតួកគីក្នុងទីក្រុងនេះ ដើម្បីស្វែងរកការគាំទ្រជុំវិញប្រជាមតិរដ្ឋធម្មនុញ្ញដែលប្រែក្លាយតួកគីទៅជារបបប្រធានាធិបតីនិយម និងផ្ដល់អំណាចកាន់ច្រើនដល់លោក Erdogan ។ ជាមួយគ្នានោះ រដ្ឋមន្ត្រីតួកគីម្នាក់ទៀត ក៏មិនត្រូវអនុញ្ញាតឲ្យចូលកុងស៊ុលតួកគី និងត្រូវបញ្ជូនទៅកាន់ព្រំដែនអាល្លឺម៉ង់។
សព្វថ្ងៃនេះ លោក Erdogan មិនមានអំណាចអ្វីឡើយ ខណៈដែលអំណាចស្ថិតក្នុងកណ្ដាប់ដៃនាយករដ្ឋមន្ត្រី Yildirim Binali ឯណោះ។ បក្សកាន់អំណាចរបស់លោក Erdogan ជាអ្នកផ្ដួចផ្ដើមវិសោធនកម្មនេះ ដើម្បីផ្លាស់ប្ដូររបបដឹកនាំតួកគី ឲ្យដូចជារបបនយោបាយដូចនៅអាមេរិកដូច្នោះដែរ។ លោក Erdogan បានផ្ដោតការយកចិត្តទុកដាក់លើជនអន្តោប្រវេសន៍តួកគីក្រៅប្រទេស ដើម្បីទាក់ទាញការគាំទ្រឲ្យបានច្រើន។
ថ្លែងពីទីក្រុង Metz របស់បារាំងនៅថ្ងៃទី១២ ខែមីនា លោក Cavusoglu បានរិះគន់រដ្ឋាភិបាលហូឡង់ ដែលហាមឃាត់រូបលោក និងបានប្រដូចទង្វើរបស់ហូឡង់ទៅនឹងទង្វើរបស់ហ្វាស៊ីសទៀតផង។ ប៉ូលិសហូឡង់ បានប្រើកាណុងបាញ់ទឹកបំបែកហ្វូងបាតុករតួកគី ដែលប្រមូលផ្ដុំតវ៉ានៅក្រៅកុងស៊ុលតួកគីក្នុងទីក្រុង Rotterdam ដើម្បីបង្ហាញការមិនពេញចិត្តរបស់តួកគីចំពោះចំណាត់ការរបស់រដ្ឋាភិបាលហូឡង់។
ថ្ងៃដដែលនោះ ប្រធានាធិបតីតួកគី Erdogan ក៏បានហៅហូឡង់ជាទីក្រុងហ្វាស៊ីសនិយម និងណាហ្ស៊ីនិយមទៀតផង ព្រោះមានតែក្រុមនេះប៉ុណ្ណោះដែលហ៊ានហាមឃាត់រដ្ឋមន្ត្រីការបរទេសប្រទេសមួយចូលទឹកដីខ្លួន។ លើសពីនោះ លោកថែមទាំងស្នើឲ្យអង្គការអន្តរជាតិនៅអឺរ៉ុប និងកន្លែងដទៃទៀត ជួយដាក់ទណ្ឌកម្មលើហូឡង់ផងដែរ។ លោក Erdogan ក៏និយាយទាំងកំហឹងថា ហូឡង់ ត្រូវតែទទួលខុសត្រូវចំពោះទង្វើរបស់ខ្លួន ទោះក្នុងតម្លៃណាក៏ដោយ។
ជាការឆ្លើយតប នាយករដ្ឋមន្ត្រីហូឡង់ Mark Rutte បានហៅសម្ដីរបស់លោក Erdogan ជារឿងអុជអាល។ នាយករដ្ឋមន្ត្រី Rutte ក៏បញ្ជាក់ជំហរមិនសុំទោសតួកគីរឿងហាមឃាត់រដ្ឋមន្ត្រីនោះ តែក៏បានប្រាប់ឲ្យតួកគីសុំទោសខ្លួនវិញ ចំពោះការប្រើប្រាស់ពាក្យមិនសមរម្យទាំងនោះ។ លោក Rutte ចាត់ទុកសម្ដីរបស់ប្រធានាធិបតីតួកគី ជារឿងមិនអាចទទួលយកបាន និងមិនធ្លាប់មានក្នុងចំណោមសមាជិកសម្ព័ន្ធយោធាណាតូដូចគ្នា៕
Tag:
តួកគី
ហូឡង់
Tayyip Erdogan
© រក្សាសិទ្ធិដោយ thmeythmey.com