អន្តរជាតិ
Duterte៖ បើកូនខ្ញុំពុករលួយ ខ្ញុំលាលែងពីតំណែងភ្លាម ប្រធានាធិបតីហ្វីលីពីន Rodrigo Duterte និងកូនស្រីប្រុសរបស់លោក (រូបភាពពីវិមានប្រធានាធិបតី Malacanag)
× ប្រធានាធិបតីហ្វីលីពីន Rodrigo Duterte បានប្រកាសនៅថ្ងៃទី១២ ខែមីនា ថា លោកនឹងចុះចេញពីតំណែងប្រធានាធិបតីភ្លាមៗ បើកូនៗរបស់លោកមានជាប់ពាក់ព័ន្ធករណីពុករលួយ។ លោក Duterte ដែលមានគោលនយោបាយប្រឆាំងអំពើពុករលួយ និយាយថា ការលាលែងតំណែងនេះ មិនមែនជាបញ្ហាឡើយ បើពិតជាករណីពុករលួយកើតឡើងមែននោះ។ ម្យ៉ាងទៀតនោះ លោកក៏បានបណ្ដេញមន្ត្រីជាច្រើននាក់ដោយសាររឿងពុករលួយផងដែរ។
ចុងក្រោយនេះ ប្រធានាធិបតី Rodrigo Duterte និងក្រុមគ្រួសារ រងការចោទប្រកាន់ពីសំណាក់សមាជិកព្រឹទ្ធសភាម្នាក់ ដែលអះអាងថាក្រុមគ្រួសាររបស់លោក មានលុយច្រើនពាន់ពឺសូនៅក្នុងធនាគារ។ ប៉ុន្តែលោកក៏បានទាត់ចោលការចោទប្រកាន់នេះ និងបានប្រកាសថា បើមានភស្តុតាងបង្ហាញកំហុសរបស់លោក និងក្រុមគ្រួសារជាប់ពាក់ព័ន្ធពុករលួយមែននោះ លោកនឹងលាលែងពីតំណែងភ្លាម។
លោក Duterte មានកូនប្រុសស្រី៤នាក់ ក្នុងនោះ២នាក់ចូលប្រឡូកក្នុងនយោបាយ។ កូនស្រី Sara Duterte-Carpio កំពុងកាន់តំណែងជាអភិបាលក្រុង Davao ហើយកូនប្រុសលោក Paolo Duterte ជាអភិបាលរងទីក្រុងនេះ។ អ្វីជាការកត់សម្គាល់នោះ លោក Duterte ផ្ទាល់ក៏ធ្លាប់ជាអភិបាលក្រុងនេះអស់ពេលជាង២០ឆ្នាំ មុនពេលលោកចូលប្រជែងក្នុងការបោះឆ្នោតប្រធានាធិបតី រហូតឈ្នះឆ្នោតក្នុងឆ្នាំ២០១៦ ។
ក្នុងពិធីជប់លាងរបស់បក្ស PDP-Laban ដែលជាបក្សរបស់លោកនៅថ្ងៃទី១២ ខែមីនា ប្រធានាធិបតី Duterte ប្រកាសថា៖ «ប្រសិនបើកូនខ្ញុំណាម្នាក់ ជាប់ទាក់ទងករណីពុករលួយដូចជាការលួចលុយរដ្ឋជាដើម ខ្ញុំនឹងលាលែងពីតំណែង។ វាមិនមែនជាបញ្ហាសម្រាប់ខ្ញុំឡើយ»។ បើតាមសារព័ត៌មាន Rappler លោកក៏នឹងចុះចេញពីតំណែង បើសមាជិកព្រឹទ្ធសភា Antonio Trillanes IV បង្ហាញភស្តុតាងបញ្ជាក់ថា លោក និងគ្រួសារ មានលុយច្រើនសន្ធឹកសន្ធាប់។
អំឡុងខែកុម្ភៈ លោក Trillanes ដែលជាអ្នករិះគន់លោក Duterte យ៉ាងចាស់ដៃ អះអាងថា លោកប្រធានាធិបតី និងក្រុមគ្រួសារមានលុយ២.៤ពាន់លានពឺសូ ក្នុងគណនីធនាគារ។ ក្រោយការចោទប្រកាន់នេះ លោក Duterte ក៏បានមកស្រាយរួចម្ដងទៅហើយ តែពេលនេះលោកក៏បានបញ្ជាក់ម្ដងទៀតថា បើលោកមានលុយច្រើនមែននោះ លោកត្រឡប់ទៅផ្ទះក្នុងទីក្រុង Davao វិញ ហើយដើរលេងរាល់ថ្ងៃប្រសើរជាង។
តាមពិតទៅ នរណាក៏ដឹងដែរថា លោក Duterte ជាប្រធានាធិបតីមានគោលនយោបាយប្រឆាំងអំពើពុករលួយ។ តាំងពីឡើងធ្វើប្រធានាធិបតីមកនោះ លោកបានបណ្ដេញមន្ត្រីជាច្រើននាក់ពីតំណែងដោយសាររឿងពុករលួយនេះ ហើយថ្មីៗនេះទៀត លោកក៏ទើបបណ្ដេញមន្ត្រីថ្នាក់ជាន់ខ្ពស់ម្នាក់ក៏ព្រោះតែករណីពុករលួយនេះដែរ។ កាលពីដើមខែនេះ លោកក៏ព្រមានទុកមុនដែរថា មន្ត្រីរដ្ឋដែលទើបតែងតាំងថ្មីៗ អាចប្រឈមមុខការបណ្ដេញចេញពីតួនាទីទៀតផង៕
Tag:
ហ្វីលីពីន
Rodrigo Duterte
ពុករលួយ
© រក្សាសិទ្ធិដោយ thmeythmey.com