អន្តរជាតិ
ចៅទួតអតីតស្តេចភូមា៖ ថៃគោរពមហាក្សត្រខ្លួន តែផលិតកុនមើលងាយស្តេចប្រទេសដទៃ
× សមាជិករាជវង្សនៃមហាក្សត្រចុងក្រោយរបស់ភូមា បានរិះគន់ភាពយន្តភាគរបស់ថៃ «A Lady's Flame» ដែលផលិតតាមដំណើររឿងទំនាស់ក្នុងរាជវាំងភូមា កាលពីសម័យមុន និងបានចោទប្រកាន់ថៃថាកំពុងអនុវត្តស្តង់ដាពីរជាន់ ព្រោះគោរពមហាក្សត្ររបស់ខ្លួន តែមិនសូវឲ្យតម្លៃ និងការគោរពរាជានិយមប្រទេសដទៃទៅវិញ។
លោក Soe Win ចៅប្រុសទួតរបស់មហាក្សត្រចុងក្រោយភូមា Thibaw បាននិយាយថា គ្រួសាររបស់លោក ខឹងសម្បារយ៉ាងខ្លាំងនឹងខ្សែភាពយន្តថៃមានចំណងជើងថា A Lady's Flame ដែលយកលំនាំតាមព្រឹត្តិការណ៍ប្រវត្តិសាស្ត្រនៃការដណ្ដើមអំណាចដ៏បង្ហូរឈាមក្នុងចំណោមសមាជិករាជវង្ស។ ភាពយន្តនោះ ត្រូវបានផលិតជារឿងប្រឌិតបុរាណ តែយកលំនាំស្ទើរទាំងស្រុងនៃព្រឹត្តិការណ៍សម័យរាជវង្ស Konbaung ជារាជវង្សចុងក្រោយរបស់ភូមា។
ដំណើរសាច់រឿងភាពយន្តនេះ មានរួមបញ្ចូលទាំងសកម្មភាពមហាក្សត្រីយ៍ និងបុត្រីនៃរាជវង្ស Konbaung ដែលរួមគំនិតសម្លាប់មនុស្សជិត១០០នាក់ដើម្បីធានាថា គ្មាននរណាមកប្រជែងរាជបុត្រ Thibaw ក្នុងការឡើងសោយរាជ្យបន្តពីបិតាក្នុងឆ្នាំ១៨៧៨ នោះ។ បើទោះជាការសម្លាប់មនុស្សនេះជាការពិតក្ដី សមាជិករាជវង្សជំនាន់ក្រោយរបស់ស្ដេច Thibaw មិនពេញចិត្តសាច់រឿងដែលបង្ហាញពីការបង្ហូរឈាមដណ្ដើមនេះឡើយ។
លោក Soe Win បានប្រាប់ទីភ្នាក់ងារព័័ត៌មាន AFP ថា៖ «យើងបានសួរជនជាតិថៃថា តើពួកគេអាចទទួលបានទេ ប្រសិនបើមានក្រុមហ៊ុនមួយរបស់មីយ៉ាន់ម៉ា ធ្វើរឿងដូចគ្នានេះដាក់រាជវង្សរបស់ខ្លួននោះ?»។ លោកបន្ថែមថា បើគ្មានការចាត់វិធានការណាមួយទេ ខាងលោកនឹងស្នើមហាក្សត្រថៃឲ្យជួយអន្តរាគមន៍មិនខាន ព្រោះរាជវង្សថៃទទួលបានការការពារយ៉ាងតឹងរ៉ឹងដោយច្បាប់ ហើយអ្នកប្រមាថនឹងមានទោសធ្ងន់មិនខាន។
សមាជិកនៃស្ដេចចុងក្រោយរបស់មីយ៉ាន់ម៉ារូបនេះ រឹតតែខឹងខ្លាំងត្រង់ឈុតមួយនៃរឿង A Lady's Flame ដែលសមាជិករាជវង្សទះកំផ្លៀងគ្នាទៅវិញទៅមក។ លោក Soe Win ចាត់ទុកឈុតមួយនេះ ជារឿងប្រមាថខ្លាំងណាស់ ប្រៀបដូចជាសមាជិករាជវង្សទាំងនោះ ជាមនុស្សសាហាវអ៊ីចឹងដែរ។
ថៃ និងមីយ៉ាន់ម៉ា ជាប្រទេសជិតខាង២ ដែលធ្វើសង្គ្រាមបង្ហូរឈាមជាញឹកញាប់តាំងពីដើមមក។ ព្រឹត្តិការណ៍ដ៏ធំ គឺជ័យជម្នះរបស់កងទ័ពភូមា ទៅលើកងទ័ពសៀម ដែលភូមាកម្ទេចក្រុងអាយុធ្យាគ្មានសល់ក្នុងឆ្នាំ១៧៦៧។ បើទោះនេះជារឿងប្រវត្តិសាស្ត្រកន្លងហួសក្ដី រាល់ភាពយន្តរបស់ថៃ គេសង្កេតឃើញតួអង្គភូមា ច្រើនជាតួអង្គអាក្រក់ ហើយរឿងនេះធ្វើឲ្យមីយ៉ាន់ម៉ាខឹងសម្បារយ៉ាងខ្លាំង។ ការបាត់បង់របបរាជានិយមនៅមីយ៉ាន់ម៉ា គឺជាស្នាដៃរបស់អាណានិគមអង់គ្លេស ហើយវាបានក្លាយជាស្នាមរបួសផ្លូវចិត្តរបស់ប្រជាជនមីយ៉ាន់ម៉ាផងដែរ៕
Tag:
ភូមា
ថៃ
A Lady’s Flame
© រក្សាសិទ្ធិដោយ thmeythmey.com