កីឡាអន្តរជាតិ
អន្តរជាតិ
មន្ត្រីបារាំងម្នាក់បានសន្យា ហូបសត្វកណ្តុរ បើ Barcelona ឡើងទៅវគ្គបន្ត តែ...
× អភិបាលរងក្រុង Mont-de-Marsan តំបន់ Landes ប្រទេសបារាំង ដែលជាអ្នកគាំទ្ររបស់ PSG បានប្រកាសនៅក្នុងហ្វេសប៊ុករបស់ខ្លួនថា បើ Barcelona ឡើងទៅវគ្គបន្តបន្តក្នុងក្របខណ្ឌ Champions League គាត់នឹងហូបសត្វកណ្តុរ ហើយត្រៀមខ្លួនបោះឆ្នោតឲ្យលោក Melenchon។ Barcelona បានវាយបក PSG ៦-១ ក្នុងលទ្ធផលដ៏មិនគួរឲ្យជឿ ប៉ុន្តែលោក Charles Dayot មិនទាន់បំពេញការសន្យារបស់ខ្លួនឡើយ។
«ប្រសិនបើ Barcelona ឡើងទៅវគ្គបន្ត ខ្ញុំនឹងហូបសត្វកណ្តុរ ហើយខ្ញុំនឹងបោះឆ្នោតឲ្យលោក Melenchon!»។ លោក Charles Dayot អភិបាលរងក្រុង Mont-de-Marsan តំបន់ Landes ប្រទេសបារាំង ដែលទទួលបានបន្ទុកផ្នែកហិរញ្ញវត្ថុ បានសរសេរបែបនេះនៅលើហ្វេសប៊ុករបស់ខ្លួន នៅមុនការប្រកួតជើងទីមួយនៅវគ្គ១៦ក្រុមចុងក្រោយរវាង Barcelona និង PSG ជាដែលក្លិបសំណព្វរបស់គាត់។
ការសរសេររបស់ Charles Dayot ដោយលោកមានជំនឿខ្ពស់ទៅក្លិប Paris Saint German ដែលបានយកឈ្នះ Barcelona រហូតដល់ទៅ ៤-០ កាលពីជើងទីមួយ។ ប៉ុន្តែភាពភ្ញាក់ផ្អើលបានកើតឡើងនៅក្នុងកីឡាបាល់ទាត់ ដោយ២នាទីចុងក្រោយ បូកនឹងនាទីបន្ថែម Neymar បានស៊ុតបាល់បញ្ចូលទី២គ្រាប់ និង Sergi Roberto បន្ថែម១គ្រាប់ ដែលនាំឲ្យ Barcelona ឈ្នះ ៦-១ នៅទឹកដី Camp Nou។ សរុបទាំងពីរជើង Barcelona ឈ្នះ ៦-៥ ។
កាសែតបារាំង 20Minutes និង Sud Ouest បានសរសេចំអកថា អ្នកនយោបាយដូចជា លោក Charles Dayot មិនគួរយករឿងបែបនេះ មកសន្យានៅតាមបណ្តាញសង្គមនោះឡើយ។
មួយថ្ងៃក្រោយការប្រកួត អ្នកគាំទ្រក្លិប PSG រូបនេះ បានអះអាងថា លោកបានទទួលសារ និងអ៊ីម៉ែល ជាច្រើន។ «ខ្ញុំត្រូវបានបង្ខំឲ្យកណ្តុររបស់ខ្ញុំ... មិត្តភក្ត្រិខ្លះបានផ្ញើបញ្ជីមុខម្ហូបសាច់កណ្តុរឲ្យខ្ញុំ»។ នេះជាការលើកឡើងរបស់លោក Dayot។
អ្នកខ្លះបានសរសេរឌឺដងថា លោក Dayot គួរហូបកណ្តុរតាមផ្ទះ ប្រសើរជាងកណ្តុរស្រែ។ មន្ត្រីរូបនេះ មិនបានបញ្ជាក់ថា លោកនឹងគោរពតាមសន្យា ឬយ៉ាងណានោះទេ ដោយលោកគ្រាន់តែបញ្ជាក់ថា លោកមិនភ្លេចឡើយ។
ទាក់ទងនឹងការសន្យាថា លោកនឹងបោះឆ្នោតឲ្យលោក Jean-Luc Mélenchon ដែលជាបេក្ខជនម្នាក់ត្រូវប្រជែងតំណែងប្រធានាធិបតីបារាំងនាពេលខាងមុខ លោក Dayot បាននិយាយដោយខ្លីថា លោកនឹងមិនបោះឆ្នោតឲ្យលោក Melenchon ឡើយ៕
Tag:
បាល់ទាត់
Champions League
កណ្តុរ
© រក្សាសិទ្ធិដោយ thmeythmey.com