ជាតិ
សង្គមជាតិ
អាជ្ញាធរ មិនទាន់មានតម្រុយជនសង្ស័យពាក់ព័ន្ធបទល្មើសឈើនៅកំពង់ស្ពឺ
× អាជ្ញាធរ ហាក់មិនទាន់មានតម្រុយជនសង្ស័យ ពាក់ព័ន្ធនឹងបទល្មើសឈើ នៅខេត្តកំពង់ស្ពឺនៅឡើយ ខណៈប្រតិបត្តិការតាមចាប់ខ្លួន បានផ្តើមតាំងពីថ្ងៃទី១១ មីនាមក។ ជនសង្ស័យ ជាកូនប្រសា មន្ត្រី អាវុធហត្ថជាន់ខ្ពស់ម្នាក់នៅខេត្តកំពង់ស្ពឺ។
ប្រតិបត្តិការតាមចាប់ខ្លួនជនសង្ស័យជាកូនប្រសាមន្ត្រីអាវុធហត្ថជាន់ខ្ពស់ម្នាក់នៅខេត្តកំពង់ស្ពឺ ពាក់ព័ន្ធនឹងបទល្មើសឈើ បានចាប់ផ្តើមតាំងពីថ្ងៃទី១១ ខែមីនាមក។ ប៉ុន្តែមកដល់ពេលនេះ អាជ្ញាធរ ហាក់មិនទាន់មានតម្រុយ ពីជនសង្ស័យនៅឡើយ។
លោក អេង ហ៊ី អ្នកនាំពាក្យកងអាវុធហត្ថលើផ្ទៃប្រទេស បានថ្លែងប្រាប់សារព័ត៌មានថ្មីៗតាមទូរសព្ទថានៅថ្ងៃនេះយ៉ាងខ្លីដូច្នេះថា៖«គេកំពុងស៊ើបសួរហើយ»។
នាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស និងជាប្រធានគណៈកម្មការជាតិ ទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាឲ្យតាមចាប់ខ្លួនជនសង្ស័យ ជាកូនប្រសានាយរងសេនាធិការអាវុធហត្ថខេត្តកំពង់ស្ពឺ ក្រោយរកឃើញថាជាប់ពាក់ព័ន្ធនឹងបទល្មើសឈើ។
សូមបញ្ជាក់ថា កាលពីរសៀលថ្ងៃទី១១ ខែមីនា កម្លាំងសមត្ថកិច្ច បានឃាត់ទុករថយន្តដឹកឈើ ២គ្រឿង ជាបន្តបន្ទាប់ ដែលមានការអះអាងថាជាកម្មសិទ្ធិរបស់ឈ្មោះ ស៊ី ស ជាកូនប្រសារនាយរងសេនាធិការអាវុធហត្ថខេត្តកំពង់ស្ពឺនោះ។ ពេលឃាត់រថយន្តដឹកឈើនោះ សមត្ថកិច្ចក៏បានឃាត់អ្នកបើកបរថយន្តម្នាក់ដែរ ខណៈអ្នកបើកបរម្នាក់ទៀតគេចខ្លួនបាត់។ ក្រោយឃាត់រថយន្តទាំង២គ្រឿងនេះ កម្លាំងសមត្ថកិច្ច បានបន្តទៅឆែកឆេរឃ្លាំងស្តុកឈើរបស់ជនសង្ស័យ ស្ថិតនៅក្រុងច្បារមនទៀត និងបានរកឃើញកំណាត់ឈើជាច្រើនដុំទៀតផង។
យ៉ាងណាក៏ដោយ អ្នកនាំពាក្យកងអាវុធហត្ថលើផ្ទៃប្រទេស មិនបានបញ្ជាក់ថា តើកំណាត់ឈើ២រថយន្ត និងឈើដែលរកឃើញនៅក្នុងឃ្លាំងនោះមានប៉ុន្មានដុំ និងប៉ុន្មានម៉ែត្រគីបឡើយ។ លោក អេង ហ៊ី ថ្លែងថាលោកមិនទាន់ទទួលបានរបាយការណ៍លម្អិតនៅឡើយ៕
Tag:
បទល្មើស
ព្រៃឈើ
អេង ហ៊ី
© រក្សាសិទ្ធិដោយ thmeythmey.com