អន្តរជាតិ
ចិនសួរជប៉ុនថា «តើបញ្ជូននាវាចម្បាំងធំបំផុតទៅសមុទ្រចិនខាងត្បូងទៅធ្វើអ្វីឲ្យប្រាកដ?»
× ជប៉ុន គ្រោងនឹងបញ្ជូននាវាចម្បាំងធំបំផុតមួយរបស់ខ្លួនទៅបង្អួតសាច់ដុំយោធានៅតំបន់ជម្លោះសមុទ្រចិនខាងត្បូងនៅខែឧសភាខាងមុខ។ ចិន សង្ស័យខ្លាំង ទោះជប៉ុនបញ្ជាក់ថា គោលដៅរបស់នាវាខ្លួនគឺឈប់សំចតនៅរដ្ឋមួយចំនួនរបស់អាស៊ាន មុននឹងចេញដំណើរទៅកាន់មហាសមុទ្រឥណ្ឌា ដើម្បីចូលរួមសមយុទ្ធជើងទឹកជាមួយអាមេរិក និងឥណ្ឌា។ ចិន ក៏ចង់បានការបកស្រាយពីជប៉ុនជាក់លាក់ជុំវិញរឿងនេះដែរ។
នាវាដឹកឧទ្ធម្ភាគចក្រជប៉ុន Izumo នឹងចាប់ផ្តើមដំណើររបស់ខ្លួននាខែឧសភាខាងមុខដោយនាវានេះចូលសំចតនៅកំពង់ផែសិង្ហបុរី, ឥណ្ឌូណេស៊ី, ហ្វីលីពីន និងស្រីលង្ការ។ នាវាដ៏ធំនេះ នឹងឆ្លងកាត់តំបន់ជម្លោះសមុទ្រចិនខាងត្បូង ដែលជាដែនសមុទ្រប្រទាញប្រទង់រវាងចិន និងប្រទេសបួនទៀត។ ចិន មិនសប្បាយចិត្តឡើយ ពេលលឺព័ត៌មាននេះ ព្រោះជឿថា ជប៉ុនហាក់ព្យាយាមចូលលូកដៃកាន់តែជ្រៅចូលក្នុងបញ្ហាជម្លោះសមុទ្រចិនខាងត្បូង ទាំងដែលខ្លួនមិនមានជាប់ពាក់ព័ន្ធអ្វីសោះនោះ។
ក្នុងសន្និសីទកាសែតថ្ងៃទី១៤ ខែមីនា លោកស្រី Hua Chunying អ្នកនាំពាក្យក្រសួងការបរទេសចិននិយាយថា ចិនមិនទាន់ទទួលបានព័ត៌មានផ្លូវការណាមួយពីសំណាក់ជប៉ុននៅឡើយ ជុំវិញគម្រោងឆ្លងកាត់របស់នាវាដ៏ធំជប៉ុន។ ពោល គឺចិនទាន់មិនដឹងថា នាវា Izumo គ្រាន់តែទៅសមុទ្រចិនខាងត្បូងដើម្បីឈប់សំចតនៅតាមរដ្ឋសមាជិក ឬមានគោលដៅអ្វីផ្សេងឡើយ។
បើតាមអ្នកនាំពាក្យរូបនេះ ចិនមិនជំទាស់ទេ បើនាវាជប៉ុនគ្រាន់តែបំពេញទស្សនកិច្ចធម្មតា និងឆ្លងកាត់សមុទ្រចិនខាងត្បូងនោះ។ ហើយចិនមានតែសង្ឃឹមថា ការផ្លាស់ប្ដូរទស្សនកិច្ចបែបនេះ នឹងជួយពង្រឹងសន្តិភាព និងស្ថិរភាពក្នុងតំបន់។ ប៉ុន្តែបើនាវាជប៉ុនទៅក្នុងគោលដៅផ្សេង វានឹងក្លាយជារឿងផ្សេង ព្រោះកន្លងមកជប៉ុន តែងបង្កបញ្ហានៅសមុទ្រចិនខាងត្បូងដែរ ហើយចិនសង្ឃឹមថា ជប៉ុនជួយរក្សាសន្តិភាពក្នុងតំបន់ដែរ។
Izumo ជានាវាចម្បាំងនិងជានាវាដឹកឧទ្ធម្ភាគចក្ររបស់ជប៉ុន ត្រូវបានដាក់ឲ្យបម្រើកងទ័ពជប៉ុនកាលពី២ឆ្នាំមុននោះ។ Izumo មានប្រវែង ២៤៩ម៉ែត្រ ហើយវាជានាវាធំបំផុតដែលជប៉ុនមាន និងជាប្រភេទនាវាសម័យសង្គ្រាមលោកលើកទី ២។ នាវានេះអាចផ្ទុកឧទ្ធម្ភាគចក្របាន ៩គ្រឿងប៉ុណ្ណោះ ហើយរដ្ឋាភិបាលជប៉ុនបានកែច្នៃទៅជានាវាចម្បាំង ដ្បិតតែរដ្ឋធម្មនុញ្ញសន្តិភាពជប៉ុនមិនអនុញ្ញាតឲ្យជប៉ុនទិញ ឬផលិតសព្វាវុធសម្រាប់ប្រយុទ្ធឡើយ។
អ្វីដែលសំខាន់ នាវា Izumo នេះមានសមត្ថភាពចម្បងបំផុតក្នុងការបំពេញប្រតិបត្តិការប្រឆាំងនាវាមុជទឹកផងដែរ។ ទាក់ទងគម្រោងទស្សនកិច្ច នាវា Izumo នឹងសំចតរដ្ឋសមាជិកអាស៊ាន រហូតដល់ខែកក្កដាទើបនឹងបន្តដំណើរទៅកាន់មហាសមុទ្រឥណ្ឌា ដើម្បីចូលរួមលំហាត់យោធា Malabar ជាមួយកងទ័ពជើងទឹកអាមេរិកនិងកងទ័ពឥណ្ឌាផងដែរ។ នៅខែសីហា នាវាចម្បាំងជប៉ុននឹងត្រឡប់ទៅកាន់ប្រទេសជប៉ុនវិញផងដែរ៕
Tag:
ចិន
ជប៉ុន
សមុទ្រចិនខាងត្បូង
© រក្សាសិទ្ធិដោយ thmeythmey.com