អន្តរជាតិ
ជម្លោះសមុទ្រចិនខាងត្បូង៖ ចិនប្រាប់ជប៉ុនថា បើមិនជួយចូកជួយចែវ កុំយកជើងរាទឹក អ្នកនាំពាក្យក្រសួងការបរទេសចិន Hua Chunying (រូបថតពីវ៉េបសាយក្រសួងការបរទេសចិន)
× ក្រុងប៉េកាំង បានប្រកាសថា ខ្លួននឹងឆ្លើយតបម៉ឺងម៉ាត់មួយ បើក្រុងតូក្យូនៅតែពន្យុះឲ្យស្ថានការណ៍នៅសមុទ្រចិនខាងត្បូងកាន់តែតានតឹង និងធ្វើសកម្មភាពដែលប៉ះពាល់អធិបតេយ្យរបស់ចិន។ ការប្រកាសនេះ ធ្វើឡើងបន្ទាប់មានរបាយការណ៍ថា ជប៉ុននឹងបញ្ជូននាវាធំជាងគេបំផុតទៅកាន់សមុទ្រចិនខាងត្បូង ហើយហួសដំណើរឆ្ពោះទៅមហាសមុទ្រឥណ្ឌា។ ចិននៅមានមន្ទិលសង្ស័យលើគោលដៅពិតប្រាកដនៃការបញ្ជូននាវានេះ និងជឿថាជាការសម្ញែងឫទ្ធិយោធា ដែលអាចបង្កើនកម្ដៅជម្លោះ។
គម្រោងបញ្ជូននាវាធំបំផុតរបស់ជប៉ុនដែលឆ្លងកាត់សមុទ្រចិនខាងត្បូងសំដៅមហាសមុទ្រឥណ្ឌា កំពុងបញ្ឆេះកំហឹងរដ្ឋាភិបាលចិនយ៉ាងខ្លាំង។ ចិន មិនពេញចិត្តទាល់តែសោះសកម្មភាពរបស់ជប៉ុននៅតំបន់ជម្លោះសមុទ្រចិនខាងត្បូង ទាំងខ្លួនមិនមែនជាភាគីពាក់ព័ន្ធអ្វីទាំងអស់។ ចិន ក៏ប្រាប់ឲ្យជប៉ុន ដកខ្លួនចេញពីជម្លោះនេះ និងមិនត្រូវធ្វើអ្វីដែលនាំឲ្យជម្លោះរាលដាលឡើយ។
ក្នុងសន្និសីទកាសែតប្រចាំថ្ងៃទី១៦ ខែមីនា លោកស្រី Hua Chunying អ្នកនាំពាក្យក្រសួងការបរទេសចិន និយាយថា ជប៉ុនតែងតែគិតពីផលប្រយោជន៍ខ្លួនឯង ដើរបញ្ឆេះកំហឹង និងបង្កការបែកបាក់ក្នុងសំណុំរឿងសមុទ្រចិនខាងត្បូង។ លោកស្រី ទំនងជាចង់សំដៅដល់ជំហររបស់ជប៉ុន ដែលរិះគន់ចិនរហូតមក ហើយថ្មីៗនេះទៀត មានគម្រោងបញ្ជូននាវាចម្បាំងធំបំផុតរបស់ខ្លួនមកកាន់តំបន់ជម្លោះក្ដៅគគុកនេះ។
អ្នកនាំពាក្យខាងលើនេះ បន្តថា សកម្មភាពរបស់ជប៉ុន ធ្វើឲ្យប្រជាជនចិនខឹងសម្បារ និងជំទាស់យ៉ាងខ្លាំង។ លោកស្រីថែមទាំងព្រមានថា បើជប៉ុនបន្តសកម្មភាពបែបនេះទៀត ឬក៏ដល់ថ្នាក់ធ្វើសកម្មភាពយោធាណាមួយមកក្នុងជម្លោះសមុទ្រចិនខាងត្បូង ដែលអាចប៉ះពាល់អធិបតេយ្យនិងសន្តិសុខចិន ឬក៏បំផ្លាញស្ថិរភាពតំបន់ ក្រុងប៉េកាំងនឹងឆ្លើយតបម៉ឺងម៉ាត់បំផុត។
លោកស្រី Hua Chunying ក៏បានរម្លឹកជប៉ុនដែរថា ខ្លួនមិនមែនជាភាគីដែលត្រូវព្រួយបារម្ភរឿងជម្លោះទឹកដីសមុទ្រចិនខាងត្បូងឡើយ ហើយជប៉ុនក៏មានប្រវត្តិអាក្រក់គ្រប់គ្រងកោះ Xisha និងកោះ Nansha កាលពីសម័យសង្គ្រាមផងដែរ។ ដូច្នេះ ក្រុងតូក្យូ គួររៀនពីប្រវត្តិសាស្ត្ររបស់ខ្លួន និងមិនគួរអួតអាងសម្ភារយោធាអ្វីឡើយ។ ហើយជប៉ុន ក៏មិនត្រូវធ្វើអ្វីដែលបង្កអស្ថិរភាព និងការបែកបាក់នៅក្នុងតំបន់អ្វីទេ។
នៅមុននេះ ក្រុងប៉េកាំងក៏បានស្នើរកការបកស្រាយផ្លូវការពីសំណាក់ជប៉ុន ជុំវិញគម្រោងឆ្លងកាត់របស់នាវាដ៏ធំជប៉ុន។ ចិនសង្ស័យថា នាវាដឹកឧទ្ធម្ភាគចក្រ Izumo មិនមែនគ្រាន់តែទៅសមុទ្រចិនខាងត្បូងដើម្បីឈប់សំចតនៅតាមរដ្ឋសមាជិកអាស៊ានដូចការផ្សាយរបស់សារព័ត៌មាននានាឡើយ។ ចិន មិនជំទាស់ទេ បើនាវាជប៉ុនគ្រាន់តែបំពេញទស្សនកិច្ចធម្មតា និងឆ្លងកាត់សមុទ្រចិនខាងត្បូងនោះ។ ប៉ុន្តែបើនាវាជប៉ុនទៅក្នុងគោលដៅផ្សេង វានឹងក្លាយជាបញ្ហាដែលត្រូវឆ្លើយតបមិនខាន៕
Tag:
ចិន
ជប៉ុន
សមុទ្រចិនខាងត្បូង
Hua Chunying
© រក្សាសិទ្ធិដោយ thmeythmey.com