ក្រោយគំរាមកម្ទេចអាមេរិក កូរ៉េខាងជើងបាញ់មីស៊ីលមួយគ្រាប់ទៀត តែមិនជោគជ័យ

អន្តរជាតិ

ក្រោយគំរាមកម្ទេចអាមេរិក កូរ៉េខាងជើងបាញ់មីស៊ីលមួយគ្រាប់ទៀត តែមិនជោគជ័យ

22, Mar 2017 , 10:42 am

រូបភាព

ដោយ: តន ចាន់រិទ្ធារ៉ា

ក្រសូងការពារជាតិកូរ៉េខាងត្បូង និយាយថា កូរ៉េខាងជើងបានបាញ់សាកល្បងមីស៊ីលនៅព្រឹកថ្ងៃទី២២ ខែមីនា ចេញពីតំបន់ឆ្នេរភាគខាងកើតរបស់ខ្លួន។ ប៉ុន្តែការបាញ់សាកល្បងនេះ ទំនងជាមិនជោគជ័យឡើយ ខណៈដែលយោធាកូរ៉េខាងត្បូងកំពុងសិក្សាប្រភេទមីស៊ីលដែលបាញ់លើកនេះ។

បន្ទាប់ពីគំរាមកម្ទេចអាមេរិកឲ្យក្លាយជាផេះផង់ កូរ៉េខាងជើងក៏បានបាញ់មីស៊ីលមួយគ្រាប់ ផ្គើនអន្តរជាតិប៉ុន្តែមិនជោគជ័យ។ វាជារឿងអាម៉ាសមួយដែរ ប៉ុន្តែគេដឹងច្បាស់ថា ចេតនានៃការបាញ់សាកល្បងមីស៊ីលនេះជាការព្យាយាមបង្អួតនិងកំញើញគេឯងក្នុងតំបន់។ ក្នុងសេចក្ដីប្រកាសរបស់ក្រសួងការពារជាតិកូរ៉េខាងត្បូង កូរ៉េខាងជើងបាញ់មីស៊ីលចេញពីមូលដ្ឋានទ័ពអាកាស Wonsan នៅថ្ងៃទី២២ ខែមីនា។

បើតាមទីភ្នាក់ងារព័ត៌មាន Yonhap ក្រសួងការពារជាតិកូរ៉េខាងត្បូង កំពុងប្រមូលព័ត៌មានលម្អិតទាក់ទងការបាញ់នេះ រួមទាំងការប្រភេទមីស៊ីលផងដែរ។ ម្យ៉ាងទៀត យោធាកូរ៉េខាងត្បូង ក៏មិនទាន់អាចបញ្ជាក់ថា មីស៊ីលដែលបាញ់នោះ ផ្ទុះលើអាកាស ឬយ៉ាងណាដែរ។ ប៉ុន្តែកងទ័ពកូរ៉េខាងត្បូង ត្រៀមខ្លួនរួចស្រេចដើម្បីទប់ទល់សកម្មភាពព្រហើនរបស់កូរ៉េខាងជើង រួមទាំងការបាញ់មីស៊ីលផងនោះ។

នេះជាការបាញ់មីស៊ីលលើកទី២ របស់កូរ៉េខាងជើងក្នុងខែមីនានេះ។ ក្នុងការបាញ់លើកទី១ មីស៊ីលចំនួន៤គ្រាប់ត្រូវបានបាញ់ចេញពីតំបន់ក្បែរចិន ហើយក្នុងនោះ៣គ្រាប់ ធ្លាក់ចូលសមុទ្រជប៉ុន។ នៅមុននេះ កូរ៉េខាងជើង ក៏ទើបតែទទួលជោគជ័យក្នុងការសាកល្បងម៉ាស៊ីនបាញ់រ៉ុក្កែត ដែលព្យុងយ៉ាងអះអាងថា ជាជំហានរីចម្រើននៃសមត្ថភាពយោធារបស់ខ្លួន៕