មេដឹកនាំពិភពលោកប្រកាសឈរជាមួយប្រជាជនអង់គ្លេសក្រោយការវាយប្រហារក្រុងឡុងដ៍

អន្តរជាតិ

មេដឹកនាំពិភពលោកប្រកាសឈរជាមួយប្រជាជនអង់គ្លេសក្រោយការវាយប្រហារក្រុងឡុងដ៍

23, Mar 2017 , 11:04 am

រូបភាព

ដោយ: ថ្មីៗ

មេដឹកនាំពិភពលោកបានបញ្ចេញសារថ្កោលទោស ករណីវាយប្រហារនៅទីក្រុងឡុងដ៍ នាថ្ងៃ ២២ មីនាម្សិលមិញ ដែលបណ្តាលឲ្យមនុស្សស្លាប់យ៉ាងហោច ៤នាក់ និងជាង ៤០នាក់ផ្សេងរងរបួសផងដែរនោះ។ ពួកគេក៏ប្រកាសឈរនៅជាមួយប្រជាជន និងរដ្ឋាភិបាលអង់គ្លេស ដើម្បីប្រឈម និងប្រឆាំងចលនាភេរវកម្មអន្តរជាតិនេះ រួមគ្នាផងដែរ។

ការវាយប្រហារនៅកណ្តាលទីក្រុងឡុងដ៍ របស់អង់គ្លេស បានធ្វើឲ្យតក់ស្លុត និងភ្ងាក់ផ្អើលខ្លាំង។ មេដឹកនាំប្រទេសជាច្រើន បាននាំគ្នាថ្កោលទោសករណី «ភេរវកម្ម»នេះ ហើយក៏បង្ហាញជំហរគាំទ្រ និងការសាមគ្គី ជាមួយប្រជាជនអង់គ្លេសផងដែរ។

សូមឆ្លៀតរៀបរាប់បន្តិចឡើងវិញ ពីករណីវាយប្រហារនេះ។ បុរសដែលជាឧក្រិដ្ឋជននោះ បានបើកឡានបុករះមនុស្សលើស្ពាន Westminster ហើយបន្តបុករបងសភាទៀត ដោយបង្កឲ្យមនុស្សយ៉ាងតិច ៤នាក់ស្លាប់ និងជាង៤០នាក់ទៀតរបួស។ បន្ទាប់មកជននោះ បានយកកំបិតកាប់ប៉ូលិសម្នាក់ ដែលស្ថិតនៅក្នុងសភាតែម្តង។ ក្រោយការវាយប្រហារភា្លម ប៉ូលិសអង់គ្លេសសន្និដ្ឋានជាបឋមថា ករណីវាយប្រហារនេះ ជាករណីភេរវកម្ម។ អ្វីដែលគួរឲ្យភ្ងាក់ផ្អើលនោះ គឺករណីវាយប្រហារនេះ កើតឡើងចំថ្ងៃតែមួយ ជាមួយការវាយប្រហារនៅក្រុងព្រុចសែល កាលពីឆ្នាំមុនដែរ។

ដោយឡែក យោងតាមទីភ្នាក់ងារព័ត៌មាន មេដឹកនាំដែលប្រកាសថ្កោលទោសករណីភេរវកម្ម និងឈរប្រកៀកស្មា ជាមួយប្រជាជនអង់គ្លេស ក្នុងកាលៈទេសៈអាសន្ននេះមានដូចជា៖

-អាល្លឺម៉ង់៖ អធិការបតីអាឡឺម៉ង់លោកស្រី អែនជេឡា មឺហ្កែល បានលើកឡើងថា អាល្លឺម៉ង់ឈរប្រកៀកស្មាយ៉ាងរឹងមាំ ជាមួយប្រជាជនអង់គ្លេស ដើម្បីប្រឆាំងរាល់ចលនាភេរវកម្ម។

-បារំាង៖ ប្រធានាធិបតីបារាំងលោកហ្វ្រង់ស្វ័រហូឡង់ បានផ្ញើសារបង្ហាញការសាមគ្គី និងគាំទ្រប្រជាជនអង់គ្លេស ហើយបារាំងយល់ច្បាស់ ពីទុក្ខលំបាក និងភាពឈឺចាប់របស់ប្រជាជនអង់គ្លេស ព្រោះបារាំងធ្លាប់ឆ្លងកាត់រួចហើយ។ អ្វីដែលសំខាន់ សិស្សវិទ្យាល័យបារាំងម្នាក់ ក៏ស្ថិតក្នុងចំណោមជនរងគ្រោះ នៃការវាយប្រហារនៅអង់គ្លេសនេះដែរ។

-សហរដ្ឋអាមេរិក៖ អ្នកនាំពាក្យសេតវិមានអាមេរិក Sean Spicer បានថ្កោលទោសការវាយប្រហារនៅអង់គ្លេស និងប្តេជ្ញាចិត្តជួយគាំទ្រអង់គ្លេស ដើម្បីឆ្លើយតបករណីវាយប្រហារនេះ និងស្វែងរកជនបង្កបញ្ហា និងអ្នកពាក់ព័ន្ធមកកាត់ទោសផងដែរ។

-កាណាដា៖ នាយករដ្ឋមន្ត្រីកាណាដា Justin Trudeau បានបង្ហោះតាមគណនី twitter ផ្លូវការរបស់ខ្លួនថា៖«ចិត្តរបស់យើង នៅជាមួយប្រជាជនដែលជាជនរងគ្រោះក្នុងការវាយប្រហារនៅអង់គ្លេស និងក្រុមគ្រួសារ។ ប្រជាជនកាណាដា នឹងបន្តរួបរួមគ្នា ជាមួយប្រជាជនអង់គ្លេស ក្នុងកាលៈទេសៈដ៏លំបាកនេះ»។

-សហភាពអឺរ៉ុប៖ ប្រធានគណៈកម្មការអឺរ៉ុបលោក ហ្សង់ក្លូ ចាំងកឺ បានថ្លែងថា ការវាយប្រហារនេះ ធ្វើឲ្យលោកស្លុតចិត្តខ្លាំង។ លោកបានសង្កត់ធ្ងន់ថា លោកតក់ស្លុតដោយសារ ការវាយប្រហារនៅអង់គ្លេសនេះ កើតឡើងនៅថ្ងៃតែមួយជាមួយការវាយប្រហារ នៅក្រុងព្រុចសែល កាលពីឆ្នាំមុន។

ចំណែកប្រធានក្រុមប្រឹក្សាអឺរ៉ុប លោក ដូណាល់ ទុស្គ (Donald Tusk) វិញបានប្រកាសថា សហភាពអឺរ៉ុប ឈរនៅជាមួយប្រជាជនអង់គ្លេស ដើម្បីប្រឆាំងរាល់សកម្មភាពភេរវកម្ម និងត្រៀមខ្លួនជួយអង់គ្លេសជាស្រេច។

-រុស្ស៊ី៖ អ្នកនាំពាក្យសួងការបរទេសរុស្ស៊ី លោកស្រី Maria Zakharova បានថ្លែងសាររម្លែកទុក្ខ ជាមួយប្រជាជនអង់គ្លេសតាមកញ្ចក់ទូរទស្សន៍រដ្ឋរុស្ស៊ី និងបញ្ជាក់ថារុស្ស៊ី យល់ពីក្តីឈឺចាប់របស់ប្រជាជនអង់គ្លេសច្បាស់។ មិនត្រឹមតែប៉ុណ្ណោះទេ រុស្ស៊ីបានឆ្លៀតអំពាវនាវឲ្យមានការសហការ និងរួបរួមគ្នាជាធ្លុងមួយ ដើម្បីឈានទៅប្រយុទ្ធប្រឆាំងភេរវកម្មរួមគ្នា។

ក្រៅពីប្រទេសទាំងអស់ខាងលើ គេឃើញប្រទេសឯទៀតដូចជា ក្រិក, ហូឡង់, អ៊ីតាលី,អូស្ត្រាលី, កាតា, បែលហ្ស៊ិក, តួកគី, ព័រទុយហ្កាល់, អេស្ប៉ាញ និងវេណេហ្ស៊ុយអេឡាផងដែរ ដែលបានចេញសារថ្កោលទោស រំលែកទុក្ខ និងប្តេជ្ញាគាំទ្រ និងឈរជាមួយប្រជាជនអង់គ្លេសដែរ៕