ពីនេះ ពីនោះ
គប្បីអាន ពាក្យឧទ្ធរណ៍ ថា «អ៊ុត-ធ» មិនមែន «អ៊ុត-ទ» ឡើយ
× ភ្នំពេញ៖ វចនានុក្រមសម្តេច ជួន ណាត បានប្រាប់របៀបអានពាក្យ «ឧទ្ធរណ៍» ថា «អ៊ុត-ធ»។ ចំណែកឯ ការអានថា «អ៊ុត-ទ» វិញ គឺមិនត្រឹមត្រូវ ឡើយ។
ឧទ្ធរណ៍ មានន័យថា ការរើឡើង, ការសើរើ, ការរើធ្វើជាថ្មីទៀត។ យើងប្រើពាក្យនេះ ជាឈ្មោះសាលតុលាការទីពីរ ដែលហៅថា «សាលាឧទ្ធរណ៍»។ នេះបើតាមការពន្យល់នៅក្នុងវចនានុក្រមសម្តេច ជួន ណាត ដដែល។
សាលាឧទ្ធរណ៍ អាចសើរើ ហើយជំនុំជម្រះឡើងវិញ ចំពោះរឿងក្តីណា ដែលភាគីម្ខាង មិនសុខចិត្តនឹងការសម្រេចរបស់ចៅក្រមនៃសាលាដំបូង។ ឧទាហរណ៍ថា៖«ខ្ញុំ មិនអាចទទួលយកបានទេ ចំពោះសាលក្រមរបស់សាលាដំបូង។ ដូច្នេះ ខ្ញុំ សម្រេចឲ្យមេធាវីរបស់ខ្ញុំ ដាក់បណ្តឹងទៅកាន់សាលាឧទ្ធរណ៍ ដើម្បីសុំជំទាស់នឹងសាលក្រមរបស់សាលាដំបូង»។
តាមរយៈការបកស្រាយខាងលើ ដោយយកវចនានុក្រមសម្តេច ជួន ណាត ជាសំអាង ពលរដ្ឋខ្មែរទាំងអស់ គប្បីនិយាយពាក្យ «ឧទ្ធរណ៍» ថា «អ៊ុត-ធ» មិនមែន «អ៊ុត-ទ» នោះទេ៕
Tag:
ពន្យល់ពាក្យ
ឧទ្ធរណ៍
© រក្សាសិទ្ធិដោយ thmeythmey.com