ជាតិ
រដ្ឋាភិបាល ពិភាក្សាលើសេចក្តីព្រាងច្បាប់ ការពារផលិតកម្មក្នុងស្រុក ពីផលប៉ះពាល់នៃការលក់បន្ទាបថ្លៃទំនិញ
× ភ្នំពេញ៖ នៅព្រឹកថ្ងៃទី២៤ មីនានេះ រដ្ឋាភិបាល ពិភាក្សាលើសេចក្ដីព្រាងច្បាប់ស្តីពីឧបាស្រ័យពាណិជ្ជកម្ម សម្រាប់ការពារដល់ផលិតកម្ម និងឧស្សាហកម្មក្នុងស្រុក ពីផលប៉ះពាល់នៃការលក់បន្ទាបតម្លៃខុសប្រក្រតី នៃទំនិញដែលនាំចូលមកលក់នៅក្នុងប្រទេសកម្ពុជា។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានឲ្យដឹងថា ច្បាប់ស្តីពីឧបាស្រ័យពាណិជ្ជកម្មនេះនឹងជួយការពារនូវផលិតកម្ម និងឧស្សាហកម្មក្នុងស្រុក ពីការហូរចូលយ៉ាងគំហុកនៃផលិតផលបរទេសមកកាន់ទីផ្សារកម្ពុជា ដែលជាបច្ច័យមិនល្អ ដោយបង្កឲ្យមានការខូចខាតធ្ងន់ធ្ងរ ឬគំរាមគំហែងដល់ឧស្សាហកម្មក្នុងស្រុក។
អ្នកនាំពាក្យរូបនេះបានសរសេរពន្យល់នៅលើហ្វេសប៊ុកខ្លួនថា៖«ច្បាប់នេះមានគោលបំណងការពារនិងដោះស្រាយផលប៉ះពាល់ជាអវិជ្ជមានចំពោះឧស្សាហកម្មកម្ពុជា បណ្តាលមកពីការធើ្វពាណិជ្ជកម្មនាំចូលដោយមិនស្មោះត្រង់និងការនាំចូលដោយគំហុក ដោយប្រើប្រាស់វិធានការឧបាស្រ័យពាណិជ្ជកម្ម អនុលោមតាមកិច្ចព្រមពៀងពាក់ព័ន្ធរបស់អង្គការពាណិជ្ជកម្មពិភពលោក»។
លោក ស៊ីផាន បានបន្ថែមថា៖«ច្បាប់នេះនឹងផ្តល់លទ្ធភាព ក្នុងការដំឡើងអត្រាពន្ធឧបាស្រ័យពាណិជ្ជកម្ម ទៅលើផលិតផល នាំចូលដែលអាចបង្កមហន្តរាយដល់ផលិតកម្ម និងឧស្សាហកម្មកម្ពុជា លើសពីអត្រាពន្ធដែលកម្ពុជាបានចងក្រង និងបានសន្យា នៅក្នុងក្របខ័ណ្ឌអង្គការពាណិជ្ជកម្មពិភពលោកប្រសិនបើចាំបាច់»។
បើតាមលោក ផៃ ស៊ីផាន ការបង្កើតច្បាប់នេះ ក៏ជាការផ្តល់ទំនុកចិត្ត និងធើ្វជាខែលការពារវិនិយោគិនក្នុងស្រុក និងបរទេសដែលបានបណ្តាក់ទុននៅកម្ពុជា តាមរយៈការដាក់ចេញនូវគោលការណ៍ យន្តការនិងនីតិវិធីនានា សម្រាប់ជួយធានាដល់ការប្រក្រតួប្រជែងដោយសុចរិត និងស្មោះត្រង់ រវាងផលិតករ និងពាណិជ្ជករដែលផលិត និងលក់ផលិតផលក្នុងស្រុក ជាមូយនិងផលិតករបរទេស និងពាណិជ្ជករ ដែលបាននាំចូលផលិតផលដូចគា្នមកលក់នៅកម្ពុជាផងដែរ។
ខាងក្រោមនេះជាវាក្យសព្ទសំខាន់ៗដែលប្រើក្នុងច្បាប់ឧបាស្រ័យពាណិជ្ជកម្មនេះ ដោយមាននិយមន័យដូចតទៅ៖
-ឧបាស្រ័យពាណិជ្ជកម្ម សំដៅដល់ វិធានការប្រឆាំងនិងការលក់បង្ខូចថៃ្ល ,ការឧបត្តម្ភធននិងវិធានការពន្ធប៉ះប៉ូវ និង វិធានការការពារ។
- ពន្ធឧបាស្រ័យពាណិជ្ជកម្ម សំដៅដល់ពន្ធដែលត្រូវបានអនុវត្តចំពោះផលិតផលនាំចូល ដែលជាលទ្ធផលនៃការស៊ីបអងេ្កតប្រឆាំងនឹងការលក់បង្ខូចថៃ្លឬការការពារ។
- គណៈកម្មាធិការជាតិឧបាស្រ័យពាណិជ្ជកម្ម សំដៅដល់អាជ្ញាធរមានសមត្តកិច្ចដែលដឹកនាំការស៊ីបអងេ្កតបញ្ហាពាក់ព័ន្ធនឹងវិធានការប្រឆាំងនឹងការលក់បង្ខូចថៃ្ល ការឧត្តម្ភធននិងវិធានការពន្ធប៉ះប៉ូវ និងវិធានការការពារ៕
Tag:
រដ្ឋាភិបាល
ហ៊ុន សែន
ផៃ ស៊ីផាន
ពាណិជ្ជកម្ម
© រក្សាសិទ្ធិដោយ thmeythmey.com