កីឡាជាតិ
ជាតិ
មុនប៉ះកម្ពុជា ហ្សកដានី យកឈ្នះជាបន្តបន្ទាប់លើហ្សកហ្ស៊ី និងហុងកុងក្នុងជំនួបមិត្តភាព ក្រុមកីឡាបាល់ទាត់ជម្រើសជាតិហ្សកដានីពេលហ្វឹកហាត់។ រូបថត Jordan Football
×
ក្រុមកីឡាបាល់ទាត់ជម្រើសជាតិហ្សកដានី គឺជាក្រុមដែលមានកម្រិតខ្ពស់ជាងគេនៅក្នុងពូល C សម្រាប់ការប្រកួតវគ្គជម្រុះ AFC Asian Cup ឆ្នាំ២០១៩ ។ នៅមុនបើកទ្វារកីឡដ្ឋាន King Abdullah II Stadium ទទួលកម្ពុជានាថ្ងៃទី២៨ ខែមីនា ខាងមុខ ហ្សកដានី បានយកឈ្នះជាបន្តបន្ទាប់លើ ហ្សកហ្សី ១-០ និងហុងកុង ៤-០ ក្នុងជំនួបមិត្តភាពអន្តរជាតិ។
ហ្សកដានី បច្ចុប្បន្នស្ថិតនៅចំណាត់ថ្នាក់១១៥ក្នុង FIFA Ranking បានទទួលជ័យជម្នះ ១-០ លើហ្សកហ្ស៊ី ដែលស្ថិតនៅភូមិភាគកូកាស តំបន់អឺរ៉ាស៊ី នាជំនួបមិត្តភាពអន្តរជាតិ កាលពីខែមករា កន្លងមក។ ជំនួបដែលរៀបចំនៅទីក្រុងឌូបៃ ប្រទេសអារ៉ាប់រួមអេមីរ៉េត នាពេលនោះ ខ្សែប្រយុទ្ធ Hamza Al-Dardour ដែលលេងឲ្យក្លិប Al-Ramtha SC បានស៊ុតបាល់បញ្ចូលទីនាំជ័យជម្នះដល់ហ្សកដានី ១-០ នៅចុងតង់ទីមួយ។
កាលពីថ្ងៃទី២៣ ខែមីនា ហ្សកដានីក្រោមការដឹកនាំរបស់គ្រូបង្វឹកជនជាតិអារ៉ាប់រួមអេមីរ៉េត លោក Abdullah Mesfer បានយកឈ្នះហុងកុង ៤-០ នាជំនួបមិត្តភាពអន្តរជាតិលើកទីពីរប្រចាំឆ្នាំ២០១៧ នៅកីឡដ្ឋាន King Abdullah II Stadium។ កីឡាករ Yaseen Al-Bakhit, Hamza Al-Dardour, Musa Al-Taamari និង Tha'er Bawab នៃក្លិបកំពូលរូម៉ានី Dinamo București បានស៊ុតបាល់បញ្ចូលទីជាបន្តបន្ទាប់សម្រាប់ហ្សកដានី។
កម្ពុជា និងហ្សកដានីដែលស្ថិតនៅតំបន់អាស៊ីខាងលិច មិនដែលមានប្រវត្តិជួបគ្នាឡើយក្នុងព្រឹត្តិការណ៍អន្តរជាតិ។ សម្រាប់កម្ពុជា ការប្រកួតមិត្តភាពពីរលើកនៅឆ្នាំ២០១៧ ពួកគេបានចាញ់អារ៉ាប៊ីសាអូឌីត ៧-២ នាជំនួបមិត្តភាពនៅទីក្រុងអាប៊ូដាប៊ី ប្រទេសអារ៉ាប់រួមអេមីរ៉េត កាលពីខែមករា ក្រោមការដឹកនាំចុងក្រោយរបស់គ្រូបង្វឹកកូរ៉េខាងត្បូង លោក Lee Tae Hoon។ កាលពីថ្ងៃទី២២ ខែមីនា ពួកគេបានចាញ់ឥណ្ឌា ៣-២ នៅពហុកីឡដ្ឋានជាតិ ជាមួយនឹងទម្រង់លេងដ៏គួរឲ្យកត់សម្គាល់ក្រោមការដឹកនាំគ្រូប្រេស៊ីល Leonardo Vitorino៕
Tag:
បាល់ទាត់
ជម្រើសជាតិកម្ពុជា
AFC Asian Cup
© រក្សាសិទ្ធិដោយ thmeythmey.com