អន្តរជាតិ
Duterte៖«អាមេរិកនៅឯណា ម៉េចមិនព្រមមកទប់កុំឲ្យចិនសង់កោះនៅសមុទ្រចិនខាងត្បូងតាំងពីយូរ?» ប្រធានាធិបតីហ្វីលីពីន Rodrigo Duterte ដែលតែងនិយាយរិះគន់អាមេរិកមិនសំចៃមាត់ (រូបថត Reuters)
× ចិនសាងសង់កោះសិប្បនិម្មិតច្រើននៅតំបន់សមុទ្រចិនខាងត្បូង ដែលបង្កជាការតានតឹងខ្លាំងក្នុងតំបន់ជម្លោះអធិបតេយ្យនេះ។ ប៉ុន្តែប្រធានាធិបតីហ្វីលីពីន Rodrigo Duterte ដែលងាកទៅជិតស្និទ្ធជាមួយចិន ហើយមិនបានបន្ទោសចិនលើរឿងបង្កការក្ដៅក្រហាយនេះឡើយ តែបែរជាទម្លាក់កំហុសលើអាមេរិកទៅវិញ។ លោក Duterte បន្ទោសអាមេរិកថា មិនធ្វើអ្វីសោះទាំងដឹងថាចិនធ្វើសកម្មភាពនៅសមុទ្រចិនខាងត្បូង រហូតធ្វើឲ្យស្ថានការណ៍យ៉ាប់យ៉ឺនដូចសព្វថ្ងៃ។
«ហេតុអ្វីអាមេរិកមិនស្ដីឲ្យចិន? ហេតុអ្វីអាមេរិកបញ្ជូននាវាដឹកយន្តហោះ៥គ្រឿងមក? ហើយចាំបាច់អ្វីត្រូវរង់ចាំរហូតដល់បញ្ហានេះ ក្លាយជាបញ្ហាអន្តរជាតិជាប់ពាក់ព័ន្ធប្រទេសជាច្រើននោះ»។ នេះជាសម្ដីបន្ទោសអាមេរិករបស់ប្រធានាធិបតីហ្វីលីពីន Rodrigo Duterte ដែលចោទថា អាមេរិកមិនព្រមទប់កុំឲ្យចិនសាងសង់កោះសិប្បនិម្មិតនៅសមុទ្រចិនខាងត្បូង តែបណ្តែតបណ្តោយឲ្យស្ថានការណ៍ទុំជោរដូចសព្វថ្ងៃនេះ។
ប្រធានាធិបតីរូបនេះ ក៏ចោទប្រកាន់រដ្ឋបាលអាមេរិករបស់អតីតប្រធានាធិបតី បារ៉ាក់ អូបាម៉ា ចំពោះទង្វើព្រហើនរបស់ខ្លូនលើជម្លោះនេះ និងមិនធ្វើអ្វីទាល់តែសោះដើម្បីប្រឈមមុខសកម្មភាពរបស់ចិន។ លោក Duterte រិះគន់រដ្ឋបាលលោក អូបាម៉ា ដែលបានត្រឹមតែដាក់សម្ពាធលើហ្វីលីពីនឲ្យប្រឆាំង តែមិនបានផ្ដល់ការគាំទ្រផ្នែកយោធាឲ្យហ្វីលីពីនឡើយ បើទោះជាភាគីទាំងពីរចុះសន្ធិសញ្ញាការពារជាតិរួមគ្នាក៏ដោយ។ ពោល គឺអាមេរិកទុកឲ្យចិនធ្វើអ្វីស្រេចចិត្តលើតំបន់ដែនទឹករបស់ហ្វីលីពីនដដែល។
បើតាមទីភ្នាក់ងារព័ត៌មាន Reuters លោក Duterte ក៏ប្រតិកម្មការធ្វើនាវាចរណ៍របស់នាវាអាមេរិកនៅសមុទ្រចិនខាងត្បូង ដែលបង្កការយល់ច្រឡំបាន។ បើតាមលោក Duterte បើមានការបាញ់តែគ្រាប់ នោះ សង្គ្រាមនឹងផ្ទុះឡើងមិនខាន ហើយការកាប់សម្លាប់នឹងកើតមានដូចគ្នា។ ប៉ុន្តែលោកក៏ឆ្ងល់ដែរថា ហេតុអ្វីបានអាមេរិកមិនបញ្ជូននាវាទៅកាន់សមុទ្រចិនខាងត្បូងតាំងពីយូរ ហើយចង់ឲ្យហ្វីលីពីនបញ្ជូននាវារបស់ខ្លួនទៅតំបន់ទៅវិញ។
លោកប្រធានាធិបតីបន្តចោទប្រកាន់អាមេរិកថា បើអាមេរិកសម្រេចចិត្តបញ្ជូនកម្លាំងទៅសមុទ្រចិនខាងត្បូង ម្ល៉េះសមបញ្ហាត្រូវដោះស្រាយតាំងពីយូរមកហើយ និងមិនក្លាយជារឿងរ៉ាវដែលប្រទេសជាច្រើនចូលពាក់ព័ន្ធដែរ។ ការរិះគន់របស់លោក Duterte ក៏ធ្វើឡើងចំពេលដែលមានការព្រួយបារម្ភថា ចិនមានបំណងសាងសង់ស្ថានីយ៍ស្រាវជ្រាវជាច្រើននៅសមុទ្រចិនខាងត្បូង ដែលរួមទាំងតំបន់ប្រទាញប្រទង់រវាងហ្វីលីពីន និងចិន នៅឯតំបន់ថ្មប៉ប្រះទឹក Scarborough ផងដែរ។
ជាការពិត ចិនជាអ្នកសាងសង់សិប្បនិម្មិតនៅសមុទ្រចិនខាងត្បូង ដែលជាការបញ្ឆេះកម្ដៅយោធាដ៏គ្រោះថ្នាក់ តែលោក Duterte ផ្ទាល់បែរជាមិនអើពើនឹងរឿងនេះ រួចបែរជាងាកទៅចាប់ដៃកាន់ស្អិតល្មួតជាមួយចិនទៅទៀត។ លោកនិយាយការពារការចាប់ដៃចិន និងបោះបង់អាមេរិក ថា លោកចង់ប្ដូរនយោបាយការបរទេសរបស់ហ្វីលីពីន ហើយការណ៍ដែលលោកងាកទៅរកចិន ក៏ផ្ដោតតែលើវិស័យសេដ្ឋកិច្ច និងពាណិជ្ជកម្មដែរ៕
Tag:
ហ្វីលីពីន
Rodrigo Duterte
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com