កីឡាករវាយកូនបាល់ជម្រើសជាតិកម្ពុជាហ្វឹកហាត់ពង្រឹងរាងកាយ និងស្មារតីនៅកែប មុនចេញទៅបារ៉ែន

កីឡាជាតិ

ជាតិ

កីឡាករវាយកូនបាល់ជម្រើសជាតិកម្ពុជាហ្វឹកហាត់ពង្រឹងរាងកាយ និងស្មារតីនៅកែប មុនចេញទៅបារ៉ែន

25, Mar 2017 , 12:19 pm

រូបភាព

ដោយ: នាយយ៉ាន

កែប៖ ពីថ្ងៃទី២១ រហូតដល់ថ្ងៃទី២៥ ខែមីនា ក្រុមកីឡាករវាយកូនបាល់ជម្រើសជាតិកម្ពុជា នាំគ្នាធ្វើការហ្វឹកហាត់ពង្រឹងរាងកាយ និងស្មារតីនៅខេត្តកែប ដើម្បីត្រៀមខ្លួនសម្រាប់ព្រឹត្តិការណ៍ Davis Cup នៅទីក្រុង Isa Town ប្រទេសបារ៉ែន នាខាងមុខ។ កម្ពុជាដែលមានកីឡាករ៤រូប គឺ ប៊ុន កេន្នី ម៉ម ផល្គុណ ឡុង សំនៀង និងអួរ សារិទ្ធ ដែលត្រូវប្រកួតក្នុងក្រុម IV នៃតំបន់អាស៊ី-អូសេអានី ដោយមានលោក ទេព រិទ្ធីវិត អគ្គលេខាធិការសហព័ន្ធកីឡាវាយកូនបាល់កម្ពុជា ជាប្រធានក្រុម។

ការហ្វឹកហាត់រយៈពេល៥ថ្ងៃនៅខេត្តកែប គឺក្នុងគោលបំណងឲ្យកីឡាករបានផ្លាស់ប្តូរបរិយាកាស។ នេះជាការអះអាងរបស់លោក ទេព រិទ្ធីវិត ដោយលោកបានបន្ថែមថា តំបន់សមុទ្រពោរពេញទៅដោយខ្យល់បរិសុទ្ធជាងនៅរាជធានីភ្នំពេញ ជាពិសេសកីឡាវាយកូនបាល់ ជាប្រភេទកីឡាដែលតម្រូវឲ្យមានការពង្រឹងស្មារតីខ្ពស់។

ក្រៅពីការហ្វឹកហាត់ផ្នែកបច្ចេកទេសក្រោមការដឹកនាំរបស់គ្រូបង្វឹកជនជាតិបារាំង លោក Deville Franck ក្រុមកីឡាវាយកូនបាល់ជម្រើសកម្ពុជា ក៏ត្រូវពង្រឹងសាមគ្គីភាពក្នុងក្រុម តាមរយៈការហ្វឹកហាត់ផ្នែករាងកាយ និងស្មារតី ផងដែរ ដោយ លោក Amin Louis ទទួលបន្ទុកដឹកនាំលើការហ្វឹកហាត់ទាំងនេះ។

ព្រឹត្តិការណ៍ 2017 Davis Cup Asia/Oceania Zone Group IV ដែលប្រព្រឹត្តទៅពីថ្ងៃទី៤ ដល់ថ្ងៃទី៩ ខែមេសា មាន១១ក្រុមចូលរួម ក្នុងនោះមានកម្ពុជា ម្ចាស់ផ្ទះបារ៉ែន បង់ក្លាដែស អ៊ីរ៉ាក់ គៀហ្ស៊ីសស្ថាន ម៉ុងហ្គោលី មីយ៉ាន់ម៉ា អូម៉ង់ អារ៉ាប៊ីសាអូឌីត សិង្ហបុរី និងតាហ្ស៊ីគីស្ថាន។

សូមទស្សនាបទយកការណ៍ជាវីដេអូរបស់ នាយ យ៉ាន ពីខេត្តកែប ដូចខាងក្រោម៖