អន្តរជាតិ
មេទ័ពអ៊ីរ៉ង់ ប្រាប់ឲ្យអាមេរិកកែមារយាទ
× កាលពីថ្ងៃទី២១ ខែមីនា នាវាដឹកយន្តហោះរបស់អាមេរិក បានប្រឈមមុខគ្នាជាមួយទូកល្បឿនលឿនរបស់ទ័ពជើងទឹកអ៊ីរ៉ង់ក្នុងតំបន់សមុទ្រ Hormuz ខណៈនាវាអាមេរិកធ្វើដំណើឆ្លងកាត់ទីនោះឆ្ពោះសំដៅឈូងសមុទ្រអារ៉ាប់ក្នុងប្រតិបត្តិការកម្ទេចក្រុមរដ្ឋឥស្លាម។ អាមេរិកនិយាយថា ទូកយោធាអ៊ីរ៉ង់ដែលប្រដាប់ឲ្យអាវុធ បានមកកៀកនាវាដឹកយន្តហោះ USS George H.W. Bush ។ ប៉ុន្តែមេទ័ពអ៊ីរ៉ង់បានទាត់ចោលការចោទប្រកាន់ និងប្រាប់អាមេរិកឲ្យកែប្រែប្រតិបត្តិការយោធារបស់ខ្លួនឡើងវិញ។
មេទ័ពអ៊ីរ៉ង់ បានប្រតិកម្មទៅនឹងការលើកឡើងរបស់មេទ័ពជើងទឹកអាមេរិក ដែលបានចោទអ៊ីរ៉ង់ថាបានបញ្ជូនកម្លាំងទូកល្បឿនរបស់ខ្លួន ទៅក្បែរនាវាដឹកយន្តហោះអាមេរិកដែលឆ្លងកាត់តំបន់សមុទ្រ Hormuz ។ ឧត្តមសេនីយ៍ Masoud Jazayeri នាយរងសេនាធិការចម្រុះកងទ័ពអ៊ីរ៉ង់និយាយថា ព័ត៌មាននៃការប្រឈមមុខគ្នារវាងនាវាអាមេរិក និងទូកលឿនរបស់អ៊ីរ៉ង់ ជារឿងគ្នាមូលដ្ឋាន និងស្រង់ចេញពីប្រភពដែលមិនត្រឹមត្រូវ។
មេទ័ពអ៊ីរ៉ង់ដដែលនេះ ក៏និយាយដែរថា អាមេរិកត្រូវទទួលខុសត្រូវតែម្នាក់ឯងគត់ ក្នុងករណីមានការប្រយុទ្ធគ្នាកើតឡើងក្នុងតំបន់នេះ។ លោកក៏ស្នើឲ្យកងទ័ពអាមេរិកពិនិត្យប្រតិបត្តិការយោធារបស់ខ្លួនឡើងវិញ ដើម្បីចៀសវាងការប៉ះទង្គិចណាមួយ។ «អាមេរិកត្រូវតែរងការបន្ទោស បើមានការចលាចលនៅតំបន់ឈូងសមុទ្រសមុទ្រពែរ្ស ហើយអាមេរិកក៏គួរតែផ្លាស់ប្ដូរមារយាទ និងឥរិយាបថរបស់ខ្លួនផងដែរ»។ នេះជាការព្រមានរបស់លោក Jazayeri ដែលផ្សាយដោយសារព័ត៌មាន RT ។
ងាកទៅការប្រឈមមុខបន្តិច នាវាដឹកយន្តហោះ USS George H.W. Bush ដែលនាំមុខនាវាមួយចំនួនទៀត និងទូកអ៊ីរ៉ង់ មិនមានការប្រយុទ្ធគ្នាឡើយ។ មេទ័ពជើងទឹកអាមេរិកបានទម្លាយរឿងនេះ និងបានចោទអ៊ីរ៉ង់ថាបានបំពានការធ្វើដំណើរដោយសុវត្ថិភាពរបស់នាវាអាមេរិកក្នុងដែនទឹកអន្តរជាតិ។ បើតាមសម្ដីមេទ័ពអាមេរិក ទូកយោធាអ៊ីរ៉ង់ចូលកៀកកប៉ាល់អាមេរិកជាមួយចម្ងាយ៨៧០ម៉ែត្រពីគ្នា និងប្រដាប់ដោយអាវុធច្រូងច្រាង។
យ៉ាងណាក្ដី នេះក៏មិនមែនជាលើកទីមួយ ដែលហេតុការណ៍ប្រឈមមុខរវាងនាវាអាមេរិក និងកប៉ាល់អ៊ីរ៉ង់កើតឡើងនៅតំបន់សមុទ្រ Hormuz នេះ។ អ៊ីរ៉ង់ បានត្រួតត្រាតំបន់នេះជាយូរមកហើយ។ Hormuz ក៏ជាច្រកជាមួយគត់សម្រាប់ការធ្វើដំណើរទៅកាន់មជ្ឈិមបូព៌ា រូចឆ្ពោះទៅកាន់សមុទ្រមេឌីទែរ៉ានេ។ នាវាអាមេរិក ក៏តែងឆ្លងកាត់តំបន់នេះដើម្បីចូលរួមប្រតិបត្តិការកម្ទេចក្រុមរដ្ឋឥស្លាម ដែលរឿងនេះហើយទើបមានការប្រឈមមុខជាញឹកញយ។
ទាំងអ៊ីរ៉ង់ ទាំងអាមេរិក តែងចោទគ្នាទៅវិញទៅមកដោយសាររឿងនេះ។ អាមេរិកតែងលើកឡើងថា កងទ័ពជើងទឹកអ៊ីរ៉ង់តែងមកក្បែរនាវារបស់ខ្លួន និងបង្ខំឲ្យនាវាអាមេរិកប្ដូរផ្លូវធ្វើដំណើរ ដែលអាចឈានដល់ការប៉ះទង្គិចជាយថាហេតុមិនខាន។ ភាពតានតឹងរវាងអាមេរិក និងអ៊ីរ៉ង់ មិនមែនមានត្រឹមរឿងនេះដែរ។ ការខ្វែងគំនិតគ្នាលើបញ្ហានុយក្លេអ៊ែរ ក៏កំពុងដុតកម្ដៅតានតឹងនេះ ស្របពេលដែលអ៊ីរ៉ង់បាញ់មីស៊ីលផ្គើនអន្តរជាតិដែរនោះ៕
© រក្សាសិទ្ធិដោយ thmeythmey.com