អន្តរជាតិ
អូស្ត្រាលី ត្រៀមខ្លួនទប់ទល់ ISIS ដែលចង់គំរាមកំហែងតំបន់អាស៊ីអាគ្នេយ៍ រដ្ឋមន្ត្រីការបរទេសអូស្ត្រាលី លោកស្រី Julia Bishop
× អាស៊ីអាគ្នេយ៍ គឺជាគោលដៅបោះជំរំរបស់ក្រុមរដ្ឋឥស្លាម បើពួកគេបរាជ័យក្នុងសង្គ្រាមនៅមជ្ឈិមបូព៌ា។ ក្រុមជ្រុលនិយមនេះ ក៏មានបណ្ដាញសាខារបស់ខ្លួនក្នុងតំបន់រួចស្រេចហើយដូចជាក្រុមឧទ្ទាម Abu Sayyaf នៅភាគខាងត្បូងហ្វីលីពីនជាដើម។ ប្រទេសជាច្រើននៅក្បែរហ្វីលីពីន ក៏បានត្រៀមខ្លួនជាបណ្ដើរៗដើម្បីទប់ទល់វត្តមានសកម្មជនរបស់ក្រុមជ្រុលនិយមនេះ ដែលអាចគេចខ្លួនពីប្រតិបត្តិការបោសសម្អាតនៅស៊ីរី និងអ៊ីរ៉ាក់ រួចមកបង្កើតរដ្ឋថ្មីមួយទៀតនៅអាស៊ីអាគ្នេយ៍។
អូស្ត្រាលី ដែលនៅក្បែរអាស៊ីអាគ្នេយ៍ បានត្រៀមខ្លួនដើម្បីក្រុមរដ្ឋឥស្លាមដែលទំនងជាបង្កើតរដ្ឋថ្មីរបស់ខ្លួននៅភាគខាងត្បូងហ្វីលីពីន ខណៈក្រុមនេះរងបរាជ័យបន្តបន្ទាប់នៅតំបន់មជ្ឈិមបូព៌ា។ សម្ព័ន្ធមិត្តលោកខាងលិចដឹកមុខដោយអាមេរិក កំពុងបើកប្រតិបត្តិការបោសសម្អាតក្រុមរដ្ឋឥស្លាមនៅអ៊ីរ៉ាក់ ខណៈដែលយុទ្ធនាការមួយទៀតដឹកនាំដោយរុស្ស៊ី កំពុងកម្ទេចសំបុករបស់ក្រុមជ្រុលនិយមនេះនៅលើទឹកដីស៊ីរី។ គេជឿថា យុទ្ធជនជាច្រើនរបស់ក្រុមនេះអាចភៀសខ្លួនមកកាន់អាស៊ីអាគ្នេយ៍ ដើម្បីចូលរួមជាមួយបក្សពួកខ្លួន។
រដ្ឋមន្ត្រីការបរទេសអូស្ត្រាលី Julia Bishop និយាយថា អូស្ត្រាលីព្រួយបារម្ភខ្លាំងជុំវិញការមកដល់របស់សកម្មជនបរទេសនៃរដ្ឋឥស្លាមចំនួនប្រមាណ៦០០នាក់ ដែលរួចផុតពីការវាយប្រយុទ្ធនៅមជ្ឈិមបូព៌ា។ ក្នុងកិច្ចសម្ភាសជាមួយសារព័ត៌មាន Sky News នៅថ្ងៃទី២៦ ខែមីនា ប្រមុខការទូតអូស្ត្រាលីរូបនេះនិយាយទៀតថា៖ «មានការបារម្ភច្រើនជុំវិញលទ្ធភាពដែលក្រុមរដ្ឋឥស្លាមអាចបង្កើតរដ្ឋឥស្លាមមួយទៀតនៅតំបន់ភាគខាងត្បូងហ្វីលីពីន»។
លោកស្រី Bishop បញ្ជាក់ថា មេដឹកនាំក្រុមឧទ្ទាម Abu Sayyaf ដែលជាបណ្ដាញរបស់ក្រុមរដ្ឋឥស្លាមនៅអាស៊ីអាគ្នេយ៍ ទើបត្រូវបានតែងតាំងជា Emir (មេដឹកនាំ) របស់ក្រុមរដ្ឋឥស្លាម។ ដូចនេះមានន័យថា ការគំរាមកំហែងបានមកមាត់ទ្វារផ្ទះទៅហើយ។ Abu Sayyaf ដែលជាក្រុមឧទ្ទាមនៅកោះ Mindanao បានយុទ្ធតស៊ូប្រឆាំងយុទ្ធនាការរបស់រដ្ឋាភិបាលហ្វីលីពីន ហើយក្រុមនេះតែងចាប់ជំរិតមនុស្ស ដើម្បីទារយកប្រាក់។ ប៉ុន្តែមួយរយៈពេលចុងក្រោយ ក្រុមនេះបានសម្លាប់មនុស្សជាច្រើន ព្រោះមិនទទួលបានប្រាក់តាមការទាមទារ។
ជាមួយការគំរាមនៅមុខផ្ទះដូចនេះ ស្ថាប័នចារកម្មរបស់អូស្ត្រាលី បានសហការជាមួយអង្គភាពចារកម្មរបស់រដ្ឋសមាជិកអាស៊ានដូចជាហ្វីលីពីន, ម៉ាឡេស៊ី និងឥណ្ឌូណេស៊ី ដើម្បីកម្ទេចផែនការគំរាមកំហែងក្នុងតំបន់។ លោកស្រីបានរំឮកពីហេតុការណ៍វាយប្រហារភេរវកម្មនៅទីក្រុងឡុងដ៏ដែលបានសម្លាប់មនុស្ស៥នាក់ និងជាច្រើននាក់ទៀតរបួស។ ការវាយប្រហារនេះ បង្ហាញពីការផ្លាស់ប្ដូរវិធីសាស្ត្ររបស់ភេរវករក្នុងការបង្កចលាចលដូចជាការប្រើកាំបិត និងឡានដើម្បីបង្កការភ័យខ្លាចវិញ។
លោកស្រីសង្កត់ធ្ងន់ថា បើទោះជារដ្ឋាភិបាលខំប្រឹងតាមដានប្រជាជន និងសកម្មភាពរបស់ភេរវករក្ដី ការវាយប្រហារនៅតែចៀសមិនរួច។ នេះក៏ព្រោះតែ ភេរវករមិនធ្វើសកម្មភាពជាក្រុម តែងាកមកធ្វើតែម្នាក់ឯង និងប្រើប្រាស់អាវុធងាយៗដូចការប្រើប្រាស់រថយន្តបើកបំបុកមនុស្ស ឬក៏ប្រើកាំបិតចាក់សម្លាប់មនុស្សតែម្ដង ដែលធ្វើឲ្យគេពិបាកតាមដានខ្លាំងណាស់ ខុសពីការប្រើប្រាស់គ្រឿងផ្ទុះដែលអាចតាមចាប់សញ្ញាបានដោយប្រើឧបករណ៍ត្រួតពិនិត្យនោះ៕
Tag:
អូស្ត្រាលី
ហ្វីលីពីន
Julia Bishop
ISIS
© រក្សាសិទ្ធិដោយ thmeythmey.com