អន្តរជាតិ
កូរ៉េខាងត្បូង៖ រដ្ឋអាជ្ញាចង់ចាប់ខ្លួនលោកស្រី ប៉ាក ហ្គឺនហេ ព្រោះខ្លាចបំផ្លាញភស្តុតាង អតីតប្រធានាធិបតីកូរ៉េខាងត្បូង ប៉ាក ហ្គឺនហេ ពេលទៅដល់ការិយាល័យរដ្ឋអាជ្ញាកាលពីថ្ងៃទី២១ ខែមីនា (រូបភាព Xinhua)
× រដ្ឋអាជ្ញាកូរ៉េខាងត្បូង បានស្នើសុំដីកាចាប់ខ្លួនអតីតប្រធានាធិបតី ប៉ាក ហ្គឺនហេ ដែលរងការចោទប្រកាន់ករណីពុករលួយរហូតអស់តំណែង។ រដ្ឋអាជ្ញាកូរ៉េខាងត្បូងលើកឡើងថា វាជាស្មើភាពដែលគួរឃាត់ខ្លួនលោកស្រី ប៉ាក ស្របពេលជនសង្ស័យផ្សេងទៀតត្រូវបានចាប់ខ្លួន និងកំពុងដំណើរការកាត់ទោសទៅហើយ។ ម្យ៉ាងទៀត រដ្ឋអាជ្ញា ចង់ចាប់ខ្លួនប្រធានាធិបតីស្ត្រីរូបនេះ ព្រោះខ្លាចលោកស្រីបំផ្លាញភស្តុតាងចោល។
អស់តំណែងមិនទាន់មួយខែស្រួលបួលផង លោកស្រី ប៉ាក ហ្គឺនហេ កំពុងប្រឈមមុខការចាប់ខ្លួន ខណៈដែលរដ្ឋអាជ្ញាកូរ៉េខាងត្បូង ដែលបានសួរចម្លើយលោកស្រីរាប់ម៉ោងកាលពីសប្ដាហ៍មុន ស្វែងរកដីកាចាប់ខ្លួនពីតុលាការនៅថ្ងៃទី២៧ ខែមីនា។ បើតុលាការចេញដីកាមែន លោកស្រី ប៉ាក ដែលរួមរឹតដោយអំពើពុករលួយ នឹងក្លាយជាអតីតប្រធានាធិបតីកូរ៉េខាងត្បូងទី៣ ហើយដែលត្រូវអាជ្ញាធរចាប់ឃាត់ខ្លួន។
អតីតប្រធានាធិបតីស្ត្រីទី១ រូបនេះ រងការចោទប្រកាន់ជាច្រើនករណីដូចជាការទទួលសំណូក, បំពានអំណាចប្រធានាធិបតី ក៏ដូចជាធ្វើឲ្យបែកធ្លាយកិច្ចការសម្ងាត់របស់រដ្ឋ តាមរយៈការអនុញ្ញាតឲ្យមិត្តភក្តិ Choi Soon-sil ពិនិត្យកិច្ចលោកស្រីបាន។ លោកស្រី Choi ផ្ទាល់ ក៏ឆ្លៀតប្រើទំនាក់ទំនងជាមួយលោកស្រី ប៉ាក ដើម្បីទាមទារយកទឹកប្រាក់ជាច្រើនលានដុល្លារពីសំណាក់ក្រុមហ៊ុនធំក្នុងស្រុកដាក់ក្នុងហោប៉ៅខ្លួនឯង។
ក្នុងសេចក្ដីប្រកាសថ្ងៃទី២៧ ខែមីនា រដ្ឋអាជ្ញាកូរ៉េខាងត្បូងនិយាយថា ខ្លួនបានប្រមូលភស្តុតាងជាច្រើន ប៉ុន្តែលោកស្រី ប៉ាក ដែលជាជនសង្ស័យនៅតែប្រកែកមិនទទួលកំហុស។ នេះមានន័យថា វាមានភាគរយខ្ពស់ដែលភស្តុតាងផ្សេងទៀត អាចត្រូវបានបំផ្លាញចោល។ ម្យ៉ាងទៀត រដ្ឋអាជ្ញាយល់ឃើញថា វាមិនយុត្តិធម៌ឡើយ ដែលត្រូវទុកលោកស្រីឲ្យមានសេរីភាព ព្រោះលោកស្រីក៏បានសមគំនិតជាមួយលោកស្រី Choi និងមន្ត្រីដទៃទៀតដែរ ហើយពួកគេក៏កំពុងជាប់ឃុំខ្លួនរួចស្រេចដែរ។
មួយវិញទៀត រដ្ឋអាជ្ញាកូរ៉េខាងត្បូង ចាត់ទុកការចោទប្រកាន់លើអតីតប្រធានាធិបតី ប៉ាក ជារឿងធ្ងន់ធ្ងរ ព្រោះលោកស្រីរំលោភបំពានអំណាចរដ្ឋយ៉ាងខ្លាំង តាមរយៈការលេចធ្លាយកិច្ចការសម្ងាត់របស់រដ្ឋ និងបើកដៃឲ្យលោកស្រី Choi គំរាមក្រុមហ៊ុនធំៗយកប្រាក់ ផ្ទុយច្បាប់ពាណិជ្ជកម្មរបស់ប្រទេស។ នេះបើយោងតាមការផ្សាយរបស់ Yonhap ។
កាលពីថ្ងៃទី២១ ខែមីនា រដ្ឋអាជ្ញាកូរ៉េខាងត្បូង បានសួរចម្លើយលោកស្រី ប៉ាក ដល់ទៅ១៤ម៉ោង។ ការសួរចម្លើយនេះ ធ្វើឡើងមិនយូរប៉ុន្មានក្រោយលោកស្រីអស់តំណែងផ្លូវការនៅថ្ងៃទី១០ ខែមីនា តាមរយៈសេចក្ដីសម្រេចរបស់តុលការធម្មនុញ្ញ។ បើទោះជាលោកស្រីសន្យាផ្ដល់ចម្លើយដោយស្មោះត្រង់ក្ដី លោកស្រី ប៉ាក ហ្គឺនហេ ទាត់ចោលការចោទប្រកាន់ទាំងអស់ បើទោះជាមនុស្សជំនិត និងអ្នកពាក់ព័ន្ធផ្សេងទៀតត្រូវតុលាការរកឃើញកំហុសក្ដី៕
Tag:
កូរ៉េខាងត្បូង
ប៉ាក ហ្គឺនហេ
© រក្សាសិទ្ធិដោយ thmeythmey.com