អន្តរជាតិ
របាយការណ៍៖ ក្រុងព្យុងយ៉ាងអាចនឹងបាញ់សាកល្បងអាវុធនុយក្លេអ៊ែរជាថ្មីទៀត
× កូរ៉េខាងជើងស្ថិតក្នុងដំណាក់កាលចុងក្រោយក្នុងការត្រៀមខ្លួនបាញ់សាកល្បងអាវុធនុយក្លេអ៊ែរជាថ្មីទៀតនៅពេលខាងមុខ។ កូរ៉េខាងជើងប្រឹងប្រែងអភិវឌ្ឍកាំជ្រួចបាលីស្ទិកមីស៊ីលឆ្លងទ្វីបដែលអាចភ្ជាប់ជាមួយក្បាលគ្រាប់នុយក្លេអ៊ែរនិងបាញ់ដល់អាមេរិកផង។ បើសិន កូរ៉េខាងជើងអាចបាញ់អាវុធនេះជោគជ័យមែន វាប្រៀបបានដូចជាទះរដ្ឋបាលលោក ដូណាល់ ត្រាំ មួយកំផ្លៀងដូច្នេះដែរ ព្រោះលោកសន្យាថា គ្មានថ្ងៃកូរ៉េខាងជើងផលិតមីស៊ីលបាញ់ឆ្លងទ្វីបឡើយ។
ស្ថាប័នវិភាគអាមេរិកបានសន្និដ្ឋានថា ក្រុងព្យុងយ៉ាងទំនងជាត្រៀមខ្លួនជិតរួចរាល់ហើយដើម្បី បាញ់សាកល្បងអាវុធនុយក្លេអ៊ែរជាថ្មីទៀត។ គេមិនអាចដឹងនៅឡើយទេថា ក្រុងព្យុងយ៉ាងនឹងបាញ់សាកល្បងមីស៊ីលប្រភេទណា ប៉ុន្តែគេវាយតម្លៃថា វាអាចជាមីស៊ីលបាលីស្ទិករយៈចម្ងាយឆ្ងាយផង។
យោងតាមទីភ្នាក់ងារព័ត៌មាន AFP រូបភាពចាប់បានដោយផ្កាយរណបរបស់វិទ្យាស្ថានអាមេរិកកូរ៉េនៃសាកលវិទ្យាល័យ Johns Hopkins បង្ហាញឲ្យឃើញថា កូរ៉េខាងជើងបានដាក់យាន្ត ឬអាចជារទេះសម្រាប់បាញ់សាកល្បងអាវុធរបស់ខ្លួនចំនួនបួនគ្រឿងនៅទីតាំង Punggye-ri ។ បន្ថែមពីនោះវាមានខ្សែនៃឧបករណ៍ទំនាក់ទំនងភ្ជាប់ជាមួយគ្នាផងដែរ។
«ឧបករណ៍ដែលស្ថិតនៅទីតាំងបាញ់នុយក្លេអ៊ែរទំនងជានឹងត្រូវប្រើប្រាស់ដើម្បីបាញ់សាកល្បងអាវុធ, សម្រាប់ប្រមូលទិន្ឋន័យពាក់ព័ន្ធការបាញ់អាវុធនិងដំណើរការនៃទិន្នន័យដែលគេទទួលបានផងដែរ»។ នេះជាការបញ្ជាក់របស់វិទ្យាស្ថានស្រាវជ្រាវខាងលើ។
វិទ្យាស្ថាននេះបន្ថែមថា ទឹកនៅក្បែរទីតាំងដែលគេបាញ់សាកល្បងមីស៊ីលនោះត្រូវបានគេបូមចេញដើម្បីធ្វើឲ្យរូងក្រោមដីស្ងួត និងបង្កភាពងាយស្រួលសម្រាប់ការឃ្លាំមើលនិងការប្រើប្រាស់ឧបករណ៍ទំនាក់ទំនងក្នុងពេលបាញ់សាល្បងផងដែរ។
ពាក់ព័ន្ធការបាញ់សាកល្បងអាវុធនុយក្លេអ៊ែរជាថ្មីនេះ កាលពីសប្តាហ៍មុន ក្រសួងការពារជាតិអាមេរិកបានវាយតម្លៃស្រដៀងគ្នា។ ហើយគេរកឃើញថា កូរ៉េខាងជើងកំពុងបន្តស្រាវជ្រាវនិងអភិវឌ្ឍមីស៊ីលបាលីស្ទិកអន្តរទ្វីបបំពាក់ក្បាលគ្រាប់នុយក្លេអ៊ែរដែលអាចបាញ់ដល់ទឹកដីអាមេរិកផងដែរ។ សរុបមកត្រឹមឆ្នាំមុន កូរ៉េខាងជើងបាញ់សាកល្បងនុយក្លេអ៊ែរ ៥ដងរួចហើយ ហើយឆ្នាំមុនព្យុងយ៉ាងបាញ់សាកល្បងដល់ទៅ ២ដងឯណោះ។
បើសិនជា កូរ៉េខាងជើងសម្រេចជោគជ័យក្នុងការផលិតមីស៊ីលអន្តរទ្វីបនិងបាញ់សាកល្បងដោយជោគជ័យមែន វានឹងក្លាយជាគ្រោះថ្នាក់ធំ ហើយវាប្រៀបដូចជាការទះកំផ្លៀងលោក ដូណាល់ ត្រាំ មួយទំហឹងដូច្នេះដែរ។
កាលពីប៉ុន្មានសប្តាហ៍មុន លោក ដូណាល់ ត្រាំ បានសរសេរបង្ហោះតាមគណនី Twitter របស់ខ្លួនថា «គ្មានថ្ងៃដែលកូរ៉េខាងជើងអាចសម្រេចមហិច្ឆតាក្នុងការផលិតមីស៊ីលបាញ់ឆ្លងទ្វីបឡើយ»។
មកដល់ពេលឥឡូវនេះ លោក ដូណាល់ ត្រាំ ប្រហែលជាកំពុងនឹកគិតរកមើលវិធីសាស្ត្រថ្មីដើម្បីប្រើប្រាស់ជាមួយកូរ៉េខាងជើង ក្រោយពេលដែលរដ្ឋមន្ត្រីការបរទេសលោក Rex Tillerson បានប្រកាសថា ការទូតបរាជ័យក្នុងការដោះស្រាយបញ្ហាកូរ៉េខាងជើង ក្នុងពេលលោកបំពេញទស្សនកិច្ចនៅតំបន់អាស៊ីថ្មីៗនេះ។ រដ្ឋបាលលោក ត្រាំ ក៏ព្រលយពាក្យផងដែរថា ការប្រើប្រាស់កម្លាំងស្ថិតនៅក្នុងជម្រើសរបស់អាមេរិកផងដែរ។
Tag:
កូរ៉េខាងជើង
ដូណាល់ ត្រាំ
Rex Tillerson
Punggye-ri
© រក្សាសិទ្ធិដោយ thmeythmey.com