ជាតិ
ឯកឧត្តម កឹម សុខា នឹងចាកចេញពីប្រទេសកម្ពុជា នៅថ្ងៃទី៥ មេសា
× ភ្នំពេញ៖ ឯកឧត្តម កឹម សុខា ប្រធានគណបក្សសង្គ្រោះជាតិ នឹងចាកចេញពីប្រទេសកម្ពុជា នៅថ្ងៃទី៥ ខែមេសា ឆ្នាំ២០១៧ ទៅបំពេញបេសកកម្មនៅឯបរទេស ចំនួនពីរសប្តាហ៍។ នេះជាការអះអាងរបស់លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ។
លោក យ៉ែម បុញ្ញឫទ្ធិ បានប្រាប់សារព័ត៌មានថ្មីៗ តាមទូរសព្ទ នៅថ្ងៃអង្គារនេះថា ប្រទេសដែលឯកឧត្តម កឹម សុខា នឹងទៅបំពេញបេសកកម្ម មានដូចជា នូវែលសេឡង់ អូស្ត្រាលី និងសហរដ្ឋអាមេរិក ជាដើម។ លោក បន្តថា បេសកកម្មរបស់ឯកឧត្តម កឹម សុខា គឺដើម្បីជម្រាបពីស្ថានភាពប្រទេសជាតិនាពេលបច្ចប្បន្ន ទៅដល់ប្រជាពលរដ្ឋខ្មែរ ជាពិសេសអ្នកគាំទ្រគណបក្សសង្គ្រោះជាតិ ដែលរស់នៅឯបរទេស។
លោក យ៉ែម បុញ្ញឫទ្ធិ អះអាងថា នៅក្នុងបេសកកម្មទៅក្រៅប្រទេសនេះ ឯកឧត្តម កឹម សុខា ប្រហែលជាគ្មានគម្រោងទៅជួបឯកឧត្តម សម រង្ស៊ី អតីតប្រធានគណបក្សសង្ក្រោះជាតិ ដែលកំពុងតែរស់នៅឯប្រទេសបារាំង ឡើយ។ លោក បន្តថា លោក អេង ឆៃអ៊ាង អនុប្រធានគណបក្សសង្គ្រោះជាតិ នឹងទៅជាមួយឯកឧត្តម កឹម សុខា។ អ្នកនាំពាក្យបក្សប្រឆាំងរូបនេះ និយាយដូច្នេះថា៖«ក្រៅពីឯកឧត្តម អេង ឆៃអ៊ាង ខ្ញុំមិនដឹងថា អ្នកណាទៀត ដែលនឹងទៅជាមួយឯកឧត្តម កឹម សុខា នោះទេ»។
សារព័ត៌មានថ្មីៗ មិនអាចទាក់ទងលោក អេង ឆៃអ៊ាង ដើម្បីសុំការបកស្រាយបន្ថែមនោះទេ ជុំវិញបញ្ហាខាងលើ ដោយសារតែ លោក មិនលើកទូរសព្ទ៕
Tag:
កឹម សុខា
បេសកកម្មនៅក្រៅប្រទេស
យ៉ែម បុញ្ញឫទ្ធិ
© រក្សាសិទ្ធិដោយ thmeythmey.com