ជាតិ
នយោបាយជាតិ
សង្គ្រោះជាតិ ហាក់ទ័លច្រក ក្រោយក្រសួងមហាផ្ទៃ មិនទទួលស្គាល់អនុប្រធានទាំងបីរូប ពីឆ្វេងទៅស្តាំ) ឯកឧត្តមម កឹម សុខា, លោក ប៉ុល ហំម, លោក អេង ឆៃអ៊ាង និងលោកស្រី មូរ សុខហួរ នាអង្គសមាជវិសាមញ្ញរបស់គណបក្សសង្គ្រោះជាតិ កាលពីថ្ងៃទី២ ខែមីនា ឆ្នាំ២០១៧។
×
ភ្នំពេញ៖ គណបក្សសង្គ្រោះជាតិ ត្រូវរក្សាភាពស្ងៀមស្ងាត់បន្តិចសិន ក្រោយក្រសួងមហាផ្ទៃ ប្រកាសមិនទទួលស្គាល់ លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធាន។ ការរក្សាភាពស្ងៀមស្ងាត់នេះ គឺដើម្បីរង់ចាំមើលគោលបំណងរបស់ក្រសួងមហាផ្ទៃ ថាចង់ឲ្យបក្សប្រឆាំង ធ្វើដូចម្តេច។ ក្រសួងមហាផ្ទៃ ប្រាប់បក្សប្រឆាំងយ៉ាងខ្លីថា ត្រូវចេះដោះស្រាយដោយខ្លួនឯង។
លោក ប៉ុល ហំម អនុប្រធានគណបក្សសង្គ្រោះជាតិ បានប្រាប់សារព័ត៌មានថ្មីៗថា គណបក្សសង្គ្រោះជាតិ នៅមិនទាន់រកដំណោះស្រាយឃើញនោះទេ បន្ទាប់ពីក្រសួងមហាផ្ទៃ ប្រកាសមិនទទួលស្គាល់អនុប្រធានទាំងបីរូបរបស់គណបក្សសង្គ្រោះជាតិ។ លោក ប៉ុល ហំម ដែលកំពុងកាន់តំណែងជាប្រធានស្តីទីគណបក្សសង្គ្រោះជាតិ ខណៈឯកឧត្តម កឹម សុខា អវត្តមាន សុំឲ្យក្រសួងមហាផ្ទៃ ប្រាប់គណបក្សសង្គ្រោះជាតិឲ្យច្បាស់លាស់ថា ត្រូវធ្វើដូចម្តេច ដើម្បីកុំឲ្យមានបញ្ហាបន្តទៀត។
លោក និយាយដូច្នេះថា៖«ឥឡូវឲ្យយើងធ្វើយ៉ាងម៉េច។ យើងដូចជាអត់មានច្រកចេញទេ។ យើងមិនចង់តតាំងអ្វីជាមួយក្រសួងមហាផ្ទៃ ឡើយ។ ហើយយើង ក៏មិនចង់មានបញ្ហាអ្វីទៀតដែរ។ យើង គ្រាន់តែចង់ដឹងថា ឲ្យយើងធ្វើយ៉ាងម៉េច។ បើក្រសួងមហាផ្ទៃប្រាប់ យើងនឹងព្យាយាមសម្រួលឲ្យអស់លទ្ធភាព»។
លោក ប៉ុល ហំម នៅតែនិយាយដដែលថា ការជ្រើសរើសអនុប្រធានទាំងបីរូប នៅក្នុងអង្គសមាជវិសាមញ្ញ កាលពីដើមខែមីនា ឆ្នាំ២០១៧ គឺមិនខុសពីលក្ខន្តិកៈរបស់គណបក្សសង្គ្រោះជាតិ ឡើយ។ ប៉ុន្តែ លោក យល់ថា លក្ខន្តិកៈនេះ អាចនឹងមានការបកស្រាយខុសគ្នារវាងគណបក្សសង្គ្រោះជាតិ និងក្រសួងមហាផ្ទៃ។ ដូច្នេះហើយ ទើបលោក ស្នើឲ្យក្រសួងមហាផ្ទៃ ប្រាប់ឲ្យត្រង់ៗ ថាឲ្យគណបក្សសង្គ្រោះជាតិ ធ្វើដូចម្តេច ដើម្បីបញ្ចប់បញ្ហានេះ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានសើចចំអកឲ្យគណបក្សសង្គ្រោះជាតិ ដែលមិនដឹងថា ត្រូវធ្វើដូចម្តេច ចំពោះបញ្ហាខាងលើ។ លោក ខៀវ សុភ័គ អះអាងថា ក្រសួងមហាផ្ទៃ មិនអាចបញ្ជាគណបក្សសង្គ្រោះជាតិ ថាត្រូវធ្វើយ៉ាងនេះ ឬ ធ្វើយ៉ាងនោះ ឡើយ។ លោក បន្តថា រាល់បញ្ហាខាងលើ គឺគណបក្សសង្គ្រោះជាតិ ត្រូវដោះស្រាយដោយខ្លួនឯង។
អ្នកនាំពាក្យក្រសួងមហាផ្ទៃរូបនេះ បានបញ្ជាក់ប្រាប់សារព័ត៌មានថ្មីៗដូច្នេះថា៖«ឲ្យគាត់ (គណបក្សសង្គ្រោះជាតិ) គិតខ្លួនឯងទៅ។ និយាយឲ្យស្រួលយល់ ផ្ទះខ្លួនឯង ដោះស្រាយខ្លួនឯង។ យើងមិនទៅលូកដៃចូលទេ។ បើគ្រាន់តែច្បាប់ខ្លួនឯងអនុវត្តមិនបានផង ឲ្យទៅធ្វើនាយករដ្ឋមន្ត្រីយ៉ាងមេចកើត?»។
សូមរម្លឹកថា ក្រសួងមហាផ្ទៃ បានទទួលស្គាល់ឯកឧត្តម កឹម សុខា ជាប្រធានគណបក្សសង្គ្រោះជាតិ។ ប៉ុន្តែក្រសួងមហាផ្ទៃ បែរជាមិនទទួលស្គាល់លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធានគណបក្សសង្គ្រោះជាតិ។ ក្រសួងមហាផ្ទៃ លើកហេតុផលថា ការជ្រើសរើសអនុប្រធានទាំងបីរូបនេះ គឺហួសពីរយៈពេល៣០ថ្ងៃ ក្រោយលោក សម រង្ស៊ី លាលែងពីប្រធានគណបក្សសង្គ្រោះជាតិ។ ការហួសពីរយៈពេល៣០ថ្ងៃនេះ ត្រូវបានក្រសួងមហាផ្ទៃ ចាត់ទុកថា គណបក្សសង្គ្រោះជាតិ ធ្វើខុសទៅនឹងលក្ខន្តិកៈក្នុងការជ្រើសរើសអនុប្រធានរបស់ខ្លួន៕
© រក្សាសិទ្ធិដោយ thmeythmey.com