ក្រសួង បញ្ឈប់ការចុះបញ្ជីទោចក្រយានយន្ត នៅតាមមន្ទីរសាធារណការ រាជធានី-ខេត្ត ទាំងអស់

ជាតិ

ក្រសួង បញ្ឈប់ការចុះបញ្ជីទោចក្រយានយន្ត នៅតាមមន្ទីរសាធារណការ រាជធានី-ខេត្ត ទាំងអស់

08, Apr 2017 , 2:19 pm

រូបភាព

ដោយ: ថ្មីៗ

ភ្នំពេញ៖ក្រសួងសាធារណការ និងដឹកជញ្ជូន បានបង្គាប់មិនឲ្យមានការចុះបញ្ជីទោចក្រយានយន្ត នៅតាមបណ្ដាមន្ទីសាធារណការ និងដឹកជញ្ជូន រាជធានី-ខេត្តទៀតឡើយ ដោយបង្វែរកិច្ចការងារទាំងនេះ ទៅរដ្ឋបាលថ្នាក់ក្រោមជាតិវិញ។

សេចក្តីណែនាំរបស់ក្រសួងសាធារណការ បានបញ្ជាក់ថា ក្រសួងបញ្ឈប់ការចុះបញ្ជីទោចក្រយានយន្ត ដើម្បីផ្ដល់ប័ណ្ណសម្គាល់ និងផ្លាក់លេខ , ការផ្ទេរកម្មសិទ្ធិទុតិយកា តតិយកាប័ណ្ណសម្គាល់ និងផ្លាកលេខទោចក្រយានយន្ត នៅតាមបណ្ដាមន្ទីសាធារណការ និងដឹកជញ្ជូន រាជធានី-ខេត្តទាំងស្រុង។ ត្រង់ចំណុចនេះក្រសួងសាធារណការ បានសម្រេចប្រគល់កិច្ចការងារនេះ ទៅការិយាល័យច្រកចេញតែមួយ របស់រដ្ឋបាលខណ្ឌរាជធានីភ្នំពេញ និងរដ្ឋបាលថ្នាក់ក្រោមជាតិនៅទូទាំងប្រទេស ដែលត្រូវអនុវត្តការងារទាំងនេះ តាមប្រព័ន្ធស្វ័យប្រវត្តិកម្មរបស់ក្រសួងជំនួសវិញ ជូនពលរដ្ឋដែលស្ថិតនៅក្នុងដែនសមត្ថកិច្ចខ្លួន។

ប៉ុន្តែក្នុងករណីដែលការិយាល័យច្រកចេញចូលតែមួយនៅតាមរាជធានី-ខេត្តណាមួយ ដែលមិនទាន់បានត្រៀមលក្ខណៈរួចរាល់ និងមិនទាន់ដំណើរការនោះ មន្ទីសាធារណការ និងដឹកជញ្ជូន ត្រូវបន្តផ្ដល់សេវាការចុះបញ្ជីទោចក្រយាន្តយន្ត ជូនពលរដ្ឋដែលស្ថិតនៅក្នុងដែនសមត្ថកិច្ចខ្លួនសិន។

ជាមួយគ្នានេះក្រសួងសាធារណការ ក៏បានណែនាំឲ្យមន្ទីសាធារណការ និងដឹកជញ្ជូន រាជធានី-ខេត្ត ត្រួតពិនិត្យតាមដាន និងគ្រប់គ្រងការអនុវត្តផ្ដល់សេវា ក្នុងការចុះបញ្ជីទោចក្រយានយន្តរបស់ការិយាល័យច្រកចេញចូលតែមួយ ។ ជាពិសេសការបណ្ដុះបណ្ដាលបច្ចេកទេសការិយាល័យច្រកចេញចូលតែមួយ៕