ជាតិ
សង្គ្រោះជាតិ នឹងធ្វើសមាជម្តងទៀត ដើម្បីសម្រួលអនុប្រធានទាំងបី ឲ្យត្រូវតាមលក្ខន្តិកៈ គណបក្សសង្គ្រោះជាតិ បានរៀបចំសមាជវិសាមញ្ញ កាលពីថ្ងៃទី២ ខែមីនា ឆ្នាំ២០១៧ ដើម្បីជ្រើសរើសប្រធាននិងអនុប្រធានថ្មី។
× ភ្នំពេញ៖ នៅសប្តាហ៍ក្រោយ បក្សប្រឆាំង នឹងរៀបចំសមាជវិសាមញ្ញម្តងទៀត ដើម្បីធ្វើវិសោធនកម្មលក្ខន្តិកៈរបស់ខ្លួន ត្រង់ប្រការ៤៧ (ថ្មី) ដែលមានចែងពី ប្រធាននិងអនុប្រធាន។ ការសម្រេចបែបនេះ គឺធ្វើឡើងបន្ទាប់ពីក្រសួងមហាផ្ទៃ អះអាងថា ការជ្រើសរើសអនុប្រធានទាំង៣រូបរបស់គណបក្សសង្គ្រោះជាតិកន្លងមក គឺមិនទាន់សមស្របទៅតាមលក្ខន្តិកៈ។
នៅទីបំផុត គណបក្សសង្គ្រោះជាតិ គ្មានធម្យោបាយផ្សេង ក្រៅពីការរៀបចំសមាជវិសាមញ្ញសាជាថ្មី ដើម្បីដោះស្រាយបញ្ហាជាមួយនឹងក្រសួងមហាផ្ទៃ ដែលមិនព្រមទទួលស្គាល់លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធានគណបក្សសង្គ្រោះជាតិ។ តាមរយៈសមាជវិសាមញ្ញនាពេលខាងមុខ គណបក្សសង្គ្រោះជាតិ នឹងកែតម្រូវខ្លឹមសារនៃលក្ខន្តិកៈយ៉ាងណា ដើម្បីឲ្យអ្នកទាំង៣រូប ក្លាយជាអនុប្រធានដោយពេញលក្ខណៈ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗ ថា សមាជវិសាមញ្ញលើកទី២នេះ នឹងត្រូវរៀបចំឡើង នៅថ្ងៃទី២៥ ខែមេសា ឆ្នាំ២០១៧។ បើតាមលោក យ៉ែម បុញ្ញឫទ្ធិ ដដែល គម្រោងនៃការរៀបចំសមាជវិសាមញ្ញនាពេលខាងមុខ គឺដើម្បីធ្វើវិសោធនកម្មលក្ខន្តិកៈគណបក្សសង្គ្រោះជាតិ ត្រង់ប្រកាស៤៧ (ថ្មី) ដែលមានចែងអំពីប្រធាន និងអនុប្រធាន។
ប៉ុន្តែ លោក យ៉ែម បុញ្ញឫទ្ធិ មិនបានអះអាងនោះទេថា ការរៀបចំសមាជវិសាមញ្ញ គឺដើម្បីជ្រើសរើសអនុប្រធានទាំង៣រូប ឡើងវិញ ឬយ៉ាងណា។ អ្នកនាំពាក្យបក្សប្រឆាំងរូបនេះ បានបញ្ជាក់ដូច្នេះថា៖«យើង គ្រាន់តែចង់កែតម្រូវលក្ខន្តិកៈ ឲ្យមានលក្ខណៈច្បាស់លាស់ជាងមុន ទាក់ទងនឹងប្រធាននិងអនុប្រធាន។ ត្រង់ចំណុចណាដែលនៅមានភាពខ្វះចន្លោះ យើង នឹងបំពេញបន្ថែម ដើម្បីដោះស្រាយបញ្ហាហ្នឹង»។
ទោះជាលោក យ៉ែម បុញ្ញឫទ្ធិ មិនបាននិយាយពេលនេះក៏ពិតមែន តែលោកធ្លាប់និយាយកន្លងមកថា បេក្ខជនអនុប្រធានទាំង៣រូប ដែលមានលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ នឹងមិនត្រូវបានផ្លាស់ប្តូរឡើយ។ លោក សង្កត់ធ្ងន់ថា អ្វីដែលគណបក្សសង្គ្រោះជាតិ ចង់ធ្វើ គឺកែសម្រួលលក្ខន្តិកៈយ៉ាងណា ដើម្បីឲ្យអ្នកទាំង៣រូបខាងលើ ក្លាយជាអនុប្រធានដោយស្របច្បាប់ ហើយមានការទទួលស្គាល់ពីក្រសួងមហាផ្ទៃ។
លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ត្រូវបានជ្រើសរើសឲ្យធ្វើជាអនុប្រធានគណបក្សសង្គ្រោះជាតិ នៅក្នុងអង្គសមាជវិសាមញ្ញ កាលពីថ្ងៃទី២ ខែមីនា ឆ្នាំ២០១៧។ ប៉ុន្តែរហូតមកដល់ពេលនេះ ក្រសួងមហាផ្ទៃ មិនទាន់ទទួលស្គាល់អ្នកទាំង៣ ថាជាអនុប្រធានគណបក្សសង្គ្រោះជាតិ ដែលស្របតាមលក្ខន្តិកៈ ឡើយ។ ដោយមានអំណះអំណាងថា ការជ្រើសរើសអនុប្រធានទាំង៣ គឺមិនទាន់ត្រឹមត្រូវទៅតាមលក្ខន្តិកៈ ក្រសួងមហាផ្ទៃ ក៏ស្នើឲ្យគណបក្សសង្គ្រោះជាតិ កែសម្រួលបញ្ហានេះឡើងវិញ។
ក្រសួងមហាផ្ទៃ ក៏ធ្លាប់មិនទទួលស្គាល់ ឯកឧត្តម កឹម សុខា ជាប្រធានគណបក្សសង្គ្រោះជាតិ ផងដែរ។ ប៉ុន្តែបន្ទាប់ពីមានការសម្របសម្រួលនៅក្នុងគណៈកម្មាធិកានាយកនៃគណបក្សសង្គ្រោះជាតិ ក្រសួងមហាផ្ទៃ ក៏ទទួលស្គាល់ឯកឧត្តម កឹម សុខា ជាប្រធានគណបក្សសង្គ្រោះជាតិ៕
Tag:
CNRP
អនុប្រធាន
សមាជ
© រក្សាសិទ្ធិដោយ thmeythmey.com