ទោះបីបឹងកេតធ្លាប់ចាញ់ Johor តែគ្រូបង្វឹកបឹងកេតនៅតែរំពឹងទទួលជ័យជម្នះនៅល្ងាចនេះ

កីឡាជាតិ

ទោះបីបឹងកេតធ្លាប់ចាញ់ Johor តែគ្រូបង្វឹកបឹងកេតនៅតែរំពឹងទទួលជ័យជម្នះនៅល្ងាចនេះ

19, Apr 2017 , 1:24 pm

រូបភាព

ដោយ:

ក្រុមបឹងកេតនឹងបើកទ្វារពហុកីឡដ្ឋានជាតិស្វាគមន៍ក្រុម Johor DarulTa'zim របស់ម៉ាឡេស៊ីក្នុងជើងទី២នៃវគ្គសន្សំពិន្ទុពូល F ពានរង្វាន់ AFC Cup 2017 នាល្ងាចនេះ។ គ្រូបង្គោលរបស់បឹងកេត លោក John McGlynn រំពឹងថា ក្រុមលោកនឹងទទួលបានលទ្ធផលល្អក្នុងជំនួបដ៏សំខាន់មួយនេះ ទោះបីក្រុមខ្លួនធ្លាប់ចាញ់ក្រុម Johor ៣-០ ក្នុងជើងទី១ក៏ដោយ។ ការប្រកួតនាល្ងាចនេះ នឹងក្លាយជាជំនួបមួយដ៏តានតឺងបំផុត ព្រោះក្រុមទាំងពីរសុទ្ធតែត្រូវការឈ្នះដូចគ្នា ដើម្បីរក្សាឱកាសឡើងទៅវគ្គបន្ត។

ទោះបីក្រុមបឹងកេតបានបរាជ័យក្រោមថ្វីជើងក្រុម Johor DarulTa'zim របស់ម៉ាឡេស៊ី ៣-០ ក្នុងជើងទី១នៃវគ្គចែកពូលពានរង្វាន់ AFC Cup 2017 នៅលើទឹកដីម៉ាឡេស៊ីក៏ដោយ។ តែគ្រូបង្គោលរបស់បឹងកេតលោក John McGlynnហាក់មិនមានក្តីបារម្ភនោះឡើយក្នុងជំនួបជើងទី២នាវេលាម៉ោង៦ល្ងាចនៅពហុកីឡដ្ឋានជាតិ។ ហើយ លោក រំពឹងថា ក្រុមលោកនឹងទទួលបានលទ្ធផលល្អក្នុងជំនួបដែលត្រូវការឈ្នះជាចាំបាច់ដើម្បីរក្សាឱកាសក្នុងការឡើងទៅវគ្គបន្តមួយនេះ។

«យើងអត់មានក្តីបារម្ភនោះទេសម្រាប់ជំនួបល្ងាចនេះ ព្រោះយើងត្រៀមបានល្អ សូម្បីតែថ្ងៃឈប់សម្រាកក៏យើងធ្វើការហ្វឹកហាត់ដែរ ដូច្នេះយើងមានភាពច្បាស់លាស់ក្នុងការរៀបចំ ហើយយើងក៏បានដឹងពីទម្រង់លេងរបស់ក្រុម Johor នាជំនួបកន្លងមកផងដែរ ហេតុនេះយើងសង្ឃឹមថា យើងនឹងទទួលបានលទ្ធផលល្អ»។ នេះជាការលើកឡើងរបស់លោក John McGlynn។

គ្រូបង្វឹករូបនេះទទួលស្គាល់ថា ការជួបជាមួយ Johor DarulTa'zim នៅល្ងាចនេះជាការប្រកួតមួយដ៏លំបាកសម្រាប់បឹងកេត ព្រោះក្រុមនេះមានទម្រង់លេងល្អនិងជាអតីតម្ចាស់ជើងឯកពានរង្វាន់ AFC Cup។ តែយ៉ាងណា លោក នឹងព្យាយាមឲ្យអស់ពីសមត្ថភាព និងបង្កើតឱកាសទម្លុះសំណាញ់ទីតាមតែអាចធ្វើទៅបាន។

ជាមួយគ្នានេះ កីឡាករ សុខ សុវណ្ណ ខ្សែការពាររបស់បឹងកេតអង្គរដែលទើបជាពីរបួសបានប្តេជ្ញាថា នឹងស្វែងរកជ័យជម្នះជូនក្រុមឲ្យបានក្នុងជំនួបល្ងាចនេះ។ «ការប្រកួតនៅថ្ងៃនេះ ខ្ញុំនឹងប្រឹងប្រែងឲ្យអស់ពីសមត្ថភាព ដើម្បីជួយក្រុមឲ្យទទួលបានជ័យជម្នះ។ ខ្ញុំដឹងថា ក្រុម Johor មានការប្រយុទ្ធល្អ និងចូលចិត្តលេងបាល់ខ្លី ប៉ុន្តែយើងនឹងព្យាយាមធ្វើឲ្យបានល្អ។យើងសង្ឃឹមច្រើន ព្រោះវាជាការប្រកួតនៅលើទឹកដីរបស់យើង»។ នេះជាសម្តីរបស់ខ្សែការពារ សុខ សុវណ្ណ ក្នុងសន្និសីទមុនការប្រកួត។

យ៉ាងណាមិញ លោក Ismail Ibrahim គ្រូជំនួយរបស់ Johor DarulTa'zim បានចាត់ទុកការជួបគ្នាជាមួយបឹងកេតម្តងនេះ ជាការប្រកួតសម្រាប់កំណត់វាសនាក្នុងការឡើងទៅវគ្គបន្តសម្រាប់ក្រុមលោក ដូច្នេះ Johorត្រូវការ៣ពិន្ទុដាច់ខាតក្នុងជំនួបមួយនេះ។ ហើយ លោក រពឹងថា កូនក្រុមលោកនឹងប្រឹងប្រែងឲ្យអស់ពីសមត្ថភាព១០០ភាគរយក្នុងជំនួបល្ងាចនេះ។ ទោះបី Johor DarulTa'zimធ្លាប់យកឈ្នះបឹងកេត តែគ្រូបង្វឹករូបនេះសរសើរថា ក្រុមបឹងកេតជាក្រុមមួយដែលមានទម្រង់លេងល្អ។

ដោយឡែក នារសៀលម៉ោង៤នេះដែរ ក្រុមឈរបាតតារាង Magwe FC របស់មីយ៉ាន់ម៉ា នឹងបើកទ្វារកីឡដ្ឋាន Youth Training Centreស្វាគមន៍ក្រុមឈរកំពូលតារាង Global FC របស់ហ្វីលីពីន។ គួររំលឹកថា កាលពីជំនួបជើងទី១នៅលើទឹកដីហ្វីលីពីន ក្រុម Magwe FC បានប្រកួតចាញ់ក្រុម Global FC ក្នុងលទ្ធផល ១-០។

គួរបញ្ជាក់ថា ការប្រកួតបាល់ទាត់ដណ្តើមពានរង្វាន់ AFC Cup 2017 វគ្គសន្សំពិន្ទុពូល F ក្រុម Global FC ឈរកំពូលតារាងដោយមាន៩ពិន្ទុ ខណៈក្រុម Johor DarulTa'zimឈរលេខរៀងទី២ដោយមាន៧ពិន្ទុ រីឯក្រុមបឹងកេតរបស់កម្ពុជាឈរលេខរៀងទី៣ដោយមាន៤ពិន្ទុ ខណៈក្រុម Magwe FC របស់មីយ៉ាន់ម៉ាឈរបាតតារាងដោយមាន២ពិន្ទុ៕