ជាតិ
មនុស្ស ៣ នាក់ស្លាប់ និងផ្ទះច្រើនខ្នងខូចខាត អំឡុងភ្លៀងកក់ខែលាយឡំខ្យល់កន្ត្រាក់រយៈពេលពីរថ្ងៃ បុរសម្នាក់ ត្រូវរន្ទះបាញ់ពេលកំពុងបើកម៉ូតូ។ រូបពីហ្វេសប៊ុកក្រសួងធនធានទឹក និងឧតុនិយម
×
ភ្នំពេញ៖ ភ្លៀងកក់ខែលាយឡំជាមួយខ្យល់កន្ត្រាក់ បានបណ្ដាលឲ្យមានមនុស្ស ៣ នាក់បានស្លាប់ និងខូចខាតផ្ទះសម្បែង រួមទាំងអគារសិក្សានៅតាមបណ្ដាខេត្តមួយចំនួន។ នេះបើតាមហ្វេសប៊ុកផ្លូវការរបស់ក្រសួងធនធានទឹក និងឧតុនិយម។
កាលពីថ្ងៃទី២២-២៣ ខែមេសា នៅតាមបណ្ដាខេត្តមួយចំនួន បានទទួលរងនូវឥទ្ធិពលភ្លៀងកក់ខែលាយឡំជាមួយខ្យល់កន្ត្រាក់ ដោយបណ្ដាលឲ្យខូចខាតផ្ទះសម្បែង អគារសិក្សា និងមានមនុស្ស ៣ នាក់ស្លាប់។ ក្នុងករណីភ្លៀងកក់ខែលាយឡំខ្យល់កន្ត្រាក់ នៅថ្ងៃទី២២ មេសា នាខេត្តកំពង់ចាម បានបណ្ដាលឲ្យផ្ទះប្រជាពលរដ្ឋចំនួន ៩ខ្នង រងនៅការខូចខាត។ នេះបើតាមក្រសួងធនធានទឹក និងឧតុនិយម។
ក្រសួងធនធានទឹក បានផ្សព្វផ្សាយទៀតថា នៅខេត្តស្វាយរៀង កាលពីថ្ងៃទី២៣ មេសានេះ មានបុរស ១ នាក់បានស្លាប់ ដោយសាររន្ទះបាញ់ ពេលកំពុងធ្វើដំណើរ ខណៈមេឃរកកលភ្លៀង។ នៅថ្ងៃទី២៣ ដដែល នាខេត្តត្បូងឃ្មុំវិញ ភ្លៀងកក់ខែនិងខ្យល់កន្ត្រាក់ បានធ្វើឲ្យអគារសិក្សាចំនួន ១ខ្នង របើកដំបូល។
បើតាមក្រសួងធនធានទឹកដដែល នៅខេត្តព្រះវិហារ គ្រោះធម្មជាតិនេះ បានឆក់យកជីវិតមនុស្ស ១ នាក់ និងរងរបួស ៣នាក់។ ភ្លៀងកក់ខែនិងខ្យល់កន្ត្រាក់ នាថ្ងៃទី ២៣ មេសានេះ បណ្ដាលឲ្យផ្ទះប្រជាពលរដ្ឋចំនួន ១៤ ខ្នង បានរលំ និងអគារសិក្សាចំនួន ១ខ្នង រួមទាំងផ្ទះចំនួន ៨០ ខ្នងទៀតបានរបើកដំបូល។
ទាក់ទងនឹងនេះ នៅខេត្តរតនគិរី មានភ្លៀងកក់ខែ និងខ្យល់កន្ត្រាក់ បណ្ដាលឲ្យមនុស្ស ១នាក់បានស្លាប់ និងរលំបង្គោលភ្លើង។ ក្នុងករណីភ្លៀងកក់ខែលាយឡំជាមួយខ្យល់កន្ត្រាក់នេះ ខេត្តរតនគិរី ក៏មានករណីធ្លាក់ទឹកកកផងដែរ។
គួរបញ្ជាក់ថា តាមសេចក្ដីជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី១៩ មេសា នៅតាមរាជធានី-ខេត្តមួយចំនួន អាចប្រឈមនឹងបាតុភូតផ្គរ រន្ទះ និងខ្យល់កន្ត្រាក់ ដែលកើតមានឡើងនៅពេលមេឃភ្លៀង ចាប់ពីថ្ងៃទី២៣-២៩ មេសា។ ជាពិសេសខេត្តបាត់ដំបង ប៉ែលិន ព្រះវិហារ បន្ទាយមានជ័យ ឧត្តរមានជ័យ និងខេត្តសៀមរាប អាចប្រឈមនឹងបាតុភូតទាំងនេះ៕
Tag:
ភ្លៀងកក់ខែ
ខ្យល់កន្ត្រាក់
© រក្សាសិទ្ធិដោយ thmeythmey.com