កីឡាអន្តរជាតិ
អន្តរជាតិ
គូប្រជែងថា Sharapova មិនគួរទទួលបាន Wildcard នោះឡើយ កីឡាការិនីវាយកូនបាល់ Maria Sharapova
× គូប្រកួតដំបូងរបស់កីឡាការិនីវាយកូនបាល់ Maria Sharapova ថានាងមិនគួរទទួលបាន wildcard ដែលជាសិទ្ធិមិនចាំបាច់ប្រកួតវគ្គជម្រុះនោះឡើយ ពីព្រោះអតីតជើងឯកលេខ១ពិភពលោករបស់រុស្ស៊ីរូបនេះធ្លាប់ជាប់បម្រាបរហូតដល់១៥ខែពីបទប្រើប្រាស់សារធាតុប៉ូវកំលាំងនៅពេលប្រកួតកន្លងមក។
Sharapova ត្រូវជួបគូប្រកួតដំបូងជាមួយកីឡាការិនីសញ្ជាតិអ៊ីតាលី Roberta Vinci ក្នុងជុំទីមួយនៃពាន Porsche Grand Prix (ឬ Stuttgart Open) ដែលប្រព្រឹត្តទៅនៅថ្ងៃពុធ ទី២៦នេះក្នុងទីក្រុង Stuttgart ប្រទេសអាល្លឺម៉ង់។
កីឡាការិនីសញ្ជាតិអ៊ីតាលី វ័យ៣៤ឆ្នាំ Vinci បានសម្តែងការមិនពេញចិត្តសម្រាប់ការផ្តល់សិទ្ធិប្រកួតមិនបាច់ជម្រុះ(wildcard) ទៅឲ្យ Sharapova ដោយលើកឡើងថា៖«ខ្ញុំមិនយល់ស្របសម្រាប់ការផ្តល់ wildcard ទៅឲ្យ Sharapova នៅទីនេះ ឬនៅការប្រកួតនៅទីក្រុងរ៉ូម រួមទាំងការប្រកួតផ្សេងៗទៀតនោះទេ»។
អ្នកវាយកូនបាល់លំដាប់ទី៣៦ពិភពលោកនេះបន្ថែមទៀតថា៖« ជាការពិតនាងបានធ្វើឲ្យមានកំហុសរួចទៅហើយ ហើយនាងគួរតែត្រឡប់មកប្រកួតវិញបាន ប៉ុន្តែមិនសមនឹងទទួលបាន wildcard នោះទេ»។
លើសពីនេះទៅទៀតនោះ អតីតជើងឯកលេខ១ពិភពលោករបស់ដាណឺម៉ាក Caroline Wozniacki ក៏សម្តែងការមិនពេញចិត្តអំពីការផ្តល់សិទ្ធិនេះដូចគ្នាដែរ។
សូមបញ្ជាក់ថា ម្ចាស់ជើងឯក Grand Slam ៥សម័យកាល Maria Sharopova បានជាប់បម្រាមមិនអោយធ្វើការប្រកួតរយៈពេល២ឆ្នាំ ដោយពិនិត្យឃើញថាបានប្រើប្រាស់សារធាតុញៀន ឬសារធាតុប៉ូវកម្លាំងនៅពេលប្រកួត នៃពានរង្វាន់ Grand Slam នៅប្រទេសអូស្ត្រាលី Australian Open កាលពីខែមករា ឆ្នាំ២០១៦។ ប៉ុន្តែតុលាការនៃអាជ្ញាកណ្តាលកីឡាហៅកាត់ថា(Cas) សម្រេចបន្ធូបន្ថយទោសសល់ត្រឹម១៥ខែប៉ុណ្ណោះ៕
Tag:
វាយកូនបាល់
Maria Sharapova
© រក្សាសិទ្ធិដោយ thmeythmey.com