ជាតិ
កម្ពុជាកំពុងសើរើលើកិច្ចព្រមព្រៀងនៃការទទួលពលរដ្ឋខ្មែរពីអាមេរិក
× ភ្នំពេញ៖ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានស្នើលោក Patrick Murphy ឧបការីរងរដ្ឋមន្ត្រីការបរទេស អាមេរិកឲ្យជួយពិនិត្យកិច្ចព្រមព្រៀងបញ្ជូនពលរដ្ឋខ្មែរឡើងវិញ ដើម្បីកុំឲ្យប៉ះពាល់ដល់សិទ្ធិមនុស្ស និងភាពមនុស្សធម៌។
ក្រោយជំនួបរវាងលោក Patrick Murphy ឧបការីរងរដ្ឋមន្ត្រីការបរទេសអាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក ជាមួយលោក ប្រាក់ សុខុន លោក ជុំ សុន្ទរី បានឲ្យដឹងថា កម្ពុជាកំពុងពិភាក្សារៀបចំសើរើមាត្រាមួយចំនួនពាក់ព័ន្ធនឹងការបញ្ជូនពលរដ្ឋខ្មែរ ដែលប្រព្រឹត្តបទល្មើសខុសឆ្គងនៅអាមេរិក ដោយឈរលើមូលដ្ឋានច្បាប់អន្តរជាតិ គឺការគោរពសិទ្ធិរបស់ពលរដ្ឋ និងលើមូលដ្ឋានគោរពគ្នាទៅវិញទៅមក។
អ្នកនាំពាក្យរូបនេះបាននិយាយនៅថ្ងៃទី២៥ ខែមេសានេះថា កម្ពុជាបានស្នើអាមេរិកផ្អាកបណ្តោះអាសន្នសិន ព្រោះកម្ពុជាត្រូវការពេលវេលាពិភាក្សាជាមួយអាមេរិកអំពីការអនុវត្ត MOU កន្លងមក។ «ពួកគេ (ពលរដ្ឋខ្មែរ)ដូចទទួលទណ្ឌកម្មពីរដង គឺជាប់ពន្ធនាគារ និងការបញ្ជូនខ្លួនមកកម្ពុជាដែលខ្លួនមិនធ្លាប់ បានស្គាល់ អ្នកខ្លះមិនចេះភាសាខ្មែរ និងពិបាករកស៊ីចិញ្ចឹមជិវីត»។ អ្នកនាំពាក្យបញ្ជាក់ពីគោលបំណងកម្ពុជាដែលចង់ឲ្យអាមេរិកគោរពលើគោលការណ៍មនុស្សធម៌ និងមេត្តាករុណា ចំពោះជនជាតិខ្មែរដែលជាប់ទោសនៅអាមេរិក។
លោកពុំទាន់អាចឆ្លើយពីការសើរើសកិច្ចព្រមព្រៀងលម្អិតនោះទេ ស្របពេលក្រសួង និងស្ថានទូតអាមេរិកកំពុងជជែកគ្នាពីការធ្វើវិសោធនកម្ម។ ហើយលោកពុំទាន់ដឹងការបរិច្ឆេទបញ្ចប់ការតាក់តែងកិច្ចព្រមព្រៀងថ្មីនេះដែរ ដោយលោកគ្រាន់តែថា កិច្ចព្រមព្រៀងរវាងកម្ពុជា និងសហរដ្ឋអាមេរិក ស្តីពីការបញ្ជូនពលរដ្ឋខ្មែរមកកាន់មាតុប្រទេសវិញនោះ នឹងមិនបញ្ឈប់ទាំងស្រុងនោះទេ។
រដ្ឋាភិបាលកម្ពុជា និងរដ្ឋាភិបាលអាមេរិកបានចុះកិច្ចព្រមព្រៀងបញ្ជូន និងទទួលយកពលរដ្ឋខ្មែរ តាំងពីឆ្នាំ២០០២មកម្ល៉េះ។ បើតាមអ្នកនាំពាក្យក្រសួងការបរទេស គិតចាប់តាំងពីឆ្នាំ២០០២ ដល់ឆ្នាំ២០១៦កន្លងទៅ អាមេរិកបានបញ្ជូនពលរដ្ឋកម្ពុជាចំនួន ៥៤៩នាក់មកកម្ពុជាវិញ ផ្អែកលើគោលការណ៍ស្ម័គ្រចិត្ត។
អ្វីដែលគួរឲ្យកត់សម្គាល់នោះ កម្ពុជា ត្រៀមទទួលយកពលរដ្ឋខ្មែរចំនួន៣៦នាក់វិញ ស្របពេលដែលប្រធានាធិបតីសហរដ្ឋអាមេរិកលោក Donald Trump កំណត់គោលនយោបាយរឹតបន្តឹងជនបរទេសដែលរស់នៅអាមេរិក៕
Tag:
ប្រាក់ សខុន
Patrick Murphy
ជុំ សុន្ទរី
ការបរទេស
អាមេរិក
© រក្សាសិទ្ធិដោយ thmeythmey.com