ជាតិ
នយោបាយជាតិ
បក្សកាន់អំណាចនឹងចាយច្រើនជាងបក្សប្រឆាំងលើការងារសង្កេតការបោះឆ្នោត
× ភ្នំពេញ៖ បក្សប្រឆាំង គ្រោងចំណាយថវិកាប្រមាណជា ២០ម៉ឺនដុល្លារ ទៅដល់អ្នកសង្កេតការបោះឆ្នោត។ ចំណែកឯ បក្សកាន់អំណាច មិនទាន់កំណត់ឲ្យជាក់លាក់នោះទេ ថានឹងត្រូវចំណាយថវិកាប៉ុន្មាន សម្រាប់អ្នកសង្កេតការបោះឆ្នោត។ ប៉ុន្តែ បក្សកាន់អំណាច ហ៊ានអះអាងជាមុនថា ការចំណាយថវិកា សម្រាប់អ្នកសង្កេតការបោះឆ្នោត នឹងមិនឲ្យតិចជាងបក្សប្រឆាំង ឡើយ។
ក្នុងអំឡុងនៃដំណើរបំពេញបេសកកម្មរបស់ខ្លួន នៅឯសហរដ្ឋអាមេរិក អស់រយៈពេលប៉ុន្មានថ្ងៃមកនេះ ឯកឧត្តម កឹម សុខា ប្រធានគណបក្សសង្គ្រោះជាតិ បាននិយាយច្រើន អំពីការបោះឆ្នោតថ្នាក់ឃុំ សង្កាត់ នៅប្រទេសកម្ពុជា ដែលនឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧ ខាងមុខ។ កាលពីថ្ងៃទី៣០ ខែមេសា ឆ្នាំ២០១៧ ឯកឧត្តម កឹម សុខា បានលើកឡើងនៅចំពោះមុខប្រជាពលរដ្ឋកម្ពុជា ក្នុងសហរដ្ឋមេរិក ថា គណបក្សសង្គ្រោះជាតិ នឹងដាក់ពង្រាយអ្នកសង្កេតការបោះឆ្នោត ជាង៤ម៉ឺននាក់ នៅតាមការិយាល័យបោះឆ្នោតជាង២ម៉ឺន នៅទូទាំងប្រទេស។ បើតាម ឯកឧត្តម កឹម សុខា ដដែល គណបក្សសង្គ្រោះជាតិ នឹងដាក់អ្នកសង្កេតការបោះឆ្នោត២នាក់ ក្នុងការិយាល័យបោះឆ្នោត១។
ឯកឧត្តម កឹម សុខា បន្តថា ការរៀបចំអ្នកសង្កេតការបោះឆ្នោតនៅទូទាំងប្រទេសនេះ នឹងត្រូវចំណាយថវិកាប្រមាណជា ២០ម៉ឺនដុល្លារ។ ឯកឧត្តម កឹម សុខា បន្ថែមទៀតថា គណបក្សសង្គ្រោះជាតិ នឹងផ្តល់ថវិកាចំនួន៥ដុល្លារ ដល់អ្នកសង្កេតការបោះឆ្នោត ១នាក់ ដើម្បីចាយវាយទៅការធ្វើដំណើរនិងអាហារ ក្នុងថ្ងៃបោះឆ្នោត។
ឯកឧត្តម កឹម សុខា សង្កត់ធ្ងន់ថា ការដាក់អ្នកសង្កេតការបោះឆ្នោត គឺជាផ្នែកមួយដ៏សំខាន់ ដែលអាចការពារសន្លឹកឆ្នោតរបស់ប្រជាពលរដ្ឋ។ ប្រធានបក្សប្រឆាំងរូបនេះ និយាយដូច្នេះថា៖«ខ្ញុំសូមឲ្យបងប្អូនទាំងអស់នៅទីនេះ (សហរដ្ឋអាមេរិក) មេត្តាចាប់អារម្មណ៍រឿងបោះឆ្នោត ក្នុងឆ្នាំ២០១៧។ ហើយសូមបងប្អូន ចូលរួមចំណែកក្នុងការការពារសន្លឹកឆ្នោតយើង។ […..] សូមបងប្អូន ចូលរួមបោះឆ្នោតឲ្យគណបក្សសង្គ្រោះជាតិ។ បើបងប្អូន មិនអាចទៅបោះឆ្នោតបានទេ បងប្អូន អាចទាក់ទងសាច់ញាតិក្នុងប្រទេសកម្ពុជា (ឲ្យជួយបោះឆ្នោតឲ្យគណបក្សសង្គ្រោះជាតិ)»។
ដោយឡែក គណបក្សប្រជាជនកម្ពុជា ក៏នឹងដាក់អ្នកសង្កេតការបោះឆ្នោតប្រមាណជាង ៤ម៉ឺននាក់ដែរ ពោលគឺ ស្មើនឹងគណបក្សសង្គ្រោះជាតិ។ នេះបើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជា។
លោក សុខ ឥសាន ប្រាប់សារព័ត៌មានថ្មីៗថា គណបក្សប្រជាជនកម្ពុជា ក៏មានកញ្ចប់ថវិកា សម្រាប់អ្នកសង្កេតការបោះឆ្នោត ផងដែរ។ យ៉ាងណា លោក មិនទាន់អាចបញ្ជាក់បានទេថា គណបក្សប្រជាជនកម្ពុជា នឹងត្រូវចំណាយថវិកាប៉ុន្មាន សម្រាប់អ្នកសង្កេតការបោះឆ្នោត។
អ្វីដែលលោក សុខ ឥសាន អាចបញ្ជាក់បាននោះ គឺគណបក្សប្រជាកម្ពុជា នឹងចំណាយថវិកាច្រើនជាងគណបក្សសង្គ្រោះជាតិ សម្រាប់អ្នកសង្កេតការបោះឆ្នោត។ អ្នកនាំពាក្យបក្សកាន់អំណាចរូបនេះ និយាយដូច្នេះថា៖«យើង តែងតែដាក់អ្នកសង្កេការបោះឆ្នោតជារៀងរាល់អាណត្តិ។ ដូច្នេះ វា ជារឿងធម្មតាទេ ដែលយើងត្រូវដាក់អ្នកសង្កេតការបោះឆ្នោត និងត្រូវគិតគូរពីចំណាយ។ គ្រាន់តែឥឡូវហ្នឹង ខាងគណបក្សប្រជាជនកម្ពុជា មិនទាន់កំណត់ថា ត្រូវចំណាយថវិកាប៉ុន្មាន សម្រាប់អ្នកសង្កេតការបោះឆ្នោត។ តែយើង នឹងមិនឲ្យចាញ់គូរប្រជែងរបស់យើងទេ»។
ជុំវិញបញ្ហានេះ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំបោះឆ្នោត (គ.ជ.ប) បានប្រាប់សារព័ត៌មានថ្មីៗថា បច្ចុប្បន្ន មានអ្នកសង្កេការបោះឆ្នោត ជាង២ម៉ឺននាក់ហើយ។ លោក អះអាងថា អ្នកសង្កេតការបោះឆ្នោតទាំងនោះ គឺមកពីបណ្តាអង្គការជាតិចំនួន៨ និងអង្គការអន្តរជាតិចំនួន៤ ដែលបានដាក់សំណើទៅកាន់គ.ជ.ប កាលពីពេលកន្លងមក។
ប៉ុន្តែ លោក ហង្ស ពុទ្ធា បញ្ជាក់ថា រហូតមកដល់ពេលនេះ នៅមិនទាន់មានគណបក្សនយោបាយណាមួយ បានដាក់សំណើផ្លូវការ ទៅកាន់គ.ជ.ប ដើម្បីសុំធ្វើជាអ្នកសង្កេតការបោះឆ្នោត នោះទេ។ លោក សន្និដ្ឋាន ការយឺតយ៉ាងនេះ គឺទំនងជាគណបក្សទាំងនោះ មិនទាន់រៀបចំឯកសាររបស់ខ្លួនរួចរាល់ ដើម្បីដាក់ទៅកាន់ គ.ជ.ប។
សូមបញ្ជាក់ថា គណបក្សនយោបាយចំនួន១២ បានចូលរួមប្រកួតប្រជែងការបោះឆ្នោតថ្នាក់ឃុំ សង្កាត់ នៅអាណត្តិទី៤ នេះ។ ចំណែកឯ ប្រជាពលរដ្ឋ ដែលបានចុះឈ្មោះបោះឆ្នោត ដើម្បីត្រៀមបោះឆ្នោតជ្រើសរើសក្រុមប្រឹក្សាឃុំ សង្កាត់ មានជិត ៨លាននាក់៕
Tag:
បោះឆ្នោត
អ្នកសង្កេតការបោះឆ្នោត
CPP
CNRP
© រក្សាសិទ្ធិដោយ thmeythmey.com