ជាតិ
RFA ៖«លោក ជុន ច័ន្ទបុត្រ នឹងមិនវិលមកកម្ពុជាវិញឡើយ»
× ភ្នំពេញ៖ វិទ្យុអាស៊ីសេរី (RFA) អះអាងថា លោក ជុន ច័ន្ទបុត្រ នឹងមិនវិលមកប្រទេសកម្ពុជាវិញ នោះទេ។ ការអះអាងរបស់វិទ្យុអាស៊ីសេរី គឺស្របពេលដែលតុលាការ កោះហៅលោក ជុន ច័ន្ទបុត្រ ឲ្យចូលបំភ្លឺ នៅថ្ងៃអង្គារនេះ។
«នាយករងវិទ្យុអាស៊ីសេរីផ្នែកភាសាខ្មែរ លោក ហួត វុទ្ធី ហៅ ជុន ច័ន្ទបុត្រ នឹងមិនវិលត្រឡប់ទៅប្រទេសកម្ពុជាវិញទេ បន្ទាប់ពីគាត់បានធ្វើដំណើរចាកចេញពីប្រទេសនេះ កាលពីចុងសប្តាហ៍កន្លងទៅ»។ នេះបើតាមសេចក្តីថ្លែងការណ៍ជាលើកទី២ របស់វិទ្យុអាស៊ីសេរី ដែលបានបង្ហោះលើទំព័រហ្វេសប៊ុក នៅថ្ងៃទី២ ខែមេសា ឆ្នាំ២០១៧។
សេចក្តីថ្លែងការណ៍នេះ ចេញផ្សាយចំថ្ងៃដែលព្រះរាជអាជ្ញានៃសាលាដំបូងរាជធានីភ្នំពេញ កំណត់ឲ្យលោក ជុន ច័ន្ទបុត្រ ចូលបំភ្លឺជុំវិញដំណើររឿងដែលលោក បានចូលជួបមន្ត្រី និងសកម្មជនគណបក្សសង្គ្រោះជាតិ កាលពីថ្ងៃទី១៩ ខែមេសា ឆ្នាំ២០១៧។
យ៉ាងណាក៏ដោយ វិទ្យុអាស៊ីសេរី មិនបានបញ្ជាក់ទេថា តើលោក ជុន ច័ន្ទបុត្រ នឹងមិនត្រឡប់មកកម្ពុជាជារៀងរហូត ឬក៏អាចត្រឡប់មកកម្ពុជាវិញ ក្នុងពេលក្តីក្តាំនៅតុលាការ ស្ងប់ស្ងាត់នោះទេ។
ការឲ្យលោក ជុន ច័ន្ទបុត្រ ចាកចេញពីប្រទេសកម្ពុជា ដើម្បីគេចចេញពីការចូលបំភ្លឺក្នុងតុលាការ ត្រូវបានវិទ្យុអាស៊ីសេរី បកស្រាយនៅក្នុងសេចក្តីថ្លែងការណ៍ថា អាជ្ញាធរ ហាក់មានបំណងយកករណីលោក ជុន ច័ន្ទបុត្រ ធ្វើជារឿងនយោបាយ ខណៈការបោះឆ្នោតកាន់តែខិតជិតមកដល់។ ព្រោះតែការយល់ឃើញបែបនេះ វិទ្យុអាស៊ីសេរី ក៏ព្រួយបារម្ភថា សុវត្ថិភាពរបស់លោក ជុន ច័ន្ទបុត្រ នៅក្នុងប្រទេសកម្ពុជា មិនអាចធានាបានឡើយ។
ជាងនេះទៀត វិទ្យុអាស៊ីសេរី ពុំជឿជាក់ឡើយថា តុលាការ នឹងអនុវត្តច្បាប់ដោយយុត្តិធម៌ ចំពោះករណីរបស់លោក ជុន ច័ន្ទបុត្រ។ ដោយផ្អែកលើហេតុផលទាំងនេះ វិទ្យុអាស៊ីសេរី ក៏បានអះអាងដូច្នេះថា៖«អាស៊ីសេរី មិនចង់ឲ្យលោក ហួត វុទ្ធី ស្ថិតក្នុងស្ថានភាពប្រថុយគ្រោះថ្នាក់ និងមិនចង់ឲ្យប៉ះពាល់ដល់លទ្ធភាពក្រុមការងារអាស៊ីសេរី ក្នុងការបន្តផ្តល់ព័ត៌មានពិស្តារ និង ឥតលម្អៀង ស្តីពីការបោះឆ្នោតដ៏មានសារសំខាន់នេះឡើយ។ អាស៊ីសេរី នៅតែប្រកាន់ជំហរថា លោក ហួត វុទ្ធី មិនបានប្រព្រឹត្តបទឧក្រិដ្ឋអ្វីទាំងអស់»។
កន្លងមក វិទ្យុអាស៊ីសេរី ធ្លាប់បានចេញសេចក្តីថ្លែងការណ៍ម្តងរួចទៅហើយ ជុំវិញករណីរបស់លោក ជុន ច័ន្ទបុត្រ។
សារព័ត៌មានថ្មីៗ មិនអាចទាក់ទងអ្នកនាំពាក្យក្រសួងយុត្តិធម៌ ដើម្បីសុំការឆ្លើយតបចំពោះសេចក្តីថ្លែងការណ៍របស់វិទ្យុអាស៊ីសេរីខាងលើ នោះទេ។ ចំណែកឯអ្នកនាំពាក្យនៃស្ថាប័នអយ្យការអមសាលាដំបូងរាជធានីភ្នំពេញ ក៏មិនទាន់បកស្រាយអ្វីដែរ ជុំវិញករណីលោក ជុន ច័ន្ទបុត្រ ដែលមិនព្រមចូលបំភ្លឺតាមដីកាកោះ។
ប៉ុន្តែ នៅព្រឹកថ្ងៃទី២ ខែឧសភា ឆ្នាំ២០១៧នេះ លោក ឌុល វិបុល មេធាវីរបស់លោក ជុន ច័ន្ទបុត្រ បានទៅកាន់សាលាដំបូងរាជធានីភ្នំពេញ ដើម្បីជួបព្រះរាជអាជ្ញា។ លោកមេធាវី ឌុល វិបុល បានប្រាប់សារព័ត៌មានថ្មីៗថា ការទៅកាន់សាលាដំបូងរាជធានីភ្នំពេញ គឺដើម្បីយកឯកសារមួយចំនួន ដែលពាក់ព័ន្ធនឹងអង្គហេតុ ឲ្យព្រះរាជអាជ្ញា។
មួយវិញទៀត លោកមេធាវីរូបនេះ ក៏បានជម្រាបដល់ព្រះរាជអាជ្ញាផងដែរថា លោក ជុន ច័ន្ទបុត្រ មិនអាចចូលបំភ្លឺតាមដីកាទេ នៅពេលនេះ។ យ៉ាងណា លោកមេធាវី មិនអាចបញ្ជាក់នោះទេ ថាមូលហេតុអ្វី ដែលលោក ជុន ច័ន្ទបុត្រ មិនព្រមចូលបំភ្លឺតាមដីកាកោះ។
លោក និយាយដូច្នេះថា៖«ខ្ញុំមកតុលាការថ្ងៃនេះ គឺដើម្បីជម្រាបព្រះរាជអាជ្ញាថា លោក ជុន ច័ន្ទបុត្រ មិនបានចូលបំភ្លឺទេ។ ខ្ញុំគ្រាន់តែជម្រាបអ៊ីចឹង។ តែមូលហេតុ ដែលគាត់មិនចូលបំភ្លឺ ខ្ញុំមិនអាចជម្រាបបានទេ ពីព្រោះវាជារឿងផ្ទាល់ខ្លួនរបស់គាត់»។
សមត្ថកិច្ច និងតុលាការ យល់ថា លោក ជុន ច័ន្ទបុត្រ បានបន្លំខ្លួនទាំងខុសច្បាប់ ចូលទៅជួបមន្ត្រី និងសកម្មជនគណបក្សសង្គ្រោះជាតិ នៅក្នុងពន្ធនាគារព្រៃស។ ព្រះរាជអាជ្ញា បានចាត់ទុកលោក ជុន ច័ន្ទបុត្រ ថា ជាជនសង្ស័យក្នុងដំណើររឿង «ផ្តល់សេចក្តីប្រកាសដោយភូតកុហក បន្លំខ្លួនចូលពន្ធនាគារ»។
តំណាងរាស្ត្រគណបក្សសង្គ្រោះជាតិពីររូប គឺលោកស្រី មូរ សុខហួរ និងលោក ឡុង រី ជាអ្នក នាំលោក ជុន ច័ន្ទបុត្រ ទៅជាមួយ ពេលចូលសួរសុខទុក្ខអ្នកជាប់ឃុំក្នុងពន្ធនាគារព្រៃស។ តំណាងរាស្ត្រទាំងពីររូបនេះ បានចូលបំភ្លឺក្នុងនាមជាសាក្សី នៅចំពោះមុខព្រះរាជអាជ្ញារួចហើយ ជុំវិញដំណើររឿងខាងលើ។ ក្រោយចូលបំភ្លឺ ពួកគាត់ទាំងពីរ មិនត្រូវបានចោទប្រកាន់នោះទេ៕
Tag:
ជុន ច័ន្ទបុត្រ
វិទ្យុអាស៊ីសេរី
មេធាវី
តុលាការ
© រក្សាសិទ្ធិដោយ thmeythmey.com