អន្តរជាតិ
ស៊ូជីប្រាប់អឺរ៉ុបថា មីយ៉ាន់ម៉ាមិនទទួលការស៊ើបអង្កេតអំពើហិង្សាលើពួករ៉ូហ៊ីងយ៉ាបង្កើតដោយ UN ទេ ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី និងប្រមុខការទូតសហភាពអឺរ៉ុប Federica Mogherini (រូបភាព EPA)
× មីយ៉ាន់ម៉ា និងសហភាពអឺរ៉ុប បានខ្វែងគំនិតគ្នាលើការស្វែងរកការពិតពាក់ព័ន្ធករណីអំពើហិង្សាលើជនមូស្លីមរ៉ូហ៊ីងយ៉ាដែលបង្កើតដោយអង្គការសហប្រជាជាតិ។ សហភាពអឺរ៉ុប បានគាំទ្រគំនិតនេះ ដោយសម្អាងហេតុផលថាជាការរកជម្រះភាពមិនច្បាស់លាស់ទាំងឡាយលើរដ្ឋាភិបាលមីយ៉ាន់ម៉ា ដែលរងការចោទប្រកាន់នាពេលកន្លងមក។ ប៉ុន្តែទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ក៏ប្រកាសវិញដែរថា មីយ៉ាន់ម៉ា មិនត្រូវការបេសកកម្មស្វែងរកការពិតអ្វីឡើយ។
ប្រមុខការទូតសហភាពអឺរ៉ុបនៅថ្ងៃទី២ ខែឧសភា បានប្រកាសជាសាធារណៈ គាំទ្របេសកកម្មអន្តរជាតិដែលបង្កើតឡើងដើម្បីស្វែងរកការពិតជុំវិញករណីរំលោភបំពានសិទ្ធិមនុស្សលើជនមូស្លីមភាគតិចរ៉ូហ៊ីងយ៉ា បង្កដោយកងកម្លាំងសន្តិសុខមីយ៉ាន់ម៉ា។ បេសកកម្មអន្តរជាតិនេះ ស្នើដោយក្រុមប្រឹក្សាសិទ្ធិមនុស្សអង្គការសហប្រជាជាតិ ប៉ុន្តែរដ្ឋាភិបាលក្រុងណៃពិដោរក៏បានបដិសេធរួចម្ដងដែរហើយ ដោយលើកឡើងថា មីយ៉ាន់ម៉ាក៏មានគណៈកម្មការស៊ើបអង្កេតរួចហើយ។
ចំពោះមុខទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី រដ្ឋមន្ត្រីការបរទេសអឺរ៉ុប Federica Mogherini និយាយថា ដំណោះស្រាយរបស់ក្រុមប្រឹក្សាសិទ្ធិមនុស្ស UN នឹងជួយជម្រះមន្ទិលសង្ស័យលើយោធាមីយ៉ាន់ម៉ា ដែលរងការចោទថាបានសម្លាប់ ធ្វើទារុណកម្ម និងបង្ខំឲ្យជនមូស្លីមរ៉ូហ៊ីងយ៉ាងរត់ចោលផ្ទះសម្បែងរបស់ខ្លួន។ តាមរយៈដំណោះស្រាយនេះ បេសកកម្មអន្តរជាតិមួយក្រុម នឹងត្រូវបញ្ជូនទៅមីយ៉ាន់ម៉ា ដើម្បីស៊ើបអង្កេតករណីនេះ។
យ៉ាងណាក្ដី លោកស្រី ស៊ូជី ដែលជារដ្ឋមន្ត្រីការបរទេសដែរនោះ នៅតែប្រកាន់ជំហររបស់ប្រទេសលោកស្រីក្នុងការជំទាស់វត្តមានរបស់អន្តរជាតិមកក្នុងការស៊ើបអង្កេតករណីហិង្សាលើជនជាតិរ៉ូហ៊ីងយ៉ា។ បើតាមសារព័ត៌មាន The Irrawaddy លោកស្រី ស៊ូជី បានប្រាប់សមភាគីសហភាពអឺរ៉ុបថា មីយ៉ាន់ម៉ា មិនមានជាប់ពាក់ព័ន្ធដំណោះស្រាយខាងលើឡើយ ព្រោះវាមិនសមនឹងអ្វីដែលកើតឡើងឡើយ។
ទន្ទឹមគ្នានឹងការទាត់ចោលនេះ លោកស្រី ស៊ូជី ប្រកាសដែរថា មីយ៉ាន់ម៉ា នឹងទទួលយកតែអនុសាសន៍ផ្ដល់ដោយគណៈកម្មការផ្ដល់ប្រឹក្សាដែលដឹកនាំដោយអតីតអគ្គលេខាធិការអង្គការសហបប្រជាជាតិ កូហ្វី អាណាន់ (Kofi Annan) ប៉ុណ្ណោះ។ សម្រាប់លោកស្រី ស៊ូជី មតិយោបល់ក្រៅពីអ្វីដែលដោយគណៈកម្មការនេះ អាចបង្កការបែងចែកបាន ព្រោះលទ្ធផលនៃការស៊ើបអង្កេត អាចខុសគ្នា បើធ្វើឡើងដោយស្ថាប័នផ្សេងគ្នានោះ។
សកម្មភាពបង្ក្រាបដោយហិង្សារបស់យោធាមីយ៉ាន់ម៉ា ធ្វើឲ្យរដ្ឋាភិបាលមីយ៉ាន់ម៉ា បាក់មុខយ៉ាងខ្លាំងលើអន្តរជាតិ។ ក្រោមហេតុផលស្វែងរកឧក្រិដ្ឋជនសម្លាប់ប៉ូលិសព្រំដែនកាលពីខែតុលា កងកម្លាំងយោធាមីយ៉ាន់ម៉ា បានបើកប្រតិបត្តិការបោសសម្អាតនៅរដ្ឋ Rakhine ដែលសម្បូរដោយជនភាគតិចរ៉ូហ៊ីងយ៉ា។ យោធាមីយ៉ាន់ម៉ាបានសម្លាប់ ធ្វើបាប និងចាប់ខ្លួនជនភាគតិចនេះរាប់រយនាក់ ខណៈរាប់ម៉ឺននាក់ទៀតត្រូវរត់ភៀសខ្លួន។ ទង្វើនេះ ធ្វើឲ្យអន្តរជាតិថ្កោលទោសរដ្ឋាភិបាលមីយ៉ាន់ម៉ាយ៉ាងខ្លាំង៕
© រក្សាសិទ្ធិដោយ thmeythmey.com