ជាតិ
×![]()
អភិបាលរាជធានីភ្នំពេញ លោក ប៉ា សុជាតិវង្ស ឆ្លើយតបនឹងអ្នករិះគន់ខ្លួនថា រូបលោកមិនបានបំផ្លាញសន្លឹកឆ្នោតរបស់គណបក្សប្រជាជកម្ពុជានោះទេ។ ការបកស្រាយរបស់លោកអភិបាលរាជធានី ធ្វើឡើងបន្ទាប់មានការរិះគន់ពីប្រជាពលរដ្ឋខ្លះ ជាពិសេសពីប្អូនស្រីរបស់សម្តេច ហ៊ុន សែន ជុំវិញបំណងរបស់លោក សុជាតិវង្ស ចង់ឲ្យយានដ្ឋានជួសជុលរថយន្តដាក់ទីតាំងនៅជាយក្រុង។
«បើយើងធ្វើដើម្បីតែបំផ្លាញសន្លឹកឆ្នោតបក្ស យើងខំធ្វើ ធ្វើអ្វី»។ នេះជាការបកស្រាយរបស់លោកអភិបាលរាជធានីភ្នំពេញ ប៉ា សុជាតិវង្ស ប្រាប់សារព័ត៌មានថ្មីៗ ដើម្បីឆ្លើយតបនឹងអ្នកដែលមិនសប្បាយចិត្តនឹងការលើកឡើងរបស់លោក។ លោក សុជាតិវង្ស បន្តលើកឡើងថា អ្នកដែលរិះគន់លោកជុំវិញបំណងរបស់សាលារាជធានីចង់ឲ្យយានដ្ឋានជួសជុលរថយន្ត និងឃ្លាំងស្តុកទំនិញទៅនៅជាងក្រុងនោះ គ្មានហេតុផល និងគ្មានមូលដ្ឋានត្រឹមត្រូវ។ លោក បញ្ជាក់ពីប្រសាសន៍របស់លោក ដែលបានលើកឡើងកាលពីថ្ងៃទី ៦ ឧសភា ក្នុងពេលដែលលោកចុះត្រួតពិនិត្យការដ្ឋានសាងសង់រង្វង់មូលកួរស្រូវ ក្នុងខណ្ឌដង្កោ ដូច្នេះថា៖«អ្នកនិយាយទេ ដែលមិនត្រឹមត្រូវ មិនមានមូលហេតុច្បាស់លាស់។ យើងគ្មានចាត់វិធានការអ្វីទេ ខ្ញុំគ្រាន់តែអំពាវនាវឲ្យយានដ្ឋាន និងឃ្លាំងស្តុកទំនិញ គួរទៅធ្វើនៅជាងក្រុងទេតើ»។ លោកអភិបាលអំពាវនាវបែបនេះ ដើម្បីកាត់បន្ថយការកកស្ទះចរាចរណ៍។
នៅពេលសារព័ត៌មានថ្មីៗថា សួរថា អ្នកដែលរិះគន់លោកនោះមិនតែប្រជាពលរដ្ឋធម្មតាទេ តែក៏មានលោកស្រី ហ៊ុន ស៊ីណាត ប្អូនស្រីបង្កើតរបស់នាយករដ្ឋមន្ត្រី បានរិះគន់លោកដែរ ដោយលោកស្រី បានចាត់ទុកការលើកឡើងរបស់លោកកំពុងហែកសន្លឹកឆ្នោត ឬបំផ្លាញសន្លឹកឆ្នោតគណបក្សប្រជាជនកម្ពុជា។ តើលោកបកស្រាយយ៉ាងណា? លោក សុជាតិវង្ស ដែលមានតួនាទីជាប្រធានគណៈកម្មាធិការកណ្តាលគណបក្សប្រជាជនកម្ពុជាផងនោះ និយាយយ៉ាងខ្លីដោយមិនសំដៅឈ្មោះនរណាមួយបែបនេះថា៖« អ្នកដែលថា យើងបំផ្លាញសន្លឹកឆ្នោតទេ ដែលចង់បំផ្លាញសន្លឹកឆ្នោតនោះ»។ តែផ្ទុយទៅវិញ លោក សុជាតិវង្ស អះអាងថា អ្វីដែលលោកធ្វើ ដើម្បីផលប្រយោជន៍ប្រជាពលរដ្ឋ និងគណបក្សប្រជាជនកម្ពុជាតែប៉ុណ្ណោះ។
សូមបញ្ជាក់ថា កាលពីថ្ងៃទី ៦ ឧសភា លោកស្រី ហ៊ុន ស៊ីណាត បានចូល Comment នឹងអ្នកលេងហ្វេសប៊ុកម្នាក់ មានគណនីឈ្មោះ San Prum (ព្រំ សាន) ដែលឈ្មោះគណនីនេះ បានរិះគន់លោក ប៉ា សុជាតិវង្ស ជុំវិញបញ្ហាខាងលើ។ ពេលនោះហ្វេសប៊ុករបស់លោកស្រី ហ៊ុន ស៊ីណាត (Sinath Hun) បានចូលComment រិះគន់យ៉ាងនេះថា៖« ចៅហ្វាយក្រុងនិយាយចេញមក ហែកសន្លឹកឆ្នោតរហូតហើយ មិនដឹងថ្នាក់លើគិតម៉េចទេ បែបៗនេះ រាងបែកៗ អ៊ីចឹងនោះ»។
ការចូល Comment របស់លោកស្រី ហ៊ុន ស៊ីណាត ត្រូវបានសារព័ត៌មាន Swiftnews យកមកចុះផ្សាយបន្ត។ ប្អូនស្រីរបស់នាយករដ្ឋមន្ត្រី ហ៊ុន សែន រូបនេះ ក៏បានបង្ហោះនៅលើទំព័ហ្វេសប៊ុករបស់ខ្លួន ដោយទទួលស្គាល់សម្តីរបស់លោកស្រី យ៉ាងនេះថា៖« សូមអរគុណចំពោះគេហទំពរ Swiftnewsdaily ដែលបានស្រង់សម្តីរបស់ខ្ញុំក្នុង Comment ពាក់ពន្ធ័ករណីលោកអភិបាលរាជធានីភ្នំពេញ ប៉ាសុជាតិវង្ស មានចំណាត់ការទៅលើយានដ្ឋាន និង ឃ្លាំងស្តុកទំនិញចេញពីក្នុងក្រុងអោយទៅនៅជាយក្រុងវិញ»។ លោកស្រី បន្តដូច្នេះទៀតថា៖«ចំពោះបញ្ហានេះ ខ្ញុំបានបញ្ចេញយោបល់គឺក្នុងន័យស្ថាបនា និងក្នុងនាមជាប្រជាពលរដ្ឋម្នាក់ដែលរស់នៅទីក្រុងភ្នំពេញ ក្រោមការអភិបាលកិច្ចរបស់លោកអភិបាលរាជធានីដូចប្រជាពលរដ្ឋដ៏ទៃទៀតតែប៉ុណ្ណោះ មិនមែនជាការលើកឡើង ដើម្បីគាបសង្កត់ដោយប្រើនូវសិទ្ធិជាប្អូននាយករដ្ឋមន្ត្រីនោះឡើយ»។
លោកស្រី ហ៊ុន ស៊ីណាត ក៏ធ្លាប់ត្រូវសាធារណជនចាប់អាម្មណ៍ផងដែរ កាលពីដើមឆ្នាំ ២០១៦ ដោយពេលនោះ លោកស្រីបានរិះគន់ច្បាប់ចរចរណ៍ថ្មីថា បង្កការលំបាកដល់ប្រជាពលរដ្ឋអ្នកអនុវត្ត។ ការរិះគន់របស់លោកស្រីអតីតអនុរដ្ឋលេខាធិការក្រសួងទំនាក់ទំនងព្រឹទ្ធសភា និងរដ្ឋសភារូបនេះ ក៏ទទួលប្រតិកម្មភ្លាមៗពីបងប្រុសបង្កើតរបស់លោកស្រី ដែលជានាយករដ្ឋមន្រ្តី។ ក្នុងពិធីសម្ពោធស្ពានអាកាស ៧ មករា កាលពីខែមករា ឆ្នាំ ២០១៦ សម្តេច ហ៊ុន សែន បានប្រកាសប្រាប់ប្អូនខ្លួនថា មិនគួររិះគន់បែបនេះឡើយ។ តែពេលនេះ លោកស្រី ស៊ីណាត លេចមុខម្តងទៀត ជាមួយនឹងការរិះគន់អភិបាលរាជធានីភ្នំពេញ។
កន្លងមកលោក ប៉ា សុជាតិវង្ស ធ្លាប់ទទួលរងការរិះគន់ជាបន្តបន្ទាប់ ទាក់ទង់នឹងការលើកឡើងរបស់លោកជុំវិញគម្រោងហាមមិនឲ្យនាំចូលរថយន្តជជុះចូលមកកម្ពុជា គម្រោងមិនឲ្យមានម៉ាស៊ីន ATM នៅតាមទីសាធារណៈ បើក្រុមហ៊ុនមិនដាក់សន្តិសុខការពារ និងបញ្ហាយានដ្ឋាន ជាដើមនេះ។ តែលោកអភិបាល ថ្លែងការពារថា អ្វីដែលលោកធ្វើមិនបានធ្វើឲ្យខូចប្រជាប្រិយភាពគណបក្សប្រជាជនកម្ពុជានោះទេ៕
Tag:
ប៉ា សុជាតិវង្ស
ហ៊ុន ស៊ីណាត
© រក្សាសិទ្ធិដោយ thmeythmey.com
