លោក ពេជ្រ ស្រស់៖ បេក្ខជនឃុំ-សង្កាត់ បក្សយុវជនកម្ពុជា មានចិត្តដូចផែនដី និងស្មោះត្រង់

ជាតិ

បទយកការណ៍ / បទសម្ភាសន៍

លោក ពេជ្រ ស្រស់៖ បេក្ខជនឃុំ-សង្កាត់ បក្សយុវជនកម្ពុជា មានចិត្តដូចផែនដី និងស្មោះត្រង់

15, May 2017 , 7:19 pm

រូបភាព

ដោយ:

គណបក្សយុវជនកម្ពុជា បានបានដាក់បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ចំនួន ១៩ ក្នុងចំណោមឃុំ-សង្កាត់នៅទូទាំងប្រទេសចំនួន ១៦៤៦ ។ ប្រធានគណបក្សយុវជនកម្ពុជា លោក ពេជ្រ ស្រស់ បានថ្លែងថា គណបក្សលោក បានកំណត់លក្ខខណ្ឌបេក្ខជនសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺត្រូវមានចិត្តដូចជាផែនដី និងមានចិត្តស្មោះត្រង់ជួយដល់ប្រជាជន និងប្រទេសជាតិ។

សូមអានបទសម្ភាសន៍រវាងលោក ជា ធីរិទ្ធ និពន្ធនាយករងនៃសារព័ត៌មានថ្មីៗ ជាមួយលោក ពេជ្រ ស្រស់ខាងក្រោម៖

លោក ជា ធីរិទ្ធ៖ គណបក្សលោក បានដាក់បេក្ខជនឈរឈ្មោះបោះឆ្នោតឃុំសង្កាត់ ចំនួន ១៩ ឃុំ-សង្កាត់។ តើគណបក្សលោក បានកំណត់នូវលក្ខណៈសម្បត្តិអ្វីខ្លះ ដើម្បីសម្រេចជ្រើសរើសបេក្ខជនទាំងនោះឲ្យឈរឈ្មោះ? ហើយហេតុអ្វីគណបក្សយុវជនកម្ពុជា មានបេក្ខជនឈរឈ្មោះតិច?

លោក ពេជ្រ ស្រស់៖ ទី ១ បេក្ខជនឈរឈ្មោះបោះឆ្នោតឃុំ សង្កាត់របស់យើង ត្រូវមានចំណេះដឹងវិជ្ជមាន គឺមានចំណេះដឹងប្រកបដោយសមធម៌ មានន័យថា ប្រើចំណេដឹងរបស់ខ្លួនដោយមិនប្រកាន់បក្សពួកនិយម ព្រមទាំងមិនយកចំណេះដឹងរបស់ខ្លួនទៅគាបសង្កត់ដល់ជនទន់ខ្សោយ និងជនអវិជ្ជា។ ទី ២ ត្រូវមានជំនាញពិតប្រាកដមួយ បើបេក្ខជនមេឃុំនីមួយៗមានជំនាញពិតប្រាកដហើយនោះ គឺការអភិវឌ្ឍ នៅក្នុងឃុំខ្លួននឹងរីកចម្រើនដោយមិនចាំបាច់ថ្នាក់លើដាក់បញ្ជា។ ទី ៣ ត្រូវមានចិត្តជាផែនដី ដោយហេតុផលថា នៅពេលខ្លួនជាប់ជាមេឃុំ បុគ្គលនោះ ត្រូវធ្វើខ្លួនជាអ្នកបម្រើពលរដ្ឋគ្រប់និន្នាការដែលរស់នៅក្នុងមូលដ្ឋាន។ ទី ៤ ត្រូវជាមនុស្សឈឺឆ្អាលសុខទុក្ខរបស់អ្នកដទៃ ពីព្រោះថា មេឃុំ ជាអ្នកសង្គ្រោះដោយផ្ទាល់ដល់ពលរដ្ឋគ្រប់និន្នាការនយោបាយ។ ទី ៥ ត្រូវមានចិត្តស្មោះត្រង់ជាមួយជាតិ និងពលរដ្ឋរបស់ខ្លួនទើបជាតិមានភាគរីកចម្រើននិងពលរដ្ឋមានសេចក្តីសុខ។

ចំពោះសំណួរទាក់ទងនឹងគណបក្សយុវជនកម្ពុជាមានបេក្ខជនឈរឈ្មោះតិចឃុំ ដោយហេតុថា បងប្អូនពលរដ្ឋនៅមានការភ័យខ្លាចលើវិស័យនយោបាយ ហើយបងប្អូន មួយចំនួនទៀតពួកគាត់ជួបផលលំបាករឿងកិច្ចការប្រកបមុខរបរ ពីព្រោះ ពួកគាត់ខ្លាចការរើសអើងពីអាជ្ញាធរ ហើយមានផលប៉ះពាល់ដល់មុខរបររបស់ពួកគាត់ ដូច្នេះហើយទើបគណបក្សយុវជនកម្ពុជាមានបេក្ខជនឈរ ឈ្មោះក្រុមប្រឹក្សាឃុំបានតិចដូច្នេះ។

លោក ជា ធីរិទ្ធ៖ តើគណបក្សលោកមានលក្ខណៈពិសេសខុសពីបក្សដទៃដូចម្តេច?

លោក ពេជ្រ ស្រស់៖ គណបក្សយុវជនកម្ពុជាមានភាពខុសប្លែកពីគណបក្សដទៃ គឺមានបីចំនុច៖ ទី១ គណបក្សយើងមិនសន្យាជាមួយម្ចាស់ឆ្នោត ប៉ុន្តែធ្វើការងារសង្គ្រោះម្ចាស់ឆ្នោតច្រើនជាងការសន្យាខ្យល់។ ចំនុចទី២ គណបក្សយុវនកម្ពុជាមានគោលការណ៍សង្គ្រោះម្ចាស់ឆ្នោតគ្រប់និន្នាការនយោបាយ ដោយមិនប្រកាន់បក្ខពួកនិយម។ ទី៣ ចាត់ទុកគ្រប់បញ្ហារបស់ម្ចាស់ឆ្នោត គឺជាទុក្ខកង្វល់របស់ក្រុមការងារគណបក្សយុវជនកម្ពុជា ហើយចូលរួមដោះស្រាយគ្រប់កាលៈទេសៈជូនម្ចាស់ឆ្នោត។

លោក ជា ធីរិទ្ធ៖ តើបញ្ហាធំបំផុតអ្វីខ្លះ (អាចចំនួន ៣ ឬ៤) ដែលគណបក្សលោកនឹងដោះស្រាយមុនគេ បន្ទាប់ពីបេក្ខជនរបស់បក្សលោកជាប់ឆ្នោតជាមេឃុំឬចៅសង្កាត់?

លោក ពេជ្រ ស្រស់៖បញ្ហាធំៗ ដែលគណបក្សយុវជនកម្ពុជានឹងដោះស្រាយមុនគេក្រោយគណបក្សជាប់ឆ្នោតជាមេឃុំ គឺយើងខ្ញុំនឹងដោះស្រាយបញ្ហា ៣ ចំណុចមុនគេ។ ទី១ សម្រួលការងារដាំដុះផលិតផលកសិកម្មខ្នាតតូច និងមធ្យម ហើយរកទីផ្សារជូនពួកគាត់។ ទី២ គឺធ្វើការងារស្តាប្រព័ន្ធធារាសាស្ត្រឡើងវិញ ដើម្បីឲ្យបងប្អូនកសិករមានឱកាសធ្វើស្រែយ៉ាងហោចណាស់២ដង ក្នុងមួយឆ្នាំ។ ទី៣ មេឃុំរបស់គណបក្សយុវជនកម្ពុជា នឹងរៀបចំកម្មវិធីជួបជុំជា មួយពលរដ្ឋរៀងរាល់១ខែម្តង ដើម្បីផ្សព្វផ្សាយពីសិទ្ធិរបស់ពលរដ្ឋក្នុង គោលបំណងបញ្ចប់ភាពរើសអើងគ្នាលើវិស័យនយោបាយ៕