ក្រោយឯកឧត្តម កឹម សុខា មកកម្ពុជាវិញ បក្សប្រឆាំង នឹងរើសអនុប្រធានម្តងទៀត

ជាតិ

ក្រោយឯកឧត្តម កឹម សុខា មកកម្ពុជាវិញ បក្សប្រឆាំង នឹងរើសអនុប្រធានម្តងទៀត

15, May 2017 , 5:46 pm

រូបភាព

ដោយ: ម៉ៅ សុផា

ភ្នំពេញ៖ គណបក្សសង្គ្រោះជាតិ មិនទាន់មានអនុប្រធាន ដែលទទួលស្គាល់ដោយក្រសួងមហាផ្ទៃ នោះទេ។ ដូច្នេះ គណបក្សសង្គ្រោះជាតិ ចាំបាច់ត្រូវតែជ្រើសរើសអនុប្រធានសាជាថ្មី នៅពេលឯកឧត្តម កឹម សុខា វិលមកពីបរទេសវិញ។

គណៈកម្មាធិការនាយកនៃគណបក្សសង្គ្រោះជាតិ នឹងបើកកិច្ចប្រជុំ នៅថ្ងៃទី១៧ ខែឧសភា ឆ្នាំ២០១៧ ដើម្បីជ្រើសរើសអនុប្រធានគណបក្សសាជាថ្មី។ ការបើកកិច្ចប្រជុំក្នុងគណៈកម្មាធិការនាយក គឺធ្វើឡើងក្រោយពីឯកឧត្តម កឹម សុខា ប្រធានគណបក្សសង្គ្រោះជាតិ បញ្ចប់បេសកកម្មនៅឯសហរដ្ឋអាមេរិក ហើយត្រឡប់មកដល់កម្ពុជាវិញ នៅថ្ងៃទី១៦ ខែឧសភា ឆ្នាំ២០១៧។ នេះបើតាមលោក យឹម សុវណ្ណ អ្នកនាំពាក្យគណបក្សសង្គ្រោះជាតិ។

លោក យឹម សុវណ្ណ បញ្ជាក់ថា លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ដែលបច្ចុប្បន្ន ជាអនុប្រធានគណបក្សសង្គ្រោះជាតិ តែមិនទាន់ទទួលស្គាល់ពីក្រសួងមហាផ្ទៃ នឹងឈរឈ្មោះជាអនុប្រធានគណបក្សសង្គ្រោះជាតិ ដដែល។ លោក អះអាងថា ក្រៅពីអ្នកទាំងបីខាងលើ គឺពុំមានឥស្សរជននយោបាយណាផ្សេង ចង់ឈរឈ្មោះជាបេក្ខជនអនុប្រធានគណបក្សសង្គ្រោះជាតិ នោះទេ។

លោក យឹម សុវណ្ណ បានសរសើរគណបក្សរបស់ខ្លួនដូច្នេះថា៖«យើង ឥតមានចង់ដណ្តើមតំណែងគ្នាទេ។ អ្នកណា មានតួនាទីអ្វី គឺបំពេញតួនាតីនោះ។ យើង ស្រុះស្រួលគ្នាណាស់»។

មូលហេតុ ដែលគណបក្សសង្គ្រោះជាតិ ចាំបាច់ត្រូវជ្រើសរើសអនុប្រធានសាជាថ្មី គឺដោយសារតែក្រសួងមហាផ្ទៃ មិនព្រមទទួលស្គាល់លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធានគណបក្សសង្គ្រោះជាតិ។ ក្រសួងមហាផ្ទៃ លើកហេតុផលថា គណបក្សសង្គ្រោះជាតិ បានធ្វើខុសនឹងលក្ខន្តិកៈគណបក្សខ្លួនឯង ក្នុងការជ្រើសរើសអនុប្រធានទាំងបីរូបខាងលើ។

ដើម្បីបញ្ចៀសបញ្ហានេះ គណបក្សសង្គ្រោះជាតិ ក៏សម្រេចរៀបចំសមាជវិសាមញ្ញ ដើម្បីធ្វើវិសោធនកម្មលើលក្ខន្តិកៈគណបក្ស។ នៅទីបំផុត ក្រសួងមហាផ្ទៃ ក៏ទទួលស្គាល់លក្ខន្តិកៈថ្មីរបស់គណបក្សសង្គ្រោះជាតិ។ ការ ដែលក្រសួងមហាផ្ទៃ ទទួលស្គាល់នូវលក្ខន្តិកៈថ្មីនេះ គឺជាការបើកផ្លូវឲ្យអ្នកទាំងបីរូបខាងលើ ក្លាយជាអនុប្រធានគណបក្សសង្គ្រោះជាតិ ដោយពេញលក្ខណៈ៕